Òso Ikpa Etip Iba Pọọlu Ogebe Ijet
Ebi Kọrint
1
1 Emi Pọọlu ogwu òrere ogwu otuchieen̄ kè Jisọs Karais inan̄a me nkeek Awaji, emi melek Timọti gwun̄ Nte kiji ege ikpa etip yi ijet enyi, ebi ntitiin̄ Awaji eyi òkup me ama Kọrint, mè otutuuk bọn Awaji ìkup me otutuuk agan̄ Akaya. 2 Atata nnwọn mè esuuk eyi ònan̄a me ubọk Awaji ogwu òrere Nte kiji, mè ubọk Okaan̄-ene Jisọs Karais ikup inyi enyi.
Pọọlu îtọn̄ Awaji ogwu òkikat ene ejit
3 Itọn̄ ikup inyi Awaji ogwu òrere Nte Okaan̄-ene Jisọs Karais. Ọmọ ore Ute ogwu òkito ene nsan, mè ire si Awaji ogwu òkikat ene ejit me irek geelek. 4 Awaji ìkikat eji ejit mgbọ geelek eji ekupbe me ufialek, inyi eji ekọt esa ukarajit eyi eji ebọkọbe me ubọk kan̄ ekekat si ebi ofifi ife ejit mgbọ geelek ema ekupbe me ufialek. 5 Mije, kubọk eji ekibọkọ ufialek Karais obọkọbe owuwa owuwa, ikeya si ke eji ekikaan̄ uche owuwa owuwa me lek ukarajit eyi Awaji inan̄a me lek kè Karais. 6 Ire eji ikibọkọ uga osusut, eji ekibọkọ, inyi enyi ekekat ejit, mè ekaan̄ unyan̄a. Ire Awaji ikitap eji efuuk me emen, ìkitap, inyi enyi esa me ikeya ekekaan̄ si efuuk mè ujọn̄ọ ukarajit me mgbọ ojelek ufialek eji ekibọkọ isikikeme enyi. 7 Eya orọ, ikpọchieen̄ eji ekaan̄be òfo me lek kinyi ìkpọkpọ inye, mije, eji mîriọọn̄ ibe, ubọk enyi ekigọọk eji imun̄ ukwook, ke ikeya si ke enyi ebegọọk eji ikaan̄ ukarajit eyi eji ekikaan̄.
8 Bọn Nte kiji, eji ekiweek ibe enyi eriọọn̄ inu ofolek ufialek eji ebọkọbe me agan̄ Esia. Ufialek ya îmin isaba iraka inu eji ekikọt ibeme. Ugwem me lek kan̄ îrook eji iluluk. 9 Me atikọ, eji me lek kiji mîkeek ibe ke otutuuk inu òkukup inyi eji ìre mkpa gaalek. Ire, inu yi ìrọ ikeya inyi eji ekayaka ìtoon̄ ejit me lek kiji, kpan̄asi ikeya, eji etoon̄ ejit me lek Awaji ogwu òkijomo ebi ìkwakwaan̄. 10 Awaji ore ogwu ònyanyan̄a eji isibi me ojelek mkpa òkup ikeya. Iin̄, môkpọk inyan̄a eji isibi si ofifi mgbọ. Eji mîtoon̄ ejit ibe ke ìbokpọkpọ ikinyan̄a eji isibi mgbọ geelek, 11 mije enyi ekiriaak uriaak me ibot kiji, mè ikisa me ikeya itap ubọk inyi eji. Sa me ikeya, owuwa ene mênyi Awaji itọn̄ me ibot kiji, mije nnwọn înwọnbe me lek kiji, inan̄a me lek uriaak owuwa ene ekiriaak me ibot kiji.
