Dawiq Myìng Jihpán Gùq Yu É Hkyô
21
Tsádán gi, Isira-elaq byu pé lé htuqhtíng luî, Isira-elaq byu pê é jihpán gùq râ matú, Dawiq lé myìt nhaû toq byî ri. 2 Haû mù, Dawiq gi, Yo-ap eq gyè hpúng pê é gyèzau wuì lé, “Ê mù, Berasheba mai Dan jé shoq Isira-elaq byu pê é jihpán ê gùq keq. Haû mù, yhángmòq hkâ-myhó myô é lé ngò wó sé râ matú, ngo lé lo taî kyo keq.” ga taî ri.3 Nghut kôlhang, Yo-ap gi, “Haû Yhûmsîng Garai gi, Yhâng é byu pé lé shô tú lhoqmyo byi sháng gàq. Ngá é yhûmsîng hkóhkâm ê, yhángmòq bànshoq gi, nang lé dójaú é bang chyat a nghut lhí? Ngá é yhûmsîng nàng gi, haî mù haú dông kut nau lhê lhú? Haî mù Isira-elaq byu pê chyáng mara shuî she hâng yu lhê lhú?” ga tû taî ri.
4 Nghut kôlhang, hkóhkam é dang gi, Yo-ap lé zìk ung pyâm ri; haû mù, Yo-ap gi, hau mai htoq luî, Isira-elaq ming gón ê sô jàm mù, Yerusalem wà mó má dum taû lò bê nghut ri. 5 Yo-ap gi, Dawiq lé gyè wó zan bê byù jihpán lo shit ri; Isira-elaq a-myû wuì bànshoq má shâm lhâm ge chung é byù raxe rasen bo ri; Yudaq byù má shâm lhâm ge chung é byù myî sên nyhit mun bo ri.
6 Nghut kôlhang, Yo-ap gi, hkóhkam é hkunmó lé gyô chaq luî, Lewiq up eq Ben-yamin up bang lé a nghap lhóm nghut ri. 7 Hkunmó haû gi, Garai Gasâng é myòq hí má le agè ashop é hkyô nghut mù, Yhang gi, Isira-elaq byu pé lé mara dam byi bê nghut ri.
8 Haû mù, Dawiq gi, Garai Gasang lé, “Ngò gi, shí hkyô kut é yánmai, mara gyai yhang shut bê nghut ri. Ahkuî, ngò, Nang lé dûng tôngbán lhê; náng é duìnhâng zôshang é mara lé huî sêng pyám byi laq. Ngò gi, gyai yhang ngha é hkyô kut pyám bê nghut ri.” ga taî ri.
9 Haû Yhûmsîng Garai gi, Dawiq é myìqhtoi Gat lé, 10 “Ê luî, Dawiq lé, ‘Haû Yhûmsîng Garai taî le, “Ngò, nang lé sum hkyô shit bá; nang lé Ngò mara dam byi râ matú, Ngo lé haú mâ é rahkat hkyîn byi aq.” gâ ri.’ nghû ê taî kyo aq.” ga taî ri.
11 Haû mù, Gat gi, Dawiq chyáng ê luî, yhang lé, “Haû Yhûmsîng Garai taî le, ‘Nàng hkyin wú aq; 12 mùtmó gyó é sum zân lùq; a nghut jáng, lha-mó sum hkyap yhang, gyè pé nang lé châng hkat luî, yhángmòq é sham èq lhoqhtên pyâm é hui râ lùq; a nghut jáng, sum nyí yhang shí ming má haû Yhûmsîng Garaî é shâm nghu é wúm gyó luî, haû Yhûmsîng Garaî é maumang lagyô èq Isira-elaq jowò hkangmó má lató hpuq é hui zo râ lùq.’ gâ ri. Haû mù, ngo lé nhang kat sû lé ngò hkâsu nghû ló tû taí râ hkyô, ahkuî myìt hpyit àq.” ga taî ri.
13 Dawiq gi, Gat lé, “Ngò gi, gyai yhang myìt myo ûng wôm nyi ri. Ngo lé, haû Yhûmsîng Garaî é lòq má shèq wàng nhâng àq; hkâsu mù gâ le, Yhâng é shogyo nhikmyin hkyô gi, kô dik é nghut ri; byu pê é lòq má kúm gi, ngo lé hkâwâng nhâng.” ga taî ri.
14 Haû mù, Yhûmsîng Garai gi, Isira-elaq ming má wúm gyó nhang é nghut luî, Isira-elaq byù nyhit mun shi byùq bê nghut ri. 15 Hau htoq agó, Garai Gasang gi, Yerusalem wà mó lé lhoqhten râ matú maumang lagyo rayùq lé nhâng kat ri. Nghut kôlhang, maumang lagyo haû su kut nyi é u, haû Yhûmsîng Garai gi, haú lé myàng luî, jamjau hpu zo hkyô hau é yánmai nùngngham wó luî, byù lé lhoqhtên nyi é maumang lagyo haú lé, “Gé bê! Náng é lòq lé wùp taû yù lo aq.” ga taî ri. Haû Yhûmsîng Garaî é maumang lagyo haû gi, Yebusi byù Araunaa é gùq chyârâng má yàp tô ri.
