Yudaq Byù Pê É Ûngmyuq Hkyô
9
Hkóhkâm hkyô tô é hkunmó lé lhoqdìk râ buìnyì gi, Adara lhôhkyap raxe í hkyap, raxe sum nyí má nghut ri. Buìnyì haû gi, Yudaq byu pé lé gyè kut é bang mai, Yudaq byu pé lé wó ùp zìk pyám râ matú myìt myòqbyu tô é buìnyì nghut ri. Nghut kôlhang, haú hkyô gi, a-tau dông dùt byùq mù, Yudaq byu pé yuq shèq, yhángmòq lé a naù a wom kut bâng ahtoq má wó ùp zìk pyám bê nghut ri. 2 Yudaq byu pé gi, yhángmòq nyi é Hkóhkâm Ahasuru é mau hkangmó mâ é wà mó pé má, yhángmòq lé lhoqhtûm pyám râ hen lo é bang lé lhom htim râ matú zùp zîng bum akô nghut ri. Gótû mingbyû wuì bànshoq gi, yhángmòq lé gyùq kô é yánmai, ó yùq le yhángmòq lé a wó htîm ûng lo kó nghut ri. 3 Modehkai lé gyùq bum kô é yánmai, mau hkangmó mâ é zaugun sûwún wuî, mauzaû pé, ming zaû pé eq hkóhkam é mú wùn bang bànshoq gi, Yudaq byu pé lé garúm akô nghut ri. 4 Ahkuî, Modehkai gi, hkóhkâm wâng má ahkyàk é byù mó rayùq nghut mù, mau hkangmó má yhâng é myìng hû jam ló bê nghut luî, yhâng é ahkáng ayá gi, je riyhang kô myhang lo nyì bê nghut ri.5 Yudaq byu pé gi, yhángmòq lé gyè kut é bang lé sham èq sat kyop pyám kômù, yhángmòq lé a ngui é bang lé ô nau é su kut bekô nghut ri. 6 Yhángmòq gi, Susa wà mó mâ é gingtíng jowò má byù ngo shô yùq yhang sat pyâm akô nghut ri. 7-10 Hau htoq agó, yhángmòq gi, yhángmòq é gyè nghut é, Hamedahta é yùqzo Haman é yhang zô pé nghut é, Pashandahta, Dahpon, Asipahta, Porahta, Adali‑a, Aridahta, Pamashata, Arisai, Aridai, Waizahta pé raxê yùq lé le sat pyâm akô nghut ri. Nghut kôlhang, yhángmòq gi, haû bâng é azíng zê haî lé le a yù byi kó nghut ri.
11 Haú nyí má yhang, Susa wà mó mâ e gingtíng jowò má sat pyám huî é bang hkâ-myhó yùq nghut é lé, hkóhkâm lé ló shit kyô akô. 12 Hau htâng, hkóhkâm gi, Hkóhkâm myhí Esihta lé, “Yudaq byu pé gi, Susa wà mó mâ é gingtíng jowò má byù ngo shô yùq lé le, Haman é yùqzo raxê yùq lé le sat pyám bekô nghut ri. Gótû hkóhkam mau pé má le yhángmòq hkâsu kut bekô làq? Ahkuî, nàng haî dúng nau ri lhú? Nàng lé byi râ nghut lhê. Nàng haî kut nhâng nau ashî lhú? Haú lé kut byi râ nghut lhê.” ga taî ri.
13 Haû mù luî, Esihta gi, “Hkóhkâm nàng gyo byi râ nghut le gi, Susa wà mó má nyi é Yudaq byu pé lé, yhángmòq hkû-nyí kut é eq rajung za nàpmá le dum kut nhang shilaq. Hau htoq agó, Haman é yùqzo raxê yùq é màng pé lé le, byù lhâng sat zîng má lhâng to nhâng laq.” ga tû taî ri.
14 Haû mù, hkóhkâm gi, haû su kut râ matú hkunmó hkyô kat bê nghut ri. Hkunmó haú lé Susa wà mó má lhoqpyo é nghut mù, yhángmòq gi, Haman é yùqzo raxê yùq é màng lé de de lhâng shit to bekô nghut ri. 15 Susa wà mó mâ é Yudaq byu pé gi, Adara nghu é lhôhkyap, raxe myi nyí nyí má chôm zùp zing kôluî, byù sum shô yùq lé, haû Susa wà mó má yhang sat pyâm akô nghut ri. Nghut kôlhang, yhángmòq gi, haú bâng é azíng zè haî lé le a yù byi kó nghut ri.
16 Haú u lé, hkóhkam mau pé má nyi é gótû Yudaq byu pé gi, yhángmòq lé gyè kut bâng é lòq mai wó lùt râ eq yhûmsing chyungxe lé wó hung yù râ matú chôm zùp zîng bum akô. Yhángmòq gi, byu nyhit mûn ngo hkyîng yùq lé sat pyám bekô. Nghut kôlhang, azíng zè haî lé le a yù byi kó nghut ri. 17 Haú hkyô gi, Adara lhôhkyap raxe sum nyí má dùt é nghut ri. Hau htang nyí, lhôhkyap raxe myi nyí má gi, yhángmòq nô yu luî, nguì ngón gabú zoshuq poî kut akô nghut ri.
