22
Haú hkûn, Dawiq gi, “Haû Yhûmsîng Garai Gasâng é yhûm shî má nghut bê; Isira-elaq byu pê é myi nyhé hkungga gyàp le shî má nghut bê.” ga taî ri.Noqkuq Yhûm Saí Râ Matú Hen Lajâng É Hkyô
2 Haû mù, Dawiq gi, Isira-elaq ming má lé bíng nyi tô é bang lé shuî tsîng yù râ matú hkunmó hkyó luî, haû Garai Gasâng é yhûm saí râ matú, haú bang mâ é lùqgòk bàt zo bang lé kyûng yúng é lùqgòk kyûng htoq râ matú wò byî ri. 3 Hau htoq agó, yhang gi, yhûm hkum wà hkum eq dúnlhum pê é matú jòqtoq zu bàt htoq râ matú jòqtoq pé lajang byi mù, a ung chîn é gyi pé lé le lajang byî ri. 4 Hau htoq agó, yhang gi, a ung nghap é kyám gâm sikhtung pé lé le lajang byî ri; hkâsu mù gâ le, Sidon byu pé eq Turuq byu pé gi, Dawiq lé kyám gâm sikhtung myo myo lé byî akô nghut ri.
5 Haû mù, Dawiq gi, “Ngá zo Sholumon gi, chyungxe zànwut tiq ashî nghut mù, haî le mhoq yû râ ashî; haû Yhûmsîng Garaî é matú saí râ yhûm gi, byù myû bànshoq bâng é hí má, gyai yhang hkìkhkâm luî, hpung bô myìng hu râ nghut é yánmai, hau é matú ngò hen lajâng to râ nghut lhê.” ga taî ri. Haû mù, Dawiq gi, yhang a shî shi-má chûng râ é zè myo myo hen lajâng to bê nghut ri.
6 Haú hkûn, Dawiq gi, yhang zo Sholumon lé wùt yù mù, Isira-elaq é Garai Gasang, haû Yhûmsîng Garaî é matú yhûm saí râ wò byi bê nghut ri. 7 Yhang gi, Sholumon lé, “Ngá zo ê, ngò gi, ngá é Garai Gasang nghut é, haû Yhûmsîng Garaî é Mying é matú yhûm saí râ myìt bo nyi é nghut lhê. 8 Nghut kôlhang, haû Yhûmsîng Garaî chyáng mai, ‘Nàng gi, byù sui myo myo lhoqshun pyâm é htoq agó, majan le myo myo zan bê nghut lhê; nàng gi, Ngá é myòq hí myìdàm htoq má byù sui myo myo lhoqshun pyám bê nghut é yánmai, Ngá Mying é matú yhûm saí râ sû a nghut. 9 Nghut kôlhang, nàng gi, yùqzo rayùq wó râ nghut mù, yhang gi, nguì ngón bánnô é byù dùt râ nghut luî, yhâng é lhînghkyùq mâ é yhâng é gyè pé bànshoq mai, Ngò, yhang lé bánno nhâng râ nghut lhê. Yhâng é myìng gi, Sholumon ga râ nghut mù, Ngò gi, yhang ùp nyi é u, Isira-elaq byu pé lé nguì ngón é eq bánno nhâng râ nghut lhê. 10 Yhang gi, Ngá Mying é matú yhûm saí râ sû nghut lhê; yhang gi, Ngá zo dùt râ nghut mù, Ngò gi, yhâng wa dùt râ nghut lhê. Ngò gi, Isira-elaq mîngdán é ahtoq má yhâng é hkóhkâm tángmyhâng lé ahtum abyùq lhoq gingtîng to râ nghut lhê.’ gâ é dang ngá chyáng jé ri.
11 Haû mù, ngá zo ê, haû Yhûmsîng Garai gi, nàng eq rahá nghut nyî sháng gàq; nàng kut râ nghut lhê ga Yhang taî é eq rajung za, nàng gi, wó ûngmyuq luî, náng é Garai Gasang nghut é, haû Yhûmsîng Garaî é yhûm lé saí aq. 12 Haû Yhûmsîng Garai gi, nang lé, náng é Garai Gasang nghut é, haû Yhûmsîng Garaî é târâ lé wó cháng shoq, hpàqchyî byéng-yá eq sê gyô é u-nuq byi mù, Isira-elaq byu pé lé ùp râ wò byi sháng gàq. 13 Nàng gi, Isira-elaq byu pê é matú Mosheq lé haû Yhûmsîng Garai byî tô é târâ wàng hkunmó pé eq târâ pé lé rago châng é nghut jáng, ûngmyuq hkyô wó râ nghut lhê. Wum-o lhoqkíng luî, myìt wum lhoqhtan to aq. Hkâgyùq kyûm, myìt wum le hkâgyui.
14 Ngò gi, wuîhke jamjau mó hui luî, haû Yhûmsîng Garaî é noqkuq yhum é matú, hîng raxe rasen joí kô, ngùnhtung rasho raxê sen joí kô, a ung chín loshoq é gyi agyíng eq jòqtoq agyíng, sik pé eq lùqgòk pé lé hen to byi bê nghut lhê. Nàng gi, haú pé má kat jàt shi aq. 15 Nàng gi, lùqgòk bàt zo bang, tso-nyhaq mú zui bang, làksima pé eq, 16 hîng, ngùn, gyi eq jòqtoq lòqmú ajung jung kûng é byu pé nghut é, mú zui bang myo myo wó bê nghut mù, ahkuî, múzó hî lo aq; haû Yhûmsîng Garai gi, nàng eq rahá nghut nyî sháng gàq.” ga taî ri.
17 Hau htâng, Dawiq gi, yhang zo Sholumon lé garúm yû râ matú, Isira-elaq byu pê é ushuq pé bànshoq lé hkunmó hkyô tô ri. 18 Haû mù, yhang gi, yhángmòq lé, “Núngmòq é Garai Gasang nghut é, haû Yhûmsîng Garai gi, núngmòq eq rahá nghut lhê, a nghut kó lhú? Yhang gi, núngmòq lé jowò hkangmó má bánno nhâng bê, a nghut kó lhú? Hkâsu mù gâ le, Yhang gi, shí mau má nyi é bang lé ngá é lòq má àp byi bê nghut mù, shí mau gi, haû Yhûmsîng Garaî é lòqhkaû má le, Yhâng é byu pê é lòqhkaû má le, jòq to bê nghut ri. 19 Ahkuî, núngmòq gi, núngmòq é Garai Gasang nghut é, haû Yhûmsîng Garai lé hô râ matú, núngmòq é i-myìt eq myìt sô lé àp nhông keq. Haû Yhûmsîng Garaî é Mying é matú saí râ nghut é noqkuq yhûm má, Garai Gasang eq sêng é chyoiyúng zèhkoq pé eq haû Yhûmsîng Garaî é dangshikaq sàksé dò lé, núngmòq wó wàq wàng kó sháng gàq, haû Yhûmsîng Garaî Gasâng é sân-yúng yhûm lé saí lo keq.” ga taî ri.