Isira-elaq Byu Pé Mara Yín Yu É Hkyô
9
Haú hkyap í xe myi nyí nyí má, Isira-elaq byu pé gi, chôm zùp zing kôluî, zoshuq tûm lhê, jimê tû wùt lhê, yhángmòq é ulhum htoq má hpuílup kyaq gyûn lhê kut bum akô nghut ri. 2 Isira-elaq byu pê é awùt ashín pé gi, tûngbaù pé bànshoq bang eq gótû san kut yû kômù, yhûmsing é jowò má yàp to kôluî, yhûmsing é yubàk mara lé le, yhángmòq é îchyí îwâ pê é yubàk mara lé le yín yu akô nghut ri. 3 Yhángmòq gi, yhûmsîng nyi tô é jowò má jâng yàp kômù, nyí myi hkyuí mâ é rahkyuí gû lé, yhángmòq é Garai Gasang nghut é Yhûmsîng Garaî é Târâ laiká Bùk mâ é laiká lé nghap kôluî, gótû rahkyuí má gi, yubàk mara yín yû kômù, yhángmòq é Garai Gasang, haû Yhûmsîng Garai lé noqkuq dójaú bum akô nghut ri. 4 Yeshu-a, Bani, Katmi-ela, Shebani-a, Buni, Sherebi-a, Bani eq Hkenani pé gi, Lewiq byu pê é zùmhtâng má yàp kômù, yhángmòq é Garai Gasang nghut é Yhûmsîng Garai lé, htê mó èq wùt garû ngau akô nghut ri. 5 Hau htâng, Lewiq byu pé nghut é Yeshu-a, Katmi-ela, Bani, Hashabanei-a, Sherebi-a, Hodi-a, Shebani-a eq Pehtahi-a pé gi, “Toq mù, pyàt dedu ahtum abyùq ru gîng nyì Sû, núngmòq é Garai Gasang nghut é Yhûmsîng Garai lé hkya-on keq.Jeju eq hkya-on hkyô bànshoq htoq má shigyaú gíng é, Náng é hpungwup myìng gi, hkungsô wó nyî sháng gàq ô.
Yubàk Mara Yín Yu É Kyûdung Dang
6 Nàng za, Yhûmsîng Garai nghut ri ô! Nàng gi, mauhkûng pé eq myhang htáng htûm é mauhkûng pé lé le, haú pé bànshoq mâ é ajùm ayò pé lé le, myìdàm htoq eq haû mâ é lhúnglháng lé le, wuimau pé eq haû pé mâ é lhúnglháng lé le, hpan to luî, haû jung hkang jung mó lé kângsoq kat byî ri. Mauhkûng mâ é ajùm ayò gi, Nang lé noqkuq dójaú bum akô nghut ri.
7 Nàng gi, Abram lé hkyin yù luî, Hkalade mau, Ura wà mai yhang lé shuî htoq lô mù, Abraham ga myìng myhíng byi Sû, haû Yhûmsîng Garai Gasang nghut ri. 8 Nàng gi, yhang, Nang lé jujúm é myìt bo é lé myàng mù, yhâng é awùt ashîn pé lé, Hkanan byù, Hiti byù, Amori byù, Perizi byù, Yebusi byù eq Girigashi byu pê é mau byi râ ga, yhang eq dangshikaq tô ri. Nàng gi, díngmán Sû nghut é yánmai, Nàng danghtum htûm tô é lé lhoqdìk bê nghut ri.
