Haman Sat Pyám Huî É Hkyô
7
Haû mù luî, hkóhkâm eq Haman gi, Hkóhkâm myhí Esihta é zoshuq poî má ê dum jé bekô nghut ri. 2 Yhángmòq tsibyiq wing shuq nyî kô é u lé, hkóhkâm gi, Esihta lé, “Hkóhkâm myhí Esihta ê, nàng haî dung nau ri lhú? Nàng ô nau é eq rajung za ngò byi râ nghut lhê. Nàng haî jung ô nau ri lhú? Mîngdán rawuí lháng ngò byi râ nghut lhê.” ga taî ri.3 Haú hkûn, Hkóhkâm myhí Esihta gi, “Hkóhkâm ê, náng é hí má ngò myòqdong wó é nghut jáng, hkóhkâm nàng myìt nguì luî ngo lé gyo byi râ nghut le gi, ngò le, ngá é a-myû wuì le, chyungxe wó dui nyì râ lé, ngò ô naù dúng nau nyi ri. 4 Hkâsu mù gâ le, ngò eq ngá é a-myû wuì gi, sat htûm pyám é hui râ matú ung zô pyâm é hui bê nghut lhê. Jùn myhí jùn hpó dùt râ matú za ung zô pyâm é ru nghut le gi, ngò zim za nyi to râ nghut lhê; haî mù gâ le, haû gi, hkóhkâm lé lhoqhkyik râ î é myìt myo myìt chiq hkyô a nghut.” ga tû taî ri.
5 Haû jáng, Hkóhkâm Ahasuru gi, Hkóhkâm myhí Esihta lé, “Haû sû é múzó lé wám kut sû gi, ó yùq wá nghut ri lhú? Haú yùq hká má nyi ri lhú?” ga myî ri.
6 Esihta gi, “Ngá-mòq lé lhoqhtên pyám râ eq gyè kut é sû gi, shî agè ashop é Haman yhang nghut ri.” ga tû taî ri.
Haú hkûn, Haman gi, hkóhkâm eq hkóhkâm myhî é hí má dan gyùq hong byùq bê nghut ri. 7 Hkóhkâm gi, nhikjum mó gyô yo luî, zo shuq nyi é mai toq mù, hkóhkâm wâng banhkyâm shut wang e ló ri. Nghut kôlhang, Haman gi, yhang lé hkóhkam èq mara byi berâ lé wú sé jáng, yhang chyungxe wó lùt râ matú Hkóhkâm myhí Esihta lé dûng tôngbán râ ga nyi gyó tô ri.
8 Hkóhkâm gi, hkóhkâm wâng banhkyâm mai zoshuq poî wàp má dum taû wang lo é hkûn, Haman gi, Esihta nghe zung tô é hpyang htoq má ngóm gòp tô é lé lo myàng jáng, “Shí yùq gi, ngá é myòq hí tê, yhúmhkaû má yhang, hkóhkâm myhí lé lháng rhoî râ haq htung ri myhî-nhung lhî?” ga taî garû kat ri.
Hkóhkâm haû su ga taî garû kat eq yhang, yhâng é duìnhâng zoshâng wuì gi, Haman é myòqdong lé nghop pyám byî akô nghut ri. 9 Hau htâng, Harabona gâ é hkóhkâm é u-nuk rayùq gi, “Hkóhkam é chyungxe lé hkyi wú bê sû Modehkai lé lhâng sat pyám râ matú, Haman gi, ngo xê dúng kô myhang é byù lhâng sat zîng ralhum lé, yhâng é yhûm nàm má xuq tô ri.” ga taî kyô ri.