Hahkali-a é yhang zo ming zau Nehemi-a,
3 Pashura, Amari-a, Malikiya,
4 Hatusha, Shebani-a, Maluk,
5 Harim, Meremot, Obadi-a,
6 Dani-elaq, Ginehton, Baruk,
7 Meshulam, Abiya, Miyamin,
8 Mazi-a, Bilagai eq Shemai-a pé nghut akô.
Haú bang gi, hkyangjông pé nghut akô nghut ri.
9 Lewiq byu pé mâ é gi,
Azani-a é yhang zo Yeshu-a, Henadat é yhang zo Binui, Katmi-ela pé,
10 yhángmòq é gu-mang wuì, Shebani-a,
Hodi-a, Kelita, Pelai-a, Hanan,
11 Mihka, Rehoba, Hashabi-a,
12 Zahkura, Sherebi-a, Shebani-a,
13 Hodi-a, Bani eq Beninu pé nghut akô.
14 Shiwa byu pé mâ é ushuq pé gi,
Parosha, Pahat-Moba, Elam, Zatu, Bani,
15 Buni, Azigat, Bebai,
16 Adoniya, Bigiwai, Adin,
17 Atera, Hezeki-a, Azura,
18 Hodi-a, Hashum, Bezai,
19 Harip, Anahtot, Nebai,
20 Magapi-asha, Meshulam, Hezira,
21 Meshezabela, Zadok, Yadu-a,
22 Pelati-a, Hanan, Anai-a,
23 Hoshe-a, Hanani-a, Hashup,
24 Halohesha, Pila, Shobek,
25 Rehum, Hashabana, Mase-a,
26 Ahi-a, Hanan, Anan,
27 Maluk, Harim eq Bana pé nghut akô.
28 Myìt gyó tô é shiwa byù nghut é, hkyangjông pé, Lewiq byu pé, hkum zúng bang, mahkôn sê hkôn bang, noqkuq yhûm mâ é duìnhâng zoshâng wui, haû Garai Gasâng é târâ lé cháng râ ga, haú mau má nyi é yhûmkyo byù myû pê chyáng mai yhûmsing gùng yhûmsîng gam hkoq yû bê bang bànshoq eq, sê gyo myìt bo é yhángmòq é yhûmsîng myhî pé eq yhángmòq é yùqzo byìzo pé bànshoq bang gi, 29 yhángmòq é gu-mang Isira-elaq byu pé mâ é xânghpoq nge wó bang eq rahá chôm myìt hui luî, Garai Gasâng é duìnhâng zoshâng Mosheq é lòq dông byî tô é Garai Gasâng é Târâ lé cháng râ ga le, ngá-nhûng é Yhûmsîng, haû Yhûmsîng Garaî é hkunmó pé, cháng ra târâ pé eq târâ wâng hkunmó bànshoq lé rago châng kut nyî râ ga le, dâkam yù akô nghut ri.
30 Haû mù, ngá-mòq gi, shí mau má nyi é maigan byu pé lé, ngá-mòq é byìzô pé lé a byi tsô é htoq agó, yhángmòq é byìzô pé lé le, ngá-mòq é yhang zo yùqzô pé eq le, a yù byi râ matú danghtum htûm tô lhê.
31 Hau mau má nyi é maigan byu pé, Bánno Buìnyì má, wuìloq zèhkoq nghut nghut, ung râ gùqzò muilhum nghut nghut yu lé lô kô é hkûn, ngá-mòq gi, haú pé lé, Bánno Buìnyì má le, gótû chyoiyúng buìnyì hkangmó má le wuì byi râ a nghut. Ngá-mòq gi, nyhit zân nghû râ zàn jé hkangmó, yò pé lé hâm to râ nghut é htoq agó, hai chyîn xau chyîn myí lé le a bùt lo râ nghut lhê.
