8
Ijejeen̄ ofolek ichichili ubọk inyi inu
1 Bọn Nte n̄a, eji ekiweek irọrọ inyi enyi eriọọn̄ inu ofolek atata nnwọn eyi Awaji onyibe ntitiin̄ kan̄ òkup me agan̄ Mesidonia. 2 Ema ekije itibi nga ujat ujat ntọ-mkpọ ile. Ire, unwọọn̄ îmin ema me ejit enenen ire lek ema echilibe ubọk ire òta iche uche inyi bọn Awaji, ubọk geelek ugbọọri okemebe ema enenen. 3 Ǹkitumu atikọ inyi enyi ibe ke ema mînyi ubọk efuuk kiban̄ okọtbe, mè inyinyi si isaba iraka ubọk ema ekaan̄be. Ema esa me ejit kiban̄ gaalek 4 ikibeek ibe, soso, mè eji echieek inyi ema egọọk eche inu ejet bọn Awaji ìkup me Judia, ke ema ekiweek igọgọọk ikaan̄ uche me lek ikwaan̄ yi, mè isa me ikeya igọọk bọn Nte igbaan̄ irọ inu. 5 Ema mîrọ igak ubọk eji ekeekbe! Ema edadasi isa lek kiban̄ inyi Okaan̄-ene, mè inisa si lek kiban̄ inyi eji, igọọk me nkeek Awaji. 6 Ikeya si, eji mîbeek Taitọs ogwu òwuwuuk lek inu inibọkọ uche yi, ibe ikpọk inu si me lek kinyi inisi ikwaan̄ imumechieen̄ yi ire òta me etete kinyi. 7 Îre enyi ekirọ inwọn ichit me owuwa inu, me ichechieek, mè itutumu ikọ Awaji, mè irọriọọn̄ atikọ, mè itetet lek inye ikisi ikwaan̄ ikọ Awaji, mè imumun̄ eji me chieen̄. Ikeya si, ìmun̄ ibe ke îre enyi erọ inwọn ichit me inyinyi uche eyi imumechieen̄ yi.
8 Ǹkanyinyi enyi kubọk ikan. Ire, ǹkijeen̄ enyi ubọk ebi ofifi ife ebembe lek itatap ubọk, inyi ǹsa me ikeya ǹjeen̄ ibe ke imumechieen̄ kinyi ìre eyi atata me atikọ. 9 Enyi mîriọọn̄ ikpele atata nnwọn eyi Okaan̄ kiji Jisọs Karais ojeen̄be! Ubọk geelek ọmọ obọọn̄be ubọọn̄, ire, ọmọ îkana ugbọọn̄ mije kinyi, inyi enyi enan̄a me lek ugbọọri kan̄ ebọọn̄ ubọọn̄.
10 Nteme ònwọnwọn ichit inyinyi enyi me lek ibot ikọ yi ìre ikeyi: Me acha òraraka, enyi ere ebi ìdadasi ibene ikinyi uche yi. Ìkare inyinyi gaalek, enyi si ere ebi ìdadasi ikaan̄ ulọk inyinyi. 11 Eya orọ, me mgbọ keyi, ìrọ ìsan̄a, inyi ebi ene esa me ikeya emun̄ ibe ke enyi mîkaan̄ ulọk ya me atikọ. Ìnyi ike ubọk kinyi osoon̄be. 12 Mije, ire ene ikaan̄ ejit inyinyi, inu geelek òsibi ọmọ me ubọk ke ebebọkọ, ìkare inu ọmọ ikakaan̄ge.
13 Ìkare ǹkiweek ibe mè enyi ekemun̄ ukwook, mè ebi ofifi ife ekarọ inu geege. Ire, ǹkiweek ibe inyinyi kinyi, enyi agan̄ iba, ije ìkike. 14 Me mgbọ keyi enyi ekaan̄be inu owuwa, ema ekukup me una, uche ònan̄a me lek owuwa inu eyi enyi ekaan̄be môsi irọ inyi ema ekaan̄ inu geelek ònanan ema. Mgbọ inu isininwọn me lek kiban̄, mè ifieek me lek kinyi, uche ònan̄a me lek owuwa inu eyi ema mêkaan̄be mônirọ inyi enyi ekaan̄ inu geelek eyi mônanbe enyi. Mgbọ ya, inyinyi kinyi agan̄ iba mônenilibi ìkike. 15 Ege me Ikpa Mbuban ibe,
“Ogwu òteteen̄ iwa ìkakaan̄ ìwa ìraka ikeke îweekbe;
ogwu òteteen̄ sọntiik
ìkakaan̄ ìsip ìraka ikeke îweekbe.”a
Mîria Taitọs mè ebi melek kan̄ isi Kọrint
16 Ntọn̄ Awaji enenen, mije, ulọk yaage nkaan̄be itatap ubọk inyi enyi ke îtap si me ejit kè Taitọs. 17 Mije, Taitọs îbọkọ otitọt kiji itap mgbọ yaage, mè isa me ubelejit itumu ifieek me lek kan̄ gaalek ibe ke ọmọ mônu me lek kinyi. 18 Eji ekiria ọmọ melek gwun̄ Nte kiji ge, ogwu otutuuk ntitiin̄ Awaji ekinyi ulibi mije ubọk îkisa isi ikwaan̄ itutumu ikọ Awaji ijaan̄ enenen. 19 Ògak ge, îre otutuuk ntitiin̄ Awaji egobo gwun̄ Nte kiji yi ibe ikigọọk eji ikijijen̄e ikana ere geelek eji ekisi ikwaan̄ inyinyi eyi imumechieen̄ yi. Eji ekisi ikwaan̄ yi, inyi Okaan̄-ene me lek kan̄ ibọkọ umin, mè eji esa me ikeya ejeen̄ ibe ke eji mîkaan̄ ulọk itatap ubọk inyi bọn Awaji. 20 Eji ekigbagbala chieen̄ irọ ikwaan̄ inyinyi eyi imumechieen̄ yi, inyi ene geege ikakaan̄ inu geege ìbosa ifieek eji ikọ me lek ubọk eji ekisa isi ikwaan̄ yi. 21 Eji ekibọbọkọ ufialek ikirọ ikwaan̄ yi, inyi inu geelek eji erọbe itat me isi Okaan̄-ene, mè itat si me isi ebilene.
22 Ofifi ene si eji ekiria igbaalek kiban̄ ìre gwun̄ Nte kiji ge ogwu eji eweekbe imun̄ ibe ke îkaan̄ ulọk itatap ubọk mgbọ geelek. Ògak ge, mgbọ keyi îtoon̄be enyi ejit me lek enenen, îweek inunu ere kinyi. 23 Ire Taitọs, ọmọ ìre ogwu melek n̄a ekigbaan̄ isi ikwaan̄ me etete kinyi. Bọn Nte kiji iba kechilọ ìre ebi otutuuk ntitiin̄ òkup me agan̄ keyi egobobe ito me otuchieen̄ kiban̄, inyi esa umin enyi Karais. 24 Eya orọ, ìjeen̄ ebirieen̄ chi ata imumechieen̄ kinyi, inyi otutuuk ntitiin̄ Awaji emun̄, mè eriọọn̄ ibe ke eji kpesa enyi irọ otu me ikike.