9 Nàng gi, ngá-mòq é îchyí îwâ pé, Egutuq ming má hpuzô nyi é hkyô lé myàng byi mù, Nhông Nè yàm má, yhángmòq wùt ngau é htê lé gyo byi bê nghut ri. 10 Hpara-uq le, yhâng é zaugun sûwún wuî eq yhâng é mau mâ é shiwa byu pé bànshoq bang gi, ngá-mòq é îchyí îwâ pé lé, nghutbûn é myìt mai zìk zô nyì kô é lé Nàng sê é yánmai, Nàng gi, yhángmòq é hí má maúhpo alhô agàn pé eq maúhpo múzó pé lé tûn shit bê nghut luî, Náng é myìng gi, hkû-nyí jé shoq hû nyì bê nghut ri. 11 Nàng gi, ngá-mòq é îchyí îwâ pé, wuimau lé kyuq huî é myigùng htoq mai wó laî byìt kó sháng gàq ga, wuimau haú lé í hkyam byáng gam hkoq byî ri. Nghut kôlhang, Nàng gi, wuìnhông mó má lùqgòk myùp wang byùq é su, yhángmòq lé châng hkat é bang lé, nìk é jang má myùp byùq nhâng bê nghut ri. 12 Hau htoq agó, Nàng gi, ngá-mòq é îchyí îwâ pé lé, nyí lé, mhuthtui zìng lé hkyô hí nhâng mù, myín lé, yhángmòq, myòq wó myâng râ matú myi zîng mó lé hkyô hí nhang ri.
13 Nàng gi, Sinaq Bùm htoq má gyó lo ri; Nàng gi, mauhkûng mai yhángmòq lé dáng nyo ri. Nàng gi, yhángmòq lé, tengmán é eq târâ ràp-rá hkyô byî é târâ pé eq cháng ra târâ pé lé le, ge é hkunmó pé eq târâ wàng hkunmó pé lé le byi bê nghut ri. 14 Nàng gi, yhángmòq lé, Náng é chyoiyúng Bánno Buìnyì lé sé nhâng mù, Náng é duìnhâng zoshâng Mosheq dông mai, hkunmó pé, cháng ra sângdang pé eq târâ pé lé byî to bê nghut ri. 15 Nàng gi, yhángmòq zò-mut jáng, mauhkûng mai mùk hkyó byi mù, yhángmòq wuìshit jáng, lungmó zîng mai wuì lhoqhtoq byî ri. Nàng gi, yhángmòq lé byi râ ga Nàng danghtum htûm tô é mau lé, yhángmòq wang sing yù râ matú taî ri.
16 Nghut kôlhang, ngá-mòq é îchyí îwâ pé gi, nghutbûn lò kômù, myìt htan byùq kôluî, Náng é hkunmó pé lé a cháng kó nghut ri. 17 Yhángmòq gi, jì-no a kâm gyo kô é htoq agó, yhángmòq chyáng Nàng tûn shit é maúhpo alhô agàn pé lé a bûn byùq lo kó nghut ri. Yhángmòq gi, i-myìt htan byùq kômù, gumlau toq é má, yhángmòq jùn kut laî lo é mau shut dum shuî taû ló râ matú, ushuq rayùq lé hkyin akô nghut ri. Nghut kôlhang, Nàng gi, mara hkyut pyám byî nyi é Garai Gasang, jeju eq shogyo nhikmyin myìt byíng luî, luì za nhikjum a yô é za, chyitdàp myìt byíng zan tô é Sû nghut ri. Haû mù, Nàng gi, yhángmòq lé a tô pyâm to é nghut ri; 18 hau htoq agó, yhángmòq gi, nojûng zo azòng ralhum saí kômù, ‘Shî gi, nang lé Egutuq ming mai shuî htoq lô sû, náng é garai nghut ri.’ ga taî bum kôlhang, yhángmòq gi, Garai lé rhoî dang gyai yhang taî pyám kôlhang, 19 Nàng gi, Náng é shogyo nhikmyin myìt mó é yánmai, yhángmòq lé yòso má a tô pyâm to nghut ri. Nyí lé, yhángmòq é hkyôwuì lé shuî-u byi râ matú, mhuthtui zìng lé a byùq ló nhang é htoq agó, myín lé le, yhángmòq e ló é hkyô má dùq bó byi râ matú, myi zîng lé a shum byùq ló nhâng nghut ri. 20 Nàng gi, yhángmòq lé mhoq shit râ matú, Náng é ge é Sô byî ri. Nàng gi, yhángmòq lé mannaq mùk byî nyi é lé a nô pyâm é htoq agó, yhángmòq wuìshit kôjáng, wuì byi huq ri. 21 Nàng gi, yhángmòq lé, yòso má myi xê zàn yhang hku baú nyi é nghut luî, yhángmòq gi, haî le a langhpyùt kó nghut ri; yhángmòq é mèbu le a jèq byùq é htoq agó, yhángmòq é hkyî pé le a wam kó nghut ri.
