Lewiq Byu Pé
23
Dawiq gi, mang luî u hpyû zuì ne byùq é hkûn, yhang zo Sholumon lé Isira-elaq byu pê é hkóhkâm kut nhâng bê nghut ri.2 Hau htoq agó, yhang gi, Isira-elaq byu pê é ushuq pé bànshoq lé le, hkyangjông pé eq Lewiq byu pé lé le, ji tsîng tô ri. 3 Lewiq byu pé mâ é chyungxe zànwut sum xê zàn mai ahtoq gû lé le nghap lhôm é nghut mù, yùqgè wuì bànshoq byù du sûm mûn shit hkyîng yùq bo ri. 4 Haú hkûn, Dawiq gi, “Byù shí bang mâ é í mûn myi hkyîng yùq gi, haû Yhûmsîng Garaî é noqkuq yhûm mâ é múzó lé wú gôn é bang kut ra râ nghut mù, hkyuq hkyîng yùq gi, zaugun wuì eq târâ agyi pé kut ra kôrâ nghut lhê. 5 Myi hkyîng yùq gi, hkum zúng bang kut ra râ nghut mù, myi hkyîng yùq gi, ngò saî tô é mùt jung bàt jûng èq haû Yhûmsîng Garai lé hkya-on ra râ nghut lhê.” ga taî ri.
6 Dawiq gi, Lewiq byu pé lé, Lewiq é yhang zo yùqzô pé Gerishon, Kohat eq Merari a-myû koq pé má cháng luî, byù hpúng gam hkoq tô ri.
Gerishon Koq Bang
7 Gerishon koq bang gi, yhang zo Ladana eq Shimi nhiktâng; 8 Ladan é yhang zo yùqzô pé gi, zo-mún Yehi-ela, Zehtam eq Yo-ela pé sum yuq nghut akô. 9 Shimi góyùq é yhang zo yùqzô pé gi, Shelomot, Hazi-ela eq Haran pé sum yuq nghut akô. Shí bang gi, Ladan é yhûmhtu pê é ushuq pé nghut akô. 10 Shimi é yhang zo yùqzô pé gi, Yahat, Ziza, Ye-usha eq Beri-a pé nghut akô. Shí bang myi yuq gi, Shimi é yhang zô pé nghut akô. 11 Yahat gi, zo-mún nghut mù, Ziza gi, lanóng yùq nghut ri; nghut kôlhang, Ye-usha eq Beri-a nhiktâng gi, zoshâng myo myo a wó kô é yánmai, yhûmhtu ralhum dông són byî é nghut ri.
Kohat Koq Bang
12 Kohat é yhang zo yùqzô pé gi, Amram, Izihara, Hebron eq Uzi-ela pé myi yuq nghut akô. 13 Amram é yhang zo yùqzô nhik gi, Arun eq Mosheq nhiktâng nghut ri. Arun eq yhâng é awùt ashín pé gi, chyoiyúng htâng é zè pé lé àp nhông byi râ matú le, Yhûmsîng Garaî é hí má hkungga pé nhông byi râ matú le, Yhâng é hí má dójaú nyì mù, ahtum abyùq Yhâng é myìng mai shimân dang taí râ matú le, gótû kut ahtum abyùq hkyin to huî é bang nghut akô. 14 Garai Gasâng é byù Mosheq é yhang zo yùqzô pé lé gi, Lewiq up má nghap lhôm akô nghut ri. 15 Mosheq é yhang zo yùqzô nhik gi, Gerishom eq Eli-ezera nhiktâng nghut akô. 16 Gerishom é awùt ashín pé má, Shebu-ela gi, yùqzo zo-mún nghut ri. 17 Eli-ezera é awùt ashín pé má, Rehabi-a gi, yùqzo zo-mún nghut ri. Eli-ezera gi, gótû yùqzo a wó lo nghut ri; nghut kôlhang, Rehabi-a yhang zô pé gi, ajùm ayò yhang nghut ri.
