Htêyung ushuq kut su é matú. Tíng bàt luî hkon é, Dawiq é jidang.
Myínhtâng Zó Lhê É Kyûdung Dang
4
Ngá é díngmán Garai Gasang ê,Nang lé ngò wùt dûng é hkûn gyo byi laq.
Ngò myìt myo myìt chiq é u lé
Nàng lhoqlhut byi é nghut lhê;
ahkuî le,
Ngo lé shogyo nhikmyîn yù mù,
ngá é kyûdung dang lé gyo byi laq.
2 Byu pé ê,
núngmòq gi, hkâ-myháng jé shoq
ngá é hpungwup shingkang lé
hoq hpu hkyô dùt nhang nyì kôrâ lhú?
Núngmòq gi, hkâ-myháng jé shoq
a-kyû a bo é lé chyitdàp mù,
mhaû é hkyô lé ho nyì kôrâ lhú? Sela
3 Yhûmsîng Garai gi, Yhâng é matú,
târâ hkúnggâ é byù lé,
hkyin to bê hkyô lé sé keq;
Yhûmsîng Garai gi,
ngò wùt dung jáng gyo byi râ nghut lhê.
4 Gyùq nán é myìt mai mara kut é hkyô lé koi pyám keq;
núngmòq yhup hpyang má nghut nyi é hkûn,
jíhkúm nùqgùq myìt wú luî,
zim za nyì keq. Sela
5 Díngmán é hkungga pé nhông byi luî,
Yhûmsîng Garai lé lùmhkaû keq.
6 Byù myo myo gi,
“Ngá-mòq lé, ge é hkyô rajung jung
ó yùq wó tûn shit râ lhú?” ga taî nyi bum akô.
Yhûmsîng Garai ê,
Náng é myòqdong maubó gi,
ngá-mòq ahtoq má bó byî nyì laq.
7 Nàng gi, yhángmòq é kyôshi myuishi eq tsibyiq wing sik
myoluq jebê é htoq,
ngá é i‑myìt nhiklhum má
gabú hkyô je lhoqpyíng byi bê nghut ri.
8 Ngò gi, nguì ngón é èq lèq mù,
yhup râ nghut lhê.
Hkâsu mù gâ le, Yhûmsîng Garai ê,
Nàng za ngo lé
gau shoq nyì nhang é Sû nghut lhê.