22 Nàng gi, mîngdán pé eq byù myû wuì lé, yhángmòq é lòq má àp byi mù, maukyo pé lé lháng tsing gàm byi bê nghut ri. Yhángmòq gi, Heshibon hkóhkâm Sihon é mîngdán lé le, Bashan hkóhkâm Oga é mîngdán lé le sing yù bekô nghut ri. 23 Nàng gi, yhángmòq é zodù wuì lé, mauhkûng mâ é kyî pé myhó lhoqmyo byi mù, wang sing yù râ matú, yhángmòq é îchyí îwâ pé lé Nàng taî tô é maumyî má, yhángmòq lé shuî lò bê nghut ri. 24 Yhángmòq é zodù wuì gi, maumyî haú lé wang sing yù bekô nghut ri. Nàng gi, yhángmòq é hí má, haû mau má nyi é Hkanan byu pé lé ung pyám luî, haú mau mâ é shiwa byu pé eq haú bâng é hkóhkâm pé le nghut é Hkanan byu pé lé, yhángmòq kut nau é su kut kôrâ matú, yhángmòq é lòq má àp byi bê nghut ri. 25 Yhángmòq gi, gingtîng é wà mó pé eq myìhpún bo é maumyî lé le, ge é sùtzè a-myû myû byíng tô é yhûm pé, dû to gû wuìhtung pé, tsibyiq hkyâm pé, tsanlun hkyâm pé eq shi gâm myo myo lé sing yù bekô. Yhángmòq gi, gyi gyi dau dau zo kômù, xu myum tô bùm bekô. Yhángmòq gi, Náng é jeju mó má gabú nguì ngón nyi bum akô nghut ri.
26 Nghut kôlhang, yhángmòq gi, jì-no a gyo mù, Nang lé htuqhtîng gumlau toq bekô nghut ri; yhángmòq gi, Náng é târâ lé le, nùnghtáng tô pyám kômù, Náng chyáng dum taû lò râ matú, yhángmòq lé lhoqpun lhoqkyîng é Náng é myìqhtoi pé lé le, sat pyâm akô nghut ri. Yhángmòq gi, Garai lé rhoî dang gyai yhang taî pyám bekô nghut ri. 27 Haû mù, Nàng gi, yhángmòq lé zìk zô é gye pê é lòq má, àp pyâm ri. Nghut kôlhang, yhángmòq gi, zìk zo huî é u, Nang lé wùt garu kôjáng, Nàng gi, mauhkûng htoq tsáng myhâng mai yhángmòq lé gyo byî ri. Náng é shogyo nhik myin mó é yánmai, yhángmòq lé, yhángmòq é gyè pê é lòq mai hkyi xe yù râ ushuq pé lé nhâng byî ri.
28 Nghut kôlhang, nguì ngón hkyô wó yu é htâng a myáng má, yhángmòq gi, Náng é hí má, agè ashop hkyô dum kut shut bekô nghut ri. Haû mù, Nàng gi, yhángmòq é ahtoq má, gyè pé up nyì râ matú, yhángmòq é gyè pê é lòq má àp pyâm ri. Hau htâng, yhángmòq, Nang lé dum wùt garu kôjáng, Nàng gi, mauhkûng htoq tsáng myhâng mai, yhángmòq lé wó gyo byi luî, Náng é shogyo nhikmyîn é myìt èq, yhángmòq lé adàm dàm hkyi xe yù bê nghut ri.
