Htêyung ushuq kut su é matú. Sámpyí mùt luî hkon é, Dawiq é jidang.
Garai Gasang Wú Mâgum Yù Râ Matú Kyûdûng É Dang
5
Yhûmsîng Garai ê,ngá é dang lé gyô yù byi aq;
ngá é i‑myìt nò-kying htê lé myìt tê byi aq.
2 Ngá é Hkóhkâm, ngá é Garai Gasang ê,
ngo lé garúm yû râ matú
wùt ngau é htê lé rago gyo byi aq;
hkâsu mù gâ le,
ngò gi, Nang lé kyûdûng nyi lhê.
3 Yhûmsîng Garai ê,
Nàng gi, nàpsûn lé,
ngá é htê gyo byî ri;
Ngò gi, nàpkyó lé,
Náng é hí má dûng tôngbán mù,
myìt myòqbyù é èq láng nyi lhê.
4 Nàng gi, agè ashop hkyô lé
myìt nguì ô naù é Garai Gasang a nghut;
agè ashop bang gi, Nàng eq rahá
wó nyî kôrâ a nghut.
5 Nghutbûn é bang gi, Náng é myòq
hí má wó yàp kôrâ a nghut;
agè ashop hkyô kut é lhúnglhâng bang lé,
Nàng a naù a wom nghut ri.
6 Mhaû é bang lé
Nàng lhoqhtên pyâm ri;
byù sat nau é eq
mhaú zo mhaú shuq nau é bang lé,
Nàng, Yhûmsîng Garai chaq pyâm ri.
7 Nghut kôlhang, ngò gi, Náng é jeju mó mai,
Náng é yhûm má
wó wang lé lô râ nghut lhê;
Ngò gi, Nang lé hkúngga hpautap myìt mai,
Náng é chyoiyúng noqkuq yhûm shut
ngóm gòp mù noqkuq râ nghut lhê.
8 Yhûmsîng Garai ê, ngá é gye pê é yánmai, ngo lé,
Náng é díngmán hkyô má shuî-û yù àq;
Náng é hkyô lé,
ngá é hí má lhoqnyhang to byi aq.
9 Yhángmòq é nhut má gi,
lùm gíng é dang rahkun le a bò nghut ri;
yhángmòq é i‑myìt nhiklhum má gi,
htên byòq hkyô chyat byíng tô ri;
yhángmòq é hkyungdong gi,
bóng tô é lùpdong nghut ri;
Yhángmòq é shô gi,
mhaú zo dang taî ri.
10 Garai Gasang ê,
yhángmòq lé mara byi aq!
Yhángmòq haq htung é hpàqchyî má
yhángmòq lòm zo kó sháng gàq;
yhángmòq gi,
Nang lé gumlau toq bekô nghut mù,
yhángmòq é myô dik é yubàk marâ é yánmai,
yhángmòq lé lhoqhtûm pyám aq.
11 Nghut kôlhang,
Náng chyáng nghêhkaû bang bànshoq gi,
nguì ngón gabú nyî kó sháng gàq;
yhángmòq gi,
ayang gabú mahkôn hkon nyì kó sháng gàq.
Yhángmòq lé wú magûm byi aq,
haú hkûn, Náng é myìng lé chyit é bang gi,
Náng chyáng wó gabú nyî kôrâ nghut lhê.
12 Hkâsu mù gâ le, Yhûmsîng Garai ê,
Nang gi, gè gè yhang
haû díngmán bang lé shimân byî mù,
Náng é jeju lé gi, yhángmòq é
lhînghkyùq má gòlong su go to byî é nghut ri.