Ro Pagpangabuhi nga Makapalipay sa Dyos
3
Ginbanhaw kamo it Dyos kaibahan ni Kristo ngani handuma gid ninyo nga magkabuhi kon mauno dapat magkabuhi ro mga tawo nga makapaeangit kon siin si Kristo hay nagalingkod sa tuo it Dyos. 2 Dapat nga ro mangibabaw permi sa inyong paino-ino hay ro mga eangitnon nga mga bagay bukon it ro mga butang riya sa kalibutan 3 dahil patay eon ro inyong kaila sa paghimo it saea ag ro inyong bag-o nga kabuhi kaibahan ni Kristo hay nakatago pa idto sa Dyos ag owa pa ginpakita it husto makaron. 4 Kon si Kristo nga ginhalinan ku inyong bag-o nga kabuhi hay ipakita eon sa anang mahimayaon nga pagbalik, kamo man hay makita nga nagaambit ku anang gahom ag kadungganan.5 Ngani dueaa eon ro mga maeain nga buhat nga bunga ku inyong pagkamakasasaea pareho it paghulid sa bukon it inyong asawa, kalaswaan, kaueag, tanan nga mga maeain nga handom, pagkahakog nga imaw ro pagpasueabi sa manggad kaysa sa Dyos. 6 Pinahan it Dyos ro tanan nga nagahimo it makaraya dahil owa sanda nagatuman kana. 7 Inyo man ron anay kato nga ginahimo sa dati ninyong pagpangabuhi. 8 Pero makaron hay dapat eon nga dueaon ninyo ro kaugot, kaakig, pagdumot, pagpakaeain sa isigkatawo, pagdinaka, 9 ag ayaw eon kamo magpinuril sa kada isaea. Ayaw eon kamo maghimo it makaruyon tungod inyo eon nga gintalikdan ro inyong pagkamakasasaea nga nagatueod kinyo nga mag-obra it maaein. 10 May inyo eon nga bag-ong kinaiya nga padayon nga ginabag-o it Dyos hasta mangin pareho ku anang kinaiya agod hikilaea pa gid ninyo it mayad ro nagtuga kinyo. 11 Ro mga tawo nga ginbag-o it Dyos hay paeareho eang sa anang panueok. Bukon it importante kon sanda hay Judio o bukon, natuli o owa, ulipon o bukon, ignorante o bisan pinakamapintas nga bandido man. Bali wala ron tanan basta nagatuo sanda kay Kristo ay una imaw sa tagipusuon ku tanan nga mga tumueuo ag imaw ro pinakaimportante sa tanan.
12 Ngani bilang mga pinili it Dyos, mga pinaeain agod mangin ana nga mga katawhan ag anang hinigugma, magmangin maeueuy-on kamo, mabinuligon, mapainubuson, maeueo ag matiniison. 13 Mangin mapinasensyahon kamo sa kada isaea ag kon may agrabyo kamo sa kada isaea hay magpaeatawaran kamo pareho ku pagpatawad kinyo it Ginuo. 14 Ag eabi sa tanan, maghigugmaanan kamo tungod ro gugma hay pareho it bugkos nga nagahugpong sa mga tumueuo agod may anda nga matuod nga pag-ueugyon. 15 Dapat nga ro paghidait nga halin kay Kristo ro magahari permi sa inyong tagipusuon tungod gintawag kamo it Dyos nga mangin sangka eawas kay Kristo nga may mayad nga pag-ililiba ag mapinasaeamaton kana. 16 Itanom gid ninyo sa inyong paino-ino ro Mayad nga Balita parti kay Kristo. Gamita ro kaaeam nga gintao kinyo sa pagturo ag sa pageaygay sa kada isaea. Magkanta kamo it mga salmo ag mga sari-saring mga kaeantahon sa pagdayaw sa Dyos nga may hantop nga pagpasaeamat sa inyong tagipusuon. 17 Ag bisan ano ro inyong ginaobra ag ginahambae hay dapat nga nagapakita nga mga sumueunod kamo ni Ginuong Jesus ag pasaeamati permi ro Dyos nga Ama dahil sa ginhimo kinyo ni Jesus.
Ro Pagsueundanan ku Panimaeay it mga Tumueuo
18 Mga bayi, magpasakop kamo sa inyong mga asawa ay duyon ro bagay ninyo nga himuon bilang mga sumueunod it Ginuo. 19 Mga eaki, palanggaa gid ninyo ro inyong mga asawa ag ayaw ninyo sanda pagpintasi. 20 Mga unga, tumana ninyo permi ro inyong ginikanan sa tanan nga butang ay nalipay ro Dyos kon obrahon ron ku mga sumueunod it Ginuo. 21 Mga tatay, ayaw ninyo pagpinangisgi nga owa sa lugar ro inyong mga unga agod indi magmas-ot ro andang buot ag indi sanda madueaan it gana sa pagtuman kinyo.
22 Mga ulipon, tumana ro tanan nga ginasugo kinyo ku inyong mga amo iya sa kalibutan. Tumana sanda nga hantop sa inyong tagipuson dahil sa inyong pagtahod sa Ginuo, bukon it nagatuman eang kamo kon nagatan-aw sanda agod anda kamo nga dayawon. 23 Bisan ano ro inyong ginaobra, himua ron ninyo kutob sa inyong masarangan. Bilanga nga sa Ginuo ninyo ron ginahimo ag bukon eang it sa tawo 24 bangod hasayran ninyo nga magabaton kamo ku ginatigana it Ginuo kinyo bilang inyong premyo. Dumduma ninyo nga si Kristo ro inyong matuod nga amo nga ginaserbihan. 25 Pero mag-andam kamo ay ro nagahimo it maeain hay pagapinahan. Ro pina hay katumbas ku anang maeain nga buhat tungod ro Dyos hay owa it ginapasueabi kon maghukom.