Hkyangjong Hpúng Pé
24
A-ô mâ é gi, Arun é awùt ashîn é byù hpúng pé nghut lhê.Arun é yhang zô pé gi, Nadap, Abihu, Ele-aza eq Ihtama pé nghut akô. 2 Nghut kôlhang, Nadap eq Abihu nhik gi, yhángnhik é yhâng wa a shî shi-má shi byùq bekô nghut mù, yùqzo a hkû kó nghut ri; haû mù, Ele-aza eq Ihtama nhik gi, hkyangjong mû wùn wàq bekô nghut ri. 3 Dawiq gi, Ele-aza é awùt ashín Zadok eq Ihtama é awùt ashín Ahimelek nhik lé garúm yû mù, yhángmòq zui saí âng é múzó eq rajung za byù hpúng pé gam hkoq to bê nghut ri. 4 Haú hkûn, Ihtama é awùt ashín pé mâ é ushuq pê htoq Ele-aza é awùt ashín pé mâ é ushuq pé je myô ri; haû mù, yhángmòq lé, Ele-aza é awùt ashín mâ é yhûmhtu ushuq raxe hkyuq yùq, Ihtama é awùt ashín mâ é yhûmhtu ushuq shit yùq kut gam hkoq tô akô nghut ri. 5 Yhángmòq gi, Ele-aza eq Ihtama nhik í yùq é awùt ashín pé mâ é, Garai Gasâng é zaugun wuì eq sân-yúng jowò mâ é zaugun wuì bò kô é yánmai, myòqdong a hkyin é za, hkyîn shosé shê luî, yhángmòq lé gam hkoq akô nghut ri.
6 Lewiq byù, Nehtanela é yhang zo, laiká ká sû Shemai-a gi, hkóhkâm hpô é hí má le, zaugun wui é hí má le, hkyangjong Zadok é hí má le, Abi-ahta é yhang zo Ahimelek é hí má le, hkyangjông pé eq Lewiq byu pê é yhûmhtu pê é ushuq pê hí má le, yhángmòq lé kâ xûm to mù, Ele-aza mai yhûmhtu rahtu, Ihtama mai yhûmhtu rahtu hkyin htoq yu ri.
7 Hkyîn shosé she é má, sânghi âng é gi, Yehoi-arip;
htang dàm má âng é gi, Yedai-a;
8 sum dâm má âng é gi, Harim;
myi dâm má âng é gi, Se-orim;
9 ngo dâm má âng é gi, Malikiya;
hkyuq dâm má âng é gi, Miyamin;
10 nyhit dâm má âng é gi, Hakoza;
shit dâm má âng é gi, Abiya;
11 gau dâm má âng é gi, Yeshu-a;
raxê dàm má âng é gi, Shehkani-a;
12 raxe radàm má âng é gi, Eli-aship;
raxe í dâm má âng é gi, Yahkim;
13 raxe sum dâm má âng é gi, Hupa;
raxe myi dâm má âng é gi, Yeshebe-ap;
14 raxe ngo dâm má âng é gi, Bilaga;
raxe hkyuq dâm má âng é gi, Imera;
15 raxe nyhit dâm má âng é gi, Hezira;
raxe shit dâm má âng é gi, Hapizeza;
16 raxe gau dâm má âng é gi, Pehtahi-a;
í xê dâm má âng é gi, Yehezikela;
17 í xe radàm má âng é gi, Yahkin;
í xe í dâm má âng é gi, Gamula;
18 í xe sum dâm má âng é gi, Delai-a;
í xe myi dâm má âng é gi, Mazi-a nghut ri.
19 Shî gi, Isira-elaq é Garai Gasang, haû Yhûmsîng Garai mai, yhángmòq é îchyí îwa Arun lé hkunmó hkyô tô é eq rajung za, yhángmòq é matú Arun kâ tô é cháng ra târâ pé má cháng luî, haû Yhûmsîng Garaî é noqkuq yhûm má wàng mù dójaú râ matú, hkyin masàt tô é byù hpúng pé nghut ri.
Myìt Gyó Tô É Lewiq Byu Pé
20 Myìt gyó tô é Lewiq é awùt ashín pé gi,
Amram é yhang zô pé mâ é Shuba-ela;
Shuba-ela é yhang zô pé mâ é Yedi-a;
21 Rehabi-a é yhang zô pé mâ é, zo-mún Ishi-a;
22 Izihara byù mâ é Shelomot;
Shelomot é yhang zô pé mâ é Yahat;
23 Hebron é yhang zô pé mâ é, yùqzo lagám Yeri-a, yùqzo lanóng Amari-a, yùqzo lalaq Yahazi-ela eq yùqzo latû Yekame-am;
24 Uzi-ela é yhang zo yùqzo Mihka;
Mihka é yhang zô pé mâ é Shamira;
25 Mihka é yhang gu Ishi-a;
Ishi-a é yhang zô pé mâ é Zehkariq;
26 Merari é yhang zô pé mâ é, Mali eq Mushi nhiktâng;
Yazi-a é yhang zo Beno;
27 Merari é yhang zô pé mâ é Yazi-a é yùqzô pé Beno, Shoham, Zahkura eq Ibri;
28 Mali mâ é, yùqzo a wó sû Ele-aza;
29 Kisha mâ é, Kisha é yhang zo Yeramela;
30 Mushi é yhang zô pé Mali, Edera eq Yerimot pé nghut akô.
Shí bang gi, yhángmòq é yhûmhtu má châng é Lewiq byu pé nghut akô. 31 Yhángmòq le, yhángmòq é gu-mang wuì, Arun é awùt ashín pé kut kô é su, Hkóhkâm Dawiq é hí má le, Zadok é hí má le, Ahimelek é hí má le, hkyangjông pé eq Lewiq byu pê é yhûmhtu pê é ushuq pê hí má le, hkyîn shosé she akô nghut ri. Mangmó yùq é yhûmhtu pé lé le, zohtáng yùq é yhûmhtu pé lé su rajung za kut akô nghut ri.