2
1 Îre bak me lek keya ke ntumu ifieek ibe ke emi m̀kpayaka ikpọk inu me lek kinyi, inyi enyi ekayaka ìbọkọ ofifi ufialek. 2 Mije, ire nrọ inyi ejit ifieek enyi, ìre ekene oborọ inyi ejit ibele emi, ilọ me lek kinyi, ebi nrọbe inyi ejit ifieek? 3 Ikpa ngebe ijet enyi, ǹge ikeya, inyi, nsinu me lek kinyi, enyi ebi ìberọ inyi ejit ibele emi ekayaka ìnirọ inyi ejit ifieek emi. Me atikọ, nriọọn̄ ijaan̄ lek ibe, ire ejit ibele emi, ke enyi otutuuk ene mêbele ejit si. 4 Ǹsa owuwa mun̄ itọ me chieen̄, mè ikpele ufiak mè ufieejit me ejit ige ikpa ya ijet enyi mgbọ ya. Ǹkage ikpa ya isasa irọ inyi ejit ifieek enyi, ǹge isasa irọ mè enyi eriọọn̄ ibe ke imumechieen̄ nkaan̄be me lek kinyi îmin enenen.
Itetele ijo inyi ogwu òrọrọ ilọ
5 Ire ikaan̄ ogwu irọ inyi ebi ene efieek ejit, ìkare emi ke îrọ. Îre enyi otutuuk ene, mè ìyaka ire usini kinyi, ke îrọ inyi. Ǹkatumu ikọ yi isasa irọ inyi ijo inu ene ya orọbe imalek imin enyi me chieen̄ igak ubọk îkupbe. 6 Ire, osusut ya eyi owuwa ebi ntitiin̄ esulube ọmọ îso. 7 Eya orọ, kpan̄asi ikpọkpọ ikisulu ọmọ osusut ifo isi, ìnwene ejit, mè ìtele ìnyi ọmọ, mè ìkat ọmọ ejit, inyi ulobo ufieejit ya ikamalek ìkeme ọmọ ìfiat. 8 Soso, nriaak enyi, ìnye lek ìrọ inyi ene ya iriọọn̄ ibe ke enyi mîmun̄ ọmọ me chieen̄. 9 Ikpa ya ngebe ijet enyi, ǹge isasa iweek iriọọn̄ mè ìre enyi mêkọt ikeke inye me emen ntọ-mkpọ ya, mè ikisiki ibot me inu geelek. 10 Ene geelek enyi etelebe ijo inyi, emi si ntele inyi ene ya. Ijo geelek ntelebe inyi ene, mè ire ikaan̄ eyi ntelebe inyi ene, me isi kè Karais, ǹtele ijo ya inyi ene ya mije kinyi, 11 inyi Setan ikasa me irek òkup ikeya ìfeen̄ eji. Mije, eji mîriọọn̄ otutuuk ijo otitọt Setan okitọt ibak eji.
Ata ebi ikwaan̄ eyi ayaya inyan̄a-ibot
12 Mgbọ nnube Torowas ibanilook ata etip kè Jisọs Karais, mweek imun̄ ibe ke Okaan̄-ene îchili oniin̄ ibook, inyi emi ǹnenlook ata etip me ere ya. 13 Ire, ǹkakaan̄ esuuk me ejit, mije, ǹkamun̄ Taitọs gwun̄ Nte n̄a me ere ya. Mije keya, mbebe bọn Nte ìkup me ama ya eriọọn̄ ubọk ekup, mè inan̄a itele ema ije ifo agan̄ Mesidonia.
14 Ire, itọn̄ ikup inyi Awaji, ogwu òkisa eji ije me emen kè Karais, kubọk ogwu òje isi akọn̄ okisa ebi akọn̄ kan̄ mè ebi ekpulube me akọn̄ ikije me onineen̄ me onineen̄ ika me unwọọn̄ mgbọ ema etimbe ikpan̄ ebi ochicha kiban̄ me akọn̄. Îre eji ke Awaji okisa irọ inyi ebi ene me ere geelek eriọọn̄ Karais. Irọriọọn̄ Karais ìkup kubọk inu òkidun̄u atalek utop olu. 15 Mije, eji ekup kubọk aran̄ utop olu eyi Karais osabe igwa ngwugwa inyi Awaji, eyi olu kan̄ okidun̄u ikana me etete ebi Awaji okinyan̄a isibi, mè ebi ìbechechep. 16 Eji ekidun̄u njijọ olu eyi mkpa me inwọm ebi ìbechechep, mè ikidun̄u utop utop olu eyi ugwem me inwọm ebi Awaji okinyan̄a isibi. Ìre ekene obokọt irọ ojelek inu òkup ikeya?
17 Eji kpekup kubọk owuwa ebi ene, ebi ìkisa ikọ Awaji inyam ewe iweek oruru. Kpan̄asi ikeya, me unye kè Karais, eji ekisa me otutuuk ejit kiji itumu ikọ me isi Awaji, kubọk ebi Awaji oriabe ikwaan̄.