4
Inu unye otu ewe òkup me emen otin̄ ibat
1 Awaji ìnyi eji ikwaan̄ keyi sa me ejit nsan kan̄. Eya orọ, efuuk ìkpota eji me emen. 2 Eji mîjit nlelet njijọ ugwem geelek òkisa esip inu, mè ijit si ugwem ofiaan̄. Eji kpekiwuwọlọ ikọ Awaji. Kpan̄asi ikeya, eji ekitutumu otutuuk atikọ iwele me isi ebi ene ubọk îgbebe, inyi ema eriọọn̄ eji, mè eriọọn̄ me ejit kiban̄ ibe ke inu eji ekitumu ìre atikọ me isi Awaji. 3 Ire ata etip eji ekilook ilet kubọk inu esabe ekwut ichit, ìlet me chieen̄ ebi ìbechechep. 4 Me lek kiban̄, ebi ekachieekge me lek kè Jisọs, Setan, òrere awaji ebi linyọn̄ keyi, ìgogon ejit kiban̄ ichit, inyi ema ekakọt ìmọọn̄ utoon̄ òkinan̄a me lek ata etip eyi ujamgbugbo kè Karais, ogwu òrere inu geelek Awaji orebe. 5 Eji kpetumu ikọ ofolek kiji inyi ene geege. Ire, eji ekitumu Jisọs Karais isibi kubọk Okaan̄-ene, mè ikisa lek kiji ijeen̄ enyi kubọk ebi usun̄ mije kè Jisọs. 6 Awaji ogwu òtutumu ibe, “Utoon̄ itoon̄ isibi me emen udun,”a ọmọ orọ inyi utoon̄ kan̄ itoon̄ me emen ejit kiji. Sa me ikeyi ke eji ekaan̄ utoon̄ ònan̄a me irọriọọn̄ ujamgbugbo Awaji, eyi òkitoon̄ me inyọn̄ isi kè Karais.
7 Ata etip Awaji ìkup kubọk inu ubọọn̄ ònyenye otu ewe. Ire, eji ebi Awaji otapbe ata etip yi me ubọk ibe esa esi elook ebilene, eji ìre otin̄ ibat ikike. Eyi ìkijeen̄ ibe ke îre ubọk Awaji ke unye ògak otutuuk unye, eyi eji esabe ikisi ikwaan̄ yi onan̄a; ke ìkanan̄a me ubọk kiji. 8 Ufialek înan̄a me agan̄ geelek inikeme eji, ire, ìkakeme eji ìkpan̄. Usini mgbọ, ejit kiji îkikup iba iba, ire, kpunu mgbọ geege eji kpekaan̄ ikpọchieen̄. 9 Ebi ene mîsisaak eji, ire, Awaji ìkatele eji. Ebi ochicha mîsulu eji itọbọ me ijọn̄, ire, eji kpekwaan̄. 10 Me mgbọ geelek, eji ekibeme osusut mkpa me akpalek kiji isa ikije ikana kubọk Jisọs obemebe mege ire usen îkwube. Eji ekibeme ojelek mkpa kè Jisọs yi me akpalek kiji, inyi ugwem kè Jisọs si isibi utoon̄ me akpalek kiji. 11 Eji ebi ìkup me ògat ugwem mgbọ keyi, eji ekup me ubọk mkpa mgbọ geelek mije kè Jisọs, inyi ebi ene emun̄ ugwem kè Jisọs me akpalek kiji yi, òrere inu òbokwukwu. 12 Eya orọ, mije eji ekikup me ubọk mkpa mgbọ geelek, enyi mîkaan̄ ugwem ikakaan̄ge itata.
13 Ege me Ikpa Mbuban ibe, “Nchieek, eya orọ ntumube.”b Ikeya si, sa me ojelek ichechieek yaage, eji si mîchieek, eya orọ eji ekitumu inu eji echieekbe me lek isibi. 14 Mije, eji mîriọọn̄ ibe ke Awaji ogwu òjojomo Okaan̄-ene Jisọs me mkpa môjomo eji si me mkpa, kubọk îjomobe Jisọs me mkpa, mè isa eji melek kinyi inigbaan̄ ichichini me isi kan̄. 15 Otutuuk inu chi òrọrọ ìsa ata inu ijet enyi, inyi atata nnwọn eyi Awaji imumana iso owuwa owuwa ene, mè owuwa ene esa me ikeya enyi Awaji òjot òjot itọn̄, inyi Awaji ikaan̄ ujamgbugbo.
16 Eya orọ, efuuk ìkata eji me emen. Ubọk geelek akpalek kiji okikwu ije sọntiik sọntiik, Awaji ìkpọkpọ ikirọ inyi ekwukwu kiji ikikana ayaya egwe geelek. 17 Mije, sọntiik ufialek chi eji ekibọkọ mgbọ keyi, eyi òbokup sọntiik mgbọ gaalek, òkinen̄e ikpele ujamgbugbo, eyi môkupbe ire mgbọ ikakaan̄ge itata, isun̄ iban eji. Ujamgbugbo yi îmin enenen igak otutuuk ufialek cha. 18 Eya orọ, eji kpekpọ chieen̄ me lek inu ekisa chieen̄ imun̄. Eji ekikpọ chieen̄ me lek inu echi kpekisa chieen̄ imun̄. Mije, inu ekisa chieen̄ imun̄ ìkikup sọntiik mgbidim mgbọ gaalek. Ire, inu kpekisa chieen̄ imun̄ okikup ire mgbọ ikakaan̄ge itata.