29 Nàng gi, Náng é târâ má, dum lhing lò râ matú, yhángmòq lé lhoqpun lhoqkying bê: nghut kôlhang, yhángmòq gi, nghut bûn lò kômù, Náng é hkunmó pé lé, a gyo kut akô nghut ri. Yhángmòq gi, ‘Târâ pé lé cháng sû gi, chyungxe duì râ nghut lhê.’ gâ é Náng é pyîng dang pé lé shut bekô nghut ri. Yhángmòq gi, myòqwáng ngewáng, i-myìt htan lò kômù, jì-no gyo râ lé he-ngìk pyâm akô nghut ri. 30 Nàng gi, zànwut myáng myáng, yhángmòq lé myìt hîng chín byi bê nghut ri. Nàng gi, myìqhtoî pé dông, yhángmòq lé Náng é So èq lhoqpun lhoqkying kôlhang, yhángmòq a gyo byi kó nghut ri. Haû mù, Nàng gi, yhángmòq lé, haú mau má nyi é gótû byu pê é lòq má, àp pyâm ri. 31 Nghut kôlhang, Nàng gi, jeju eq shogyo nhikmyin myìt bò sû, Garai Gasang nghut é yánmai, Náng é shogyo chyitdàp myìt mó èq yhángmòq lé a lhoqhtên pyám é nghut ri.
32 Haû mù, Yhâng é chyit myìt dangshikaq lé lhoqbyíng jùp Sû, hpúng bo é Garai Gasang, a-tsam dìk shoq bo é eq gyùq hkúngga gíng é, ngá-mòq é Garai Gasang ê, Asuri hkóhkam pê é pyàt mai, hkû-nyí jé shoq, ngá-mòq é ahtoq má le, ngá-mòq é hkóhkam pé eq ushuq pé, hkyangjông pé eq myìqhtoi pé, îchyí îwâ pé eq náng é a-myû zo wuî bànshoq é ahtoq má le, haû hui zô nyi é wuîhke jamjau hkyô bànshoq lé, náng é hí má tiq nyi é su a dùt sháng gàq. 33 Ngá-mòq hui zô é hkyô bànshoq má, Nàng kut é hkyô tengmán nyi ri. Ngá-mòq mara kut shut é hkûn le, nàng gi, jujúm é dông kut ri. 34 Ngá-mòq é hkóhkâm pé, ushuq pé, hkyangjông pé eq îchyí îwâ pé gi, Náng é târâ lé a cháng kó nghut ri. Yhángmòq gi, Náng é hkunmó pé eq lhoqpun lhoqkyîng é dang pé lé le, a gyo kó nghut ri. 35 Náng é jeju myìt mó é yánmai, yhángmòq le, Nàng byî tô é mîngdán eq myì xû bò mù, lam dik é maumyî má myang nyi nyì kôle, yhángmòq gi, Nang lé dójaú kô é a nghut; yhûmsing é agè ashop hkyô mai myìt lhing lò kô é a nghut.
36 Wú aq, Nàng, ngá-mòq é îchyí îwâ pé lé byî tô é mau mâ é shi pé eq haú mai htoq é gótû ge é hkyô pé lé, myàng zo myàng shuq kôlhang, hkû-nyí ngá-mòq, jùn dut nyi lhê. 37 Ngá-mòq é yubàk marâ é yánmai, hau mau mâ é agùn agó wó é gùqzò muilhum pé gi, ngá-mòq ahtoq má Nàng ùp nhang é hkóhkâm pê é matú dùt byùq ri. Haû hkóhkâm pé gi, ngá-mòq é gùngdu pé eq shigu gaunyhaû pé lé le, yhángmòq o é su kut kômù, ngá-mòq gi, yón mó huî nyi bùm bê nghut lhê.
Shiwa Byu Pé Myìt Huî É Hkyô
38 Haú hkyô bànshoq lé myìt tû wú luî, ngá-mòq gi, wó lûm gíng é danghtum htûm to laiká chôm kâ to bê. Ngá-mòq é ushuq pé, Lewiq byu pé eq hkyangjông pé gi, haû laiká má, yhángmòq é dizìk htûng tap tô bum akô nghut ri.” ga taî bum akô nghut ri.