3
Bọn Nte ere ikpa ulook eyi Jisọs Karais ogebe
1 Ìre ikọ ntumube îtaan̄ enyi me utọn̄ kubọk eji mîra ikpọk ibene ikitọn̄ lek kiji? Ìre îkup me uyọt ibe eji ekejeen̄ enyi ikpa unye, mgbọ eji isibenu lek kinyi? Sà ìre îkup me uyọt ibe eji ekebọkọ enyi ikpa unye me ubọk, sabum eji ènenu me lek kinyi? 2 Îre enyi me lek kinyi ere ikpa unye kiji, eyi egebe me ejit kiji, eyi otutuuk ene eriọọn̄be, mè ikifuk. 3 Enyi mîrọ si inyi otutuuk ene eriọọn̄ ibe ke enyi ìre ikpa ulook eyi Karais ogebe, eyi eji esabe isi ichon ikana. Ikpa ya ìkare ikpa eyi esabe mun̄ ikpa ikike ige me inyọn̄ ewuuk ikike. Karais ìsa Ekwukwu Awaji òkup me ugwem ige ulook ya me emen ejit ebilene.
4 Îre nan̄a me lek kè Karais ke eji ekaan̄ ojelek utoon̄-ejit òkup ikeyi me lek Awaji. 5 Eji kpebekọt itumu ibe ke îre eji gaalek esa unye kiji irọ otutuuk inu eji erọbe. Otutuuk efuuk kiji ìnan̄a me ubọk Awaji. 6 Îre ọmọ orọ inyi eji ekọt ekana ebi ìkisi ikwaan̄ eyi ayaya inyan̄a-ibot. Ìkare inyan̄a-ibot eyi Ikan kè Mosis eyi egege isibi, îre inyan̄a-ibot eyi Ekwukwu Mbuban. Mije, Ikan eyi egege isibi ìkikpakpan̄ ene, ire, Ekwukwu Mbuban ìkinyinyi ene ugwem.
Ayaya inyan̄a-ibot îmin mè ijaan̄ igak eyi oka
7 Ikan kè Mosis, etibi me lek ewuuk ikike. Mkpulu eyi Ikan ya si ìsa mkpa inu. Ire, mgbọ Ikan ya onube, ìje melek ujamgbugbo inu. Mije ujamgbugbo ya okitoon̄ me emen isi kè Mosis, ebi Ijeren kpekọt igwuun̄ chieen̄ ikpọ Mosis emen isi, ubọk geelek utoon̄ ya obenebe ikigwọk ita. 8 Ire mkpulu eyi mkpa ya inu melek ujamgbugbo, ìre mkpulu eyi Ekwukwu Mbuban ìkpofat ije melek ujamgbugbo òmimin igak ikeya? 9 Ire mkpulu eyi òkitip ene oyerebet ikaan̄ ujamgbugbo, ìre mkpulu eyi òkirọ inyi ebi ene ekana ebi ata irọrọ ìkpofat ikaan̄ ujamgbugbo igak ikeya? 10 Inu ya òkakaan̄ ujamgbugbo me ukot ikaan̄ ìkayaka ìkaan̄ ujamgbugbo geege, ire isa itọ me lek ayaya inu eyi òkakaan̄ ujamgbugbo igak ikeya. 11 Ire inu òkigwọgwọk ita ije melek ujamgbugbo, ìre inu eyi òbofufuk ìkpofat ikaan̄ ujamgbugbo igak ikeya?
12 Eya orọ, ire eji ikaan̄ ojelek ikpọchieen̄ òkup ikeya, ìsibi ibe ke kpunu ulibi-chieen̄ geege me lek kiji. 13 Eji kpekup kubọk Mosis ogwu òsasa ekwut ikana ichit isi kan̄, inyi ebi Ijeren ekakọt ìmọọn̄ ọmọ isi mgbọ utoon̄ ya okigwọk ita. 14 Mîchit ejit kiban̄ igon, mije, mege inire cherekeyi, mgbọ geelek ema ekifuk ikpa oka inyan̄a-ibot ya, ekwut yaage okichit ema ejit. Kpesan̄a ekwut ya isan̄a, mije, îre mgbọ ene isichieek me lek kè Karais gaalek ke ekichili ekwut ya isan̄a ene me ejit. 15 Iin̄, mege inire chereyi, mgbọ geelek ema ekifuk Ikpa Ikan kè Mosis, ìkikup kubọk ekwut ya si ìkpọkpọ ichit ema ejit. 16 Ire, mgbọ geelek ene geelek ogwube ikom igọọk Okaan̄-ene, mîra isan̄a ekwut ya isan̄a ene ya me ejit. 17 Me mgbọ keyi, me emen etip yi, Okaan̄-ene ore Ekwukwu ya. Ere geelek Ekwukwu Okaan̄-ene okupbe, utelelek òwa me ere ya. 18 Eyi kiji, mije ekwut geege ikachitge eji isi, ìkup kubọk eji ekeke me isi umọọn̄ ikikpọ ujamgbugbo eyi Okaan̄-ene me emen umọọn̄. Ujamgbugbo ya okekinan̄a me isi umọọn̄ ya itoon̄ igwook eji me lek, mè ikpọkpọ ikinwene eji ifo isi inan̄a me ujamgbugbo itap me ujamgbugbo, inyi eji ekup kubọk Okaan̄-ene okupbe. Îre Okaan̄-ene, ogwu òrere si Ekwukwu ya, okinwene eji, mè ikirọ inyi eji eketibi emiin̄ me emen ujamgbugbo kan̄.