Esihta 8

Yudaq Byu Pé Lé Esihta Hkyi É Hkyô

Haú nyí má yhang, Hkóhkâm Ahasuru gi, Yudaq byu pê é gyè nghut é Haman é yhûm eq sùtzè lhúnglháng, Hkóhkâm myhí Esihta lé byî pyâm ri. Esihta eq Modehkai gi, buìnùm sîng du é hkyô, hkóhkâm lé Esihta èq taî kyo bê nghut é yánmai, Modehkai gi, hkóhkam chyáng wàng râ ahkáng wó bê nghut ri. 2 Hkóhkâm gi, Haman chyáng mai dum yu pyám byî é lòqtsung dizìk lé hkyut yû mù, Modehkai lé byî ri. Esihta le, Haman é sùtzè eq yhûm lé wú gôn nyì râ matú Modehkai lé wò byî ri.

3 Esihta gi, Yudaq byu pé lé gyè kut râ haq htung é, Agaq é a-myû Haman é agè ashop hkyô lé lhoqhtûm pyám byi râ matú, hkóhkam é hí má ngóm gòp luî, ngaù uchyang dum dûng tôngbán ri. 4 Haú hkûn, hkóhkâm gi, yhâng é hîng dumbáng lé Esihta shut yhûn kat luî, Esihta gi, hkóhkam é hí má toq yàp ri.

5 Hau htâng, yhang gi, “Hkóhkâm myìt ngui é nghut mù, náng é hí má ngò myòqdong wó luî, ngò dûng é hkyô kut byi gíng é su ngàm mù, ngo lé nàng wú ngui é nghut jáng gi, hkóhkâm mîngdán má nyi é Yudaq byù myû bànshoq lé sat htum pyám râ matú, Agaq é awùt ashín mâ é Hamedahta é yhang zo Haman hkunmó hkyô tô é lé, châng hkûm pyám byi râ hkunmó laiká ká htoq byi laq. 6 Hkâsu mù gâ le, ngò gi, ngá é byù myû htoq má jé lô râ ihkyùp mó shî lé le, ngá é yhûmbyù buìnùm wuì sat pyám é hui râ lé le, hkâsu kut wó wú lhaî pyám râ lhú?” ga taî ri.

7 Hkóhkâm Ahasuru gi, Hkóhkâm myhí Esihta eq Yudaq byù Modehkai lé tû taî é gi, “Wú keq! Haman gi, Yudaq byu pé lé gyè kut é yánmai, yhâng é yhûm eq sùtzè lé, Esihta lé byî pyám bê. Yhang lé le, byù lhâng sat zîng má lhâng sat pyám bekô. 8 Nghut kôlhang, hkóhkam é myìng lang luî, hkóhkam é lòqtsung dizìk htûng tap tô é hkunmó laiká lé gi, ó le wó lhoqhpyoq pyám râ a nghut; haû mù, núng í yùq myìt ô nau é eq rajung za, Yudaq byu pê é matú, ngá é myìng dông gótû hkunmó laiká ká mù, hkóhkâm lòqtsung dizìk htung keq.” gâ ri.

9 Hau htâng, Modehkai gi, lhôhkyap sum hkyap nghû râ Siwan lhôhkyap í xe sum nyí nyí lé, hkóhkâm é mûsîng pé lé ji yù mù, yhang hkyô é hkunmó eq rajung za, Indi-a mau mai Hkusha mau jé shoq mâ é mau rasho í xe nyhit mau má nyi bum é Yudaq byu pé, mauzaû pé, ming zaû pé eq zaugun sûwún wui pê chyáng laiká kâ hun kat nhang ri. Laiká haú pé lé gi, mau hkangmó mâ é laiká kâ é dông le, a-myû hkangmó mâ é myíng dông le, Yudaq byu pê é myíng eq laiká dông le kâ é nghut ri. 10 Modehkai gi, Hkóhkâm Ahasuru é myìng dông laiká kâ yù mù, hkóhkam é lòqtsung dizìk htûng tap yû luî, hkóhkam é múzó matú rém tô é, gyaí yang é myang jî é, laiká dé bang lé dé nhang kat ri.

11 Haû hkunmó laiká má, wà hkangmó má nyi é Yudaq byu pé gi, chôm zùp zing mù, yhûmsing é chyungxe pé hung yù râ ahkáng bo tô ri. Haû gi, yhángmòq eq yhángmòq é myiwe wuì, zoshâng wuì lé htîm lo é mingbyû wuì hkâmâ é bang lé nghut kôlhang, taû htim luî, sat htûm pyám mù, yhángmòq é sùtzè pé lé yu pyám byi râ ahkáng nghut ri. 12 Hkóhkâm Ahasuru é mau bànshoq mâ é Yudaq byu pé haû su kut râ masàt tô é buìnyì gi, Adara gâ é lhôhkyap raxe í hkyap é raxe sum nyí má yhang nghut ri. 13 Haú buìnyì má, Yudaq byu pé mai, yhángmòq é gyè pé lé lató hpuq râ rì rì wó sôn to râ matú, mau hkangmó má hkunmó haú lé târâ dông lhoqpyô mù, mingbyû wuì yùq hkangmó lé sé nhang râ nghut lhê.

14 Laiká dé bang gi, hkóhkam èq hkunmó hkyô kat é yánmai, hkóhkam é myang jî chûng mù, gyaí yang é dông htoq ló bekô. Susa wà mó mâ é gingtíng jowò má le hkunmó haú lé lhoqpyô bekô nghut ri.

15 Modehkai gi, mauhkûng nyuì eq hpyu é isâm dàp é hkóhkâm bumó le wùt chûng, nú nhâm é pân èq hkyup é mê é buhîng le gáng chûng, hîng jánmaú mó le tsung kut mù, hkóhkâm wâng mai htoq lo ri. Haû mù, Susa wà mó má gabú garu htê byíng zan to bê nghut ri. 16 Yudaq byu pê é matú kúm gi, nguì ngón gabú é, myìt ngui é eq xânghpoq nge wó é ahkyíng nghut ri. 17 Hkóhkam é hkunmó laiká lé nghap kyô é mau hkangmó eq wà hkangmó mâ é Yudaq byu pé gi, nguì ngón gabú mù, zoshuq poî kut bum akô nghut ri. Gótû mingbyû wuì myo myo gi, Yudaq byu pé lé gyùq kô é yánmai, Yudaq byù kut lo bum akô nghut ri.