Purim Poî Kut É Hkyô
18 Susa wà mó má nyi é Yudaq byu pé kúm gi, raxe sum nyí eq raxe myi nyí má chôm zùp zing kôluî, raxe ngo nyí nyí má nô yù kômù, nguì ngón gabú zoshuq poî kut bekô nghut ri.
19 Haû mù luî, wà chyap wà zo má nyi é Yudaq byu pé gi, Adara lhôhkyap raxe myi nyí nyí lé, nguì ngón gabú zoshuq poî buìnyì eq, rayùq eq rayùq chyûnghuq gam lhûm é buìnyì dông kut gyó lô bekô nghut ri.
20-21 Modehkai gi, dùt laî lo é hkyô bànshoq lé kâ xûm to mù, Hkóhkâm Ahasuru é mau pé mâ é, wê é chyâng é má nyi é Yudaq byù bànshoq bâng chyáng, zàn wuì Adara lhôhkyap raxe myi nyí nyí eq raxe ngo nyí nyí má poî kut râ matú pying kat é laiká hun kat ri. 22 Buìnyì haú pé gi, Yudaq byu pé mai yhángmòq lé gyè kut bâng é lòq mai wó lùt lo é ahkyíng dông le, myìt myo myìt chiq hkyô mai gabú hkyô shut, iyon yôn é hkyô mai poî kut é shut wó htaî lhik é lhôhkyap dông le nghut ri. Modehkai gi, yhángmòq chyáng, buìnyì haú pé lé, nguì ngón gabú zoshuq poî kut mù, rayùq eq rayùq zoshuq chyûnghuq gàm byî lhum luî, asho awuî é bang lé chyûnghuq gàm byî é masàt buìnyì dông kut nyî râ matú laiká kâ hun kat ri.
23 Haû mù luî, Yudaq byu pé gi, Modehkai mai yhángmòq lé ká byî é eq rajung za cháng kômù, masàt poî haû gi, zàn wuì kut é htûngli dùt byùq bê nghut ri. 24 Hkâsu mù gâ le, Yudaq byù bànshoq bang lé gyè nghut é sû, Agaq é awùt ashín, Hamedahta é yùqzo Haman gi, Yudaq byu pé lé lhoqhtên pyám râ matú haq da mù, yhángmòq lé lhoqhpyoq lhoqhtûm pyám râ matú Pura gâ é hkyîn shosé she é nghut ri. 25 Nghut kôlhang, Haman haq htung é hkyô lé hkóhkâm sé jáng, yhang gi, Yudaq byu pê htoq má Haman haq hen é agè ashop hkyô, yhâng chyáng yhang dum taû jé râ matú le, yhang eq yhâng é yùqzô pé lé, byù lhâng sat zîng má lhâng sat pyám râ matú le, hkunmó hkyó laiká lhoqhtoq kat ri. 26-27 Haû mù luî, buìnyì haú pé lé gi, Purim ga myhîng akô. Myìng haû lé gi, Pura gâ é lé cháng mù myhíng kô é nghut ri. Hkâsu mù gâ le, Modehkai hun kat é laiká má bo é dang bànshoq é yánmai le, yhángmòq byu myang é eq yhángmòq chyáng dùt laî lo é hkyo é yánmai le, Yudaq byu pé gi, yhángmòq é matú le, yhángmòq é awùt ashín pé eq Yudaq htûngli shut lhik wang lò bâng é matú le, htûngli ralhum dông masàt yù luî, zàn wuì, masàt tô é ahkyíng jé jáng, kâ tô é eq rajung za buìnyì haû í nyí lé a lhaî pyâm é za poî kut nyi akô nghut ri. 28 Buìnyì haû í nyí le, mau hkangmó má, wà mó hkangmó má, yhûmhtu hkangmó má pyàt pyàt zaí zaí myìtbun xoq kut nyî râ dùt lhê. Yudaq byu pé gi, Purim poî buìnyì haû í nyí lé hkâ-nhám le kut nyî mù myìtbûn nyì râ dùt lhê.
29 Haû mù, Abihaila é byìzo Hkóhkâm myhí Esihta eq Yudaq byù Modehkai gi, haû Purim poî eq sêng luî kâ é, í dâm nghû râ laiká lé, lhoq gingtíng râ matú ahko ahkáng mó eq laiká kâ to bekô nghut ri. 30 Hau htâng, Modehkai gi, Hkóhkâm Ahasuru é mîngdán mâ é mau 127 má nyi é, Yudaq byù lhúnglhâng bâng chyáng nguì ngón é eq tengmán dang kâ tô é laiká hun kat ri. 31 Laiká haû gi, Yudaq byù Modehkai eq Hkóhkâm myhí Esihta mai yhángmòq lé hkunmó hkyô tô é nghut mù, Yudaq byu pé yhángmòq é matú le, yhángmòq é awùt ashín pê é matú le, zoshuq tûm é eq iyon yôn é ahkyíng to râ lhê ga hàp yu to kô é eq rajung za, yhángmòq masàt tô é ahkyíng má haû Purim poî buìnyì í nyí lé kut râ matú lhoq gingtíng byî é nghut lhê. 32 Purim poî eq sêng é htûngli lé Esihta é hkunmó èq lhoq gingtîng to mù, haú pé lé xûm to laiká ding má kâ tô akô nghut ri.