Pọọlu înwene ije îtọtbe ijeje
12 Inu ge òkibele eji ejit enenen ìre ke ejit kiji îrọ inye ibe ke eji esa me unye eyi Awaji ikiluk ugwem me linyọn̄ keyi. Ògak ge, eji ekisa me unye Awaji iluk ugwem melek kinyi, me oniin̄ òkup me mbuban, me kpunube ofiaan̄ geege me emen ejit kiji. Ìkare sa me iriọọn̄-inu eyi ebi linyọn̄ keyi ke eji ikọt iluk ugwem ya, îre me atata nnwọn eyi Awaji gaalek. 13 Eji kpege inu geege ijet enyi eyi enyi kpebekọt ifuk, mè igobo itet. 14 Emi ǹkikpọ chieen̄ ibe, kubọk enyi eriọọn̄be eji okpọkọ okpọkọ me mgbọ keyi, ke enyi mêriọọn̄ òjot òjot, me usen Okaan̄-ene Jisọs Karais môkpọkbe inu, ibe ke enyi mêkọt isa eji igugo lek kubọk eji ekisa enyi igugo lek.
15 Nriọọn̄ ijaan̄ lek ibe ke inu yi ìkpolọlọ ikukup ikeya. Eya orọ mweekbe idadasi inimun̄ enyi, inyi enyi ekaan̄ ugbana mgbọ iba. 16 Mije, ǹkitọt igbagba ere kinyi mgbọ mbaraka isi agan̄ Mesidonia, mè iyaka inigba si ikpọ enyi me oniin̄ ikaka n̄a, mgbọ mâgwube ikom inan̄a me Mesidonia ikika inu agan̄ Judia, inyi enyi etap ubọk enyi emi me oniin̄ ije n̄a. 17 Ìre enyi ekikeek ibe ke ejit n̄a ìkup iba iba mgbọ nkitọt ije yi? Sà ìre ǹtọt ije yi kubọk ebi linyọn̄ ekitọt, mè ikikup me irek yaage ibe, “Iin̄, iin̄,” melek “In̄-in̄, in̄-in̄”?
18 Me atikọ, kubọk Awaji orebe ogwu ògbegbe utoon̄-ejit, ikeya si, ikọ eji etumube inyi enyi ìkare ojelek ikọ “Iin̄” mè “In̄-in̄” òkup ikeya. 19 Mije, ikọ kè Jisọs Karais, Gwun̄ Awaji, eyi emi, mè Timọti, mè Sailas etumube inyi enyi ìkare ikọ ekikup me irek yaage ibe, “Iin̄” mè “In̄-in̄.” Mije, îre me emen ikọ yi ke Awaji obe, “Iin̄.” 20 Me emen kè Karais, otutuuk use geelek Awaji ochieekbe ebilene ìre, “Iin̄.” Eya orọ, îre nan̄a me lek kan̄ ke eji otutuuk ene ekibe, “Ikup ikeya!” Sa me ikeya, Awaji îra ikibọkọ itọn̄. 21 Îre Awaji me lek kan̄ okirọ inyi eji melek kinyi ekeke enye me emen kè Karais. Ọmọ si otọkọ eji aran̄ me ibot isa isan̄a eji isun̄ esese, 22 mè itap eji iman̄ òriọọn̄ kan̄ me lek, mè itap Ekwukwu Mbuban kan̄ me ejit kiji, kubọk inu esabe inyi me nsọọn̄, isasa ijeen̄ ibe ke ọmọ môrọ otutuuk use ọmọ ochieekbe eji iso.
23 Awaji ore ogwu ata-ikọ inyi emi ibe ke inu òrọrọ nkanuge Kọrint ìre ke ǹkaweek inenitap enyi ufialek me lek. 24 Eji kpetọtọ kubọk ikọ inyi enyi ibe enyi enechieek me lek inu enyi kpeweek ichechieek me lek. Ire, eji ekigọgọọk enyi igbaan̄ ikwaan̄ isi, inyi enyi ekaan̄ unwọọn̄. Mije, îre sa me ichechieek ke enyi ekeke inye.