10
Unye Pọọlu okaan̄be kubọk ogwu otuchieen̄
1 Emi Pọọlu ogwu enyi ebe ke ìkifieek owot me isi kinyi, mè ikinye otu me udun̄ kinyi, emi ǹkisa me isiki-lek mè ejit nsan kè Karais iriaak enyi. 2 Soso, nsinu me lek kinyi, ikarọ inu geege eyi môrọbe mè ǹnye otu ǹnyi enyi. Mije, nriọọn̄ ibe ke mâkọt inye otu ijaan̄ lek inyi usini ebi melek kinyi, ebi ìkikeek ibe ke eji ekirọ inu ubọk ebi linyọn̄ ekirọ.
3 Ìkpọ, ubọk geelek eji elukbe me linyọn̄ keyi, eji kpekitim akọn̄ kubọk ebi linyọn̄ ekitim. 4 Nroon̄ akọn̄ eji ekisa itim akọn̄ kiji ìkare echi linyọn̄ keyi, îre echi ònan̄a me ubọk Awaji. Nroon̄ akọn̄ chi îkaan̄ unye enenen. Môkọt igbugbọ uwu mgban akọn̄ geelek ònyenye igwook me ijọn̄. 5 Ọmọ ke eji ekisa igbugbọ otutuuk ifan̄a geelek, mè ofiaan̄ ugumulek geelek eyi òkikput ibe ene ekariọọn̄ Awaji, mè ikisa si itet ijo ekiket ebilene geelek me unye, inyi isiki ibot me ijọn̄ inyi Karais. 6 Otutuuk kinyi isijeen̄ ibe ke enyi mîsiki ibot iso, eji mêbem lek isusulu ebi unye-ibot geelek osusut.
7 Enyi ekikpọ inu inyọn̄ inyọn̄ gaalek. Ire ikaan̄ ogwu me etete kinyi òkimọnọ lek kan̄ ibe ke ọmọ ìre ogwu kè Karais, ene ya ikpọk ikeek ibe ke eji si ìre ebi kè Karais, kubọk ọmọ orebe. 8 Okaan̄-ene înyi eji unye ibe eji enama enyi ebene, mè ekagbugbọ enyi ìgwook. Ire nsa unye yi ibaan̄ alọm imin sọnja, esip geege ìkpotet emi. 9 Ǹkaweek ibe ikup kubọk ǹkisa ikpa n̄a chi itap enyi ukpook me emen. 10 Usini ebi kinyi ekitumu ibe, “Ikpa kè Pọọlu ìkisisisik ene ukot me ijọn̄, mè ikikup ene me lek unye unye. Ire, me isi mè isi, Pọọlu ìkakaan̄ ulobo geege me lek, ikọ îkitumu si ìkakisibi inu geege.” 11 Îgbe ibe ebi ìkup ikeya eriọọn̄ ibe, inu eji erebe me emen ikpa kiji mgbọ eji kpekup isi mè isi, ke inu yaage si ke eji ebere me emen irọrọ kiji mgbọ eji isinu isi mè isi.
12 Eji kpeweek isusun̄ lek kiji ìkike melek ebi ìkimọnọ lek kiban̄ ubene ubene. Eji kpeweweek si isasa lek kiji itọ me lek kiban̄. Ife chi kpekaan̄ ifuk-ibot geege. Mije, ema ekisa lek kiban̄ itọ me lek ebi melek kiban̄, mè ikisa si ebi melek kiban̄ iroon̄ lek kiban̄, inyi ema eriọọn̄ ere ema erebe. 13 Ire, eyi kiji, eji kpebegugo lek iraka ubọk îgbebe. Ire, eji ebegugo lek iyaka me lek ikwaan̄ Awaji otapbe eji me ubọk. Ikwaan̄ ya si ke eji enirọ me etete kinyi.
14 Eyi eji ekisa enyi igugo lek, gogolek kiji ìkasaba ìraka iman̄, mije, îre eji esa ata etip kè Karais itutobo mege inigwook me karake ama kinyi. 15 Eji kpesaba si iraka iman̄, mije, eji kpesa ikwaan̄ ebi ofifi ife erọbe igugo lek kubọk ke îre eji erọ. Eji mîkaan̄ ikpọchieen̄ ibe, ike ichechieek kinyi okimumana, ke ikeya si ke ere ikwaan̄ kiji me etete kinyi môkida iwele enenen enenen. 16 Mgbọ keya, eji mêkọt isa ata etip isaba iraka enyi isi ilook me ofifi ido. Mije, eji kpeweek isasa ikwaan̄ ebi ofifi ife ewuukbe lek irọ me ofifi agan̄ igugo lek. 17 Ikpa Mbuban ìtumu ibe, “Ene geelek òbogugo lek, igugo lek mije inu Okaan̄-ene orọbe.”a 18 Ene isasa otu kan̄ gaalek itumu ata ikọ ibak lek kan̄, eya ìkakup me lek inu geege. Ire, Okaan̄-ene me lek kan̄ isi itumu ata ikọ ibak ene, eya onwọn ichit.