32 Hau htoq agó, ngá-mòq gi, ngá-nhûng é Garai Gasâng é yhûm má dójaú râ matú, zàn wuì ngùn ramû byi râ nghû, hkyô tô é hkunmó lé châng râ matú wò yu tô é nghut lhê. 33 Haû gi, mùkgyàp htoq má hen tô râ mùk é matú le, ayang sôdûn nyi é gùqzò hkungga pé eq myi nyhé hkungga pê é matú le, Bánno Buìnyì mâ é chyûnghuq hkungga pê é matú le, Lhôxan Lhôsik poî pé eq masàt tô é poî pê é matú le, chyoiyúng hkungga pê é matú le, Isira-elaq byu pê é matú mara hkô htaí hkungga kut râ nghut é mara hkyut hkungga pê é matú le, ngá-nhûng é Garai Gasâng é yhûm mâ é múzó bànshoq matú le nghut lhê.
34 Hkyangjông pé, Lewiq byu pé eq shiwa byu pé ngá-mòq gi, târâ má kâ tô é eq rajung za, ngá-nhûng é Garai Gasang nghut é Yhûmsîng Garaî é hkungga gyàp htoq má, myi nyhé hkungga sôdun râ matú, râ é htang pé lé, zàn wuì masàt tô é ahkyíng lé, ngá-nhûng é Garai Gasâng é yhûm má, yhûmhtu hkangmó hkâ-nhám yu lé râ nghut é lé, hkyîn shosé she to bê nghut lhê.
35 Ngá-mòq gi, zàn wuì, sânghi myhîng é kyôshi myuishi eq shigâm hkangmó mâ é shi-mún pé lé, haû Yhûmsîng Garaî é yhûm má yu ê râ matú le wò yu tô é nghut lhê.
36 Ngá-mòq gi, Târâ má kâ tô é eq rajung za, ngá-mòq é sânghi hku é yùqzô pé lé le, sânghi shuî é no myang, bainám pé eq sau pé lé le, ngá-nhûng é Garai Gasâng é yhûm má dójaú nyi é hkyangjông pê chyáng yu ê râ nghut lhê.
37 Hau htoq agó, ngá-mòq gi, ngá-mòq é maumyî mai htoq é sânghi luí é mún, gùqzò hkungga pé, shigâm bànshoq mâ é shi pé, tsibyiq wing asik eq tsanlun xû pé lé, ngá-nhûng é Garai Gasâng é yhûm chyî pé mâ é hkyangjông pê chyáng yu ê râ nghut lhê. Hau htâng, ngá-mòq gi, yò mai ngá-mòq zuî htoq é bànshoq mâ é xê gàmbùm ragàmbùm lé Lewiq byu pê chyáng yu ê byi râ nghut lhê; hkâsu mù gâ le, haû Lewiq byu pé gi, wà pé bànshoq má ngá-mòq zuî htoq é mâ é xê gàmbùm ragàmbùm lé gùq yu akô nghut ri. 38 Lewiq byu pé xê gàmbùm ragàmbùm lé gùq yù kô é hkûn, haû Arun mai nyi gyó lo é hkyangjông pé gi, Lewiq byu pé eq rahá bo gùq lòm râ dùt lhê. Dum, Lewiq byu pé gi, yhángmòq wó gùq yu é xê gàmbùm mâ é ragàmbùm lé, ngá-nhûng é Garai Gasâng é yhûm mâ é sùtzè kat é chyî má lé kat ra râ nghut lhê. 39 Isira-elaq byu pé gi, Lewiq byu pé eq rahá kut luî, yhángmòq é kat é gùqzò muilhum, tsibyiq wing asik eq tsanlun xû pé lé, sân-yúng jowò mâ é matú le, dójaú nyi é hkyangjông pê é matú le, hkum zúng é bang eq mahkôn hkôn bâng é matú le, zèhkoq pé tô tô é jang nghut é chyî pé má yu ê kôrâ nghut lhê.
“Ngá-mòq gi, ngá-nhûng é Garai Gasâng é yhûm lé tô pyâm to râ a nghut.” ga taî akô nghut ri.