16 Dawiq gi, tu wú kat le, haû Yhûmsîng Garaî é maumang lagyo gi, Yerusalem wà mó htoq má shâm wing to luî, mauhkûng eq myigùng gyoro má yàp tô é le myang ri. Haû mù, Dawiq eq sûwún wuî gi, jimê tû wùt luî, myòqdong ngóm gòp bum akô nghut ri.
17 Haú hkûn, Dawiq gi, Garai Gasang lé, “Gyè wó zân é byù jihpán gùq nhâng sû gi, ngo shèq ru nghut lhê, a nghut lhí? Ngò, sau zúng sû shèq mara kut shut luî, agè ashop hkyô kut sû ru nghut lhê. Shí bang gi, sau zô pé za nghut lhê mù, mara a bò kó nghut ri. Yhángmòq haî kut shut bê lhú? Ngá é Garai Gasang nghut é, Yhûmsîng Garai ê, ngò eq ngá é yhûmbyù wui ahtoq má shèq Náng é lòq ru jé sháng, wúm shí lé, Náng é byu pê chyáng hkâgyó nhang nyì lo.” ga taî ri.
18 Haû mù, haû Yhûmsîng Garaî é maumang lagyo gi, Dawiq dòq ló mù, Yebusi byù Arauna é gùq chyârâng má Yhûmsîng Garaî é matú hkungga gyàp ralhum saí râ lé ê taí râ matú, Gat lé hkunmó hkyô ri. 19 Haû mù, Dawiq gi, haû Yhûmsîng Garaî é myìng mai Gat taî é dang lé jì-no gyo mù, dòq ló bê nghut ri.
20 Arauna gi, súngsô bàt nyi é u, lhing wú kat le, maumang lagyo lé myang ri. Yhang eq rahá nyi tô é yhang zo yùqzô pé myi yuq gi, haq byùq akô nghut ri. 21 Dawiq gi, Arauna shut chyâng lé lo é hkûn, yhang gi, tu wú kat le, Dawiq lé myàng mù, chyârâng mai htoq luî, Dawiq é hí má myòqdong myigùng jé shoq ngóm gòp bê nghut ri.
22 Haú hkûn, Dawiq gi, yhang lé, “Shiwa byu pê chyáng gyó nyi é wúm shî zîm byùq sháng gàq, ngo lé, náng é chyârâng shî má haû Yhûmsîng Garaî é matú hkungga gyàp saí nhâng laq. Ngo lé haû eq gíngdán é gù mai ung byi aq.” ga taî ri.
23 Haû jáng, Arauna gi, Dawiq lé, “Haú lé yù àq! Ngá é yhûmsîng hkóhkâm ô nau é su kut àq. Wú aq; ngò gi, myi nyhé hkungga é matú nohtó pé, htang kut râ matú gùq bàt zè eq gùqzò hkungga kut râ súngsô pé bànshoq lé byi râ nghut lhê.” ga taî ri.
24 Nghut kôlhang, Hkóhkâm Dawiq gi, Arauna lé, “Haú dông a nghut; ngò gi, gè gè yhang, gíngdán é gu èq wui yù râ nghut lhê. Ngò gi, haû Yhûmsîng Garai lé nhông byi râ matú náng é zè yù râ a nghut; gù a gyó é myi nyhé hkungga lé le nhông râ a nghut.” ga tû taî ri.
25 Haû mù, Dawiq gi, Arauna lé hîng í joí ngo rûng byi luî, jowò haú lé wui yù bê nghut ri. 26 Yhang gi, haú má Yhûmsîng Garaî é matú hkungga gyàp saí mù, myi nyhé hkungga pé eq zùmhkaû hkungga pé nhông byî luî, haû Yhûmsîng Garai lé wùt dûng é nghut mù, haû Yhûmsîng Garai gi, myi nyhé hkungga nhong é hkungga gyàp htoq má myi hkyô kat é dông, mauhkûng mai Dawiq lé tu byî ri.
27 Haû mù, haû Yhûmsîng Garai gi, maumang lagyo haú lé taí jáng, yhang gi, yhâng é shâm lé shámbyâng má xâng pyám bê nghut ri. 28 Haú u, haû Yhûmsîng Garai gi, Yebusi byù Arauna é chyârâng má yhang lé tu byî é lé, Dawiq byu myàng jáng, yhang gi, haú jowò má hkungga pé nhông byî ri. 29 Hkâsu mù gâ le, yòso má Mosheq saî é, haû Yhûmsîng Garaî é sàksé zúm eq myi nyhé hkungga nhông byî é hkungga gyàp gi, haú u lé, Gibe-on wà mâ é myhang é jowò má jòq tô é nghut ri. 30 Nghut kôlhang, Dawiq gi, haû Yhûmsîng Garaî é maumang lagyô é shâm lé gyùq é yánmai, hkungga gyàp hau é hí má Garai Gasang lé a é wám myi nghut ri.