18 Izihara é yhang zo yùqzô pé má, Shelomit gi, yùqzo zo-mún nghut ri. 19 Hebron é yhang zo yùqzô pé gi, yùqzo lagám Yeri-a, yùqzo lanóng Amari-a, yùqzo lalaq Yahazi-ela eq yùqzo latû Yekame-am pé nghut akô. 20 Uzi-ela é yhang zo yùqzô nhik gi, yùqzo zo-mún Mihka eq yùqzo lanóng Ishi-a nhiktâng nghut akô.
Merari Koq Bang
21 Merari é yhang zo yùqzô nhik gi, Mali eq Mushi nhiktâng nghut akô. Mali é yhang zo yùqzô nhik gi, Ele-aza eq Kisha nhiktâng nghut akô. 22 Ele-aza gi, yùqzo a wó, byìzô pé za wó mù, shi byùq ri. Kisha é yhang zô pé, yhángmòq é mùngzô pé gi, yhángmòq lé yu akô nghut ri. 23 Mushi é yhang zo yùqzô pé gi, Mali, Edera eq Yeremot pé sum yuq nghut akô.
24 Shí bang gi, chyungxe zànwut í xê zàn mai ahtoq mâ é bang nghut luî, haû Yhûmsîng Garaî é noqkuq yhûm má múzó wùn wàq é, Lewiq é awùt ashín nghut mù, yhángmòq é yhûmhtu pé má cháng luî, myìng du htau mù jihpán gùq lhôm é, yhûmhtu ushuq pé nghut akô. 25 Hkâsu mù gâ le, Dawiq gi, “Isira-elaq é Garai Gasang, haû Yhûmsîng Garai gi, Yhâng é byu pé lé bánno nhâng mù, Yerusalem wà mó má ahtum abyùq lé nyî bê nghut é yánmai, 26 Lewiq byu pé gi, sàksé zúm eq, haû eq sêng é má chung é zè pé haî lé le wàq nó a ra lo nghut ri.” ga taî ri. 27 Dawiq pying tô é ló htâng é dang má cháng luî, í xê zàn lai bê Lewiq byu pê é jihpán gùq yu akô nghut ri.
28 Lewiq byu pê é wò gi, haû Yhûmsîng Garaî é noqkuq yhûm má dójaú é múzó má Arun é awùt ashîn pé lé garúm râ wò nghut mù, Yhûmsîng Garaî é yhûm wàng pé, wàp pé, chyoiyúng zê bànshoq lé lhoq sân-yúng é pé eq Garai Gasâng é yhûm mâ é gótû múzó pé kut râ lé wú gon râ matú nghut lhê. 29 Hau htoq agó, yhángmòq gi, mùkgyàp htoq má mùk tô é mú, gùqzò hkungga byi râ mún, múnchi a bo é mùk, mùk bûng é hkyô, myhik nyhô é hkyô eq chîn lìk wú é hkyô bànshoq lé wú gon râ é nghut lhê. 30 Haû mai lai luî, yhángmòq gi, nàpkyó myínhtâng yàp to mù, haû Yhûmsîng Garai lé jeju bun luî, hkya-on kúngton é hkyô le, 31 Bánno Buìnyì, Lhôxan Lhôsik poî eq masàt tô é poî pé má haû Yhûmsîng Garaî é matú myi nyhé hkungga nhông byi hkangmó, yhángmòq kut râ matú kâ tô é eq rajung za, byù du hkyak kut luî, haû Yhûmsîng Garaî é hí má dójaú râ le, kut râ nghut lhê.
32 Haû mù, Lewiq byu pé gi, haû Yhûmsîng Garaî é noqkuq yhûm má dójaú râ matú, yhángmòq é yhang gu yhang mâng pé nghut é, Arun é awùt ashîn pê é a-ô má, zùphpong zúm eq Chyoiyúng Jowo é wò pé lé wùn wàq akô nghut ri.