8
Shiwa byù lhúnglhâng bang gi, i-myìt rahkat zâ èq, Wuì Hkum hí mâ é lam é jowò má lé zùp zîng bum akô. Yhángmòq gi, Isira-elaq byu pê é matú, Yhûmsîng Garaî èq hkunmó hkyô tô é, Mosheq é târâ laiká bùk lé yu htoq lô râ matú, târâ sará Ezira lé taî akô nghut ri.
2 Haû mù, hkyangjong Ezira gi, lha-mó nyhit hkyap hkyap, lhôxân nyí má, myiwe yùqgè wuì eq ge sê gyô yù râ nghut é bànshoq bang zùp zîng tô é hí má, Târâ laiká haú lé yu htoq lé ri. 3 Hau htâng, yhang gi, Wuì Hkum hí mâ é lam é jowò má yàp tô é, myiwe yùqgè wuì eq gótû ge sê gyo bâng é hí má, nàpsûn maubó é mai nyí-káng jé shoq, târâ laiká haú lé htê mó eq nghap kyô ri. Shiwa byù bànshoq bang gi, Târâ laiká Bùk haû nghap kyô é lé myìt lòm tung gyô bum akô nghut ri.
4 Târâ sará Ezira gi, haú u lhê é matú sik èq saî tô é gyam myhâng htoq má yàp tô ri. Matahti‑aq, Shema, Anai-a, Uri-a, Hiliki-a eq Mase-a pé gi, yhâng é lòqyò hkyam má, yàp tô bum akô; Pedai-a, Misha-ela, Malikiya, Hashum, Hashabadana, Zehkariq eq Meshulam pé gi, yhâng é lòqpaî hkyam má yàp tô bum akô nghut ri.
5 Ezira gi, yhángmòq htoq myhang é gyàp htoq má yàp tô lhê nghut é yánmai, shiwa byù bànshoq bang gi, yhang lé wó myang akô. Yhang gi, haû Târâ laiká Bùk lé hpông kat é hkûn, shiwa byù bànshoq bang gi, toq yàp akô nghut ri. 6 Ezira gi, hkìkhkâm kô myhang é Garai Gasang, haû Yhûmsîng Garai lé hkya-ôn ri. Haú hkûn, shiwa byù bànshoq bang gi, yhángmòq é lòq tu toq mù, “Amen! Amen!” ga tû taî akô. Hau htâng, yhángmòq gi, hkyî hput htuq mù, yhángmòq é myòqdong lé myigùng jé shoq ngóm gòp luî, haû Yhûmsîng Garai lé noqkuq bum akô nghut ri.
7 Lewiq byu pé nghut é Yeshu-a, Bani, Sherebi-a, Yamin, Akup, Shabehtai, Hodi-a, Mase-a, Kalita, Azari-a, Yozabat, Hanan eq Pelai-a pé gi, haû shiwa byu pé yàp tô bùm kô é u, yhángmòq lé, haû Târâ pê é dang lichyúm mhoq kyô akô nghut ri. 8 Yhángmòq gi, Garai Gasâng é Târâ laiká Bùk lé hkyâng hkyâng nghap kômù, dang lichyúm lé taî sân kyo kô é yánmai, shiwa byu pé gi, nghap kyô é pé lé sê gyô bum akô nghut ri.
9 Shiwa byù bànshoq bang gi, haû Târâ laiká mâ é dang pé lé wó gyô bùm kôjáng, ngaùhkyûng ngaùyang dùt bum akô. Haû mù, ming zau Nehemi-a, târâ sará eq hkyangjong nghut sû Ezira eq, shiwa byu pé lé mhoq kyô é bang Lewiq byu pé gi, “Hkû-nyí gi, núngmòq é Garai Gasang nghut é Yhûmsîng Garaî é matú chyoiyúng é buìnyì nghut lhê. Hkâyón ngau nyi kó.” ga shiwa byù bànshoq bang lé taî akô.
10 Nehemi-a gi, shiwa byu pé lé, “Ló mù, réng é zoshuq lé zo luî, chuî é shuq jung lé shuq keq. A wó hen lajâng é bang lé gàm byi keq. Hkû-nyí gi, ngá-nhûng é Yhûmsîng Garaî é chyoiyúng buìnyì nghut lhê. Hkâyón kó; hkâsu mù gâ le, Yhûmsîng Garai chyáng mâ é gabú hkyô gi, núngmòq é wum-o nghut lhê.” ga taî ri.
11 Lewiq byu pé gi, shiwa byù bànshoq bang lé, “Hkû-nyí gi, chyoiyúng é buìnyì nghut é yánmai, zim za nyì keq. Hkâyón kó.” ga lhoqzîm pyâm akô nghut ri.
12 Hau htâng, shiwa byù bànshoq bang gi, yhángmòq lé mhoq kyô é dang pé lé dàt gyô yù kô é yánmai, zo râ shuq râ matú le, góbang lé gàm byi râ matú le, gyai nguì ngón shoq poî kut râ matú le, ló byùq bekô nghut ri.
Nghêhkaû Zúm Poî
13 Haú hkyap lhôxan í nyí nyí má, yhûmhtu hkangmó lé shuî-û é bang eq rahá, hkyangjông pé eq Lewiq byu pé gi, Târâ laiká mâ é dang pé lé rago sê gyô yù râ matú, târâ sará Ezira é awui ayàm má lé zîng nyi bum akô nghut ri. 14 Yhángmòq gi, lha-mó nyhit hkyap hkyap mâ é poî u lé, Isira-elaq byu pé, zúm pé má byam nyi yù râ matú, Mosheq dông mai haû Yhûmsîng Garai hkunmó hkyô tô é lé, Târâ laiká má kâ tô é myang akô nghut ri. 15 Haû mù, yhángmòq gi, “Byam nghêhkaû râ zúm saí râ matú, bum mau shut htoq ê mù, tsanlun akoq, yòsô tsanlun akoq, muritu akoq, byùm akoq pé eq gótû sikkoq pé lé ê hkyuî wàq lô keq.” ga Târâ laiká má kâ tô é eq rajung za, dang haú pé lé, Yerusalem wà mó eq ó le ô é wà pé má taî pyô bekô nghut ri.
16 Haû mù, shiwa byu pé gi, htoq ê kôluî, sik koq pé ê hkyuî wàq lò kômù, byam nyì râ nghêhkaû zúm lé, yhángmòq é yhûmhkûng htoq pé má le, yhûmwàng pé má le, Garai Gasang é yhûmwàng hkaû pé má le, Wuì Hkum hí mâ é lam é jowò má le, Ehprim Hkum nâm mâ é lam é jowò má le, saí bekô nghut ri. 17 Shúm zung é mai dum taû lo é byù lhúnglhâng bang gi, byam nyì râ zúm pé saí kômù, haú pé má nyi akô. Nun é yhang zo Yoshuq é i-pyàt mai haú nyí jé shoq, Isira-elaq byu pé gi, haû sû poî a kut wú kó. Haû mù, yhángmòq gi, gabú byam chyu hkyô mó dùt bekô nghut ri.
18 Ezira gi, poî kut é sânghî nyí mai, ló htâng é nyí jé shoq nyí wuî, Garai Gasâng é Târâ laiká Bùk lé nghap kyô ri. Yhángmòq gi, poî haú lé nyhit nyí yhang kut kômù, shit nyí nghû râ nyí má, cháng ra târâ eq rajung za, poî htâng sat hpong kut akô nghut ri.