9
1 Ìkakup me uyọt ibe emi ǹge ikpa ǹjet enyi ofolek ikwaan̄ ntap-ubọk eyi ekiria ijet ebi eyi Awaji ìkup me Judia. 2 Nriọọn̄ ibe ke enyi mîkaan̄ ulọk itatap ubọk. Mije keya si ke nkisa enyi igugo lek me isi ebi agan̄ Mesidonia, mè ikitumu inyi ema ibe ke enyi ebi ìkup me agan̄ Akaya mîbem lek isan̄a itatap ubọk karake acha keyilọ. Ulọk enyi ekaan̄be îsisik owuwa kiban̄, mè irọ inyi ema ebene etap lek me lek ikwaan̄ ntap-ubọk yi. 3 Eya orọ, ǹkiria bọn Nte kiji chi inu me lek kinyi, inyi enyi esa ata mgbọ ebem lek itatap ubọk, mè gogolek geelek eji esabe enyi igugo ìkare me ukpọk-otu ikike. 4 Ire ebi Mesidonia igọọk emi inu, mè inimun̄ ibe ke enyi kpebem lek me atikọ, esip môtet eji enenen, mè itet enyi si, mije, eji mîtoon̄ enyi ejit me lek enenen. 5 Eya orọ îkupbe me uyọt ibe emi ǹria bọn Nte kiji chi ibe edasi enu enedọmọ esan̄a melek kinyi ubọk enyi mêsabe ichili ubọk inyi inyinyi ata ejit yi kubọk enyi ewuukbe lek ichieek use ibe ke enyi mêrọ. Ìneen̄ otutuuk inu ìsun̄ sabum usen mânube, inyi ire inyinyi ata ejit me atikọ, mè ikare kubọk inu esabe ejit uduk inyi, mije etetbe ene me unye.
Ugbana òkup me lek inyinyi inu
6 Ikawuuk ibe ke ogwu òwop sọntiik mfut inen mè inen gaalek me uko ìborọkọ si sọntiik. Ire, ogwu òchichili ejit iwop owuwa ìborọkọ si owuwa. 7 Ene geelek inyi inu îtumube ifieek me ejit kan̄ ibe ke ọmọ mônyi, ikare me ejit uduk, ikare si kubọk etetet ọmọ me unye ubọk. Mije, Awaji ìkima ogwu òkisa me ubelejit inyi inyinyi. 8 Awaji môkọt inyi enyi otutuuk ugbana geelek ogbogbo, inyi enyi ekekaan̄ otutuuk inu geelek enyi eweekbe mgbọ geelek, mè ekechili ubọk ekeda inyinyi egwook, inyi ekesa esi ata ikwaan̄ geelek òkup me uyọt isisi. 9 Ege me Ikpa Mbuban ibe,
“Ọmọ îchili ubọk iche uche inyi ebi ugbọọn̄;
ata irọrọ kan̄ môkup ire mgbọ ikakaan̄ge itata.”a
10 Awaji ogwu òkiche mfut inyi ogwu òwop mfut, mè ikirọ inyi mfut cha itibi ikana inorie ebererie, mônyi enyi inu ogbogbo, mè irọ inyi ikwaan̄ ata irọrọ kinyi ikimumana. 11 Awaji môrọ inyi enyi ebọọn̄ ubọọn̄ me oniin̄ geelek, inyi enyi ekekọt echili ubọk enyi inyinyi me irek geelek. Sa me ikeyi, owuwa ene mênyi Awaji itọn̄ mije uche kinyi, eyi eji mêsabe isi iche inyi ema.
12 Ikwaan̄ keyi enyi ekisi òkirọ inyi ebi eyi Awaji ekaan̄ inu geelek ònanan ema. Ìkare eya gaalek, ikwaan̄ kinyi yi òkirọ inyi ogbogbo ene ekesa me ejit unwọọn̄ enyi Awaji itọn̄ ikpele ikpele. 13 Ikwaan̄ keyi enyi ekirọ îjeen̄ ene ebi enyi erebe me atikọ. Eya orọ, owuwa ene mênyi Awaji umin, mije enyi esikibe ibot inyi ata etip kè Karais eyi enyi echieekbe me lek, mè ikitumu isibi. Ema mênyi si Awaji umin, mije uche enyi echilibe ubọk iche inyi ema, mè ofifi bọn Nte si. 14 Ema isiberiaak uriaak inyi enyi, ema mêsa otutuuk ejit kiban̄ iriaak, mije ikpele uyeke uyeke atata nnwọn eyi Awaji onyibe enyi. 15 Itọn̄ ikup inyi Awaji, mije uche îchebe inyi eji, eyi otu ebilene kpokọtbe ikpa.