2
Gusto ko nga masayran ninyo nga nagatinguha gid ako nga makabulig kinyo tungod nahakat gid ako sa kamaeayran ninyo nga mga taga-Colosas ag taga-Laodicia nga owa nakakilaea kakon it personal pati man sa tanan nga mga tumueuo sa ibang lugar nga owa man nakakilaea kakon it personal. 2 Ginatinguha ko gid nga makabulig kinyo agod magbaskog ro inyong buot ag agod maghiliugyon kamo nga may paghigugma sa kada isaea. Ag isaea pa hay agod maeubtan gid ninyo it mayad ag mangin kumbinsido gid kamo nga matuod ro mga bagay nga owa anay ginpahayag kato tanan it Dyos, ag ro mga ruyon ngaron hay parti kay Kristo. 3 Si Kristo eang ro makatao katon it kaaeam nga maeubtan ro mensahi halin sa Dyos nga pareho it maeahaeon nga manggad. 4 Ginasugid ko ra kinyo agod owa gid it bisan sin-o nga makapataeang kinyo bisan anda pa kamo nga gamitan it makagaeanyak nga pamisaea. 5 Bisan owa ako inha hay matsa kaibahan man ninyo ako bangod inha man ro akong buot kinyo ag nalipay ako dahil nagakaeasugot kamo nga magpadayon sa inyong malig-on nga pagtuo kay Kristo.Si Kristo eang ro Dapat Tumanon ag Bukon it ro mga Sueundanan ku mga Nagaturo it Saea
6 Bangod inyo eon nga ginbaton si Kristo Jesus nga inyong Ginuo, dapat magkabuhi kamo kon mauno magkabuhi ro mga may maeueot nga kaangtanan kana. 7 Ro inyong pagtuo hay dapat nga mangin parehas ku kahoy nga nakapanggamot it madaeom ukon parehas it baeay nga padayon nga ginainobra nga may malig-on nga pondasyon. Ngani padayuna ninyo ro pagsunod sa mga ginturo kinyo parti kana agod mas maglig-on pa gid kamo sa inyong ginatuuhan. Ag magmangin mapinasaeamaton kamo permi sa Dyos.
8 Mag-andam gid kamo nga owa it bisan sambato kinyo nga madaea ku mga nagaturo it saea inha kinyo. Ro andang mga ginaturo hay owa it pueos ag pagpangluko nga halin eang sa andang paino-ino. Raya hay mga kaugalian ag sueundanan nga gin-obra-obra man lang ku mga tawo iya sa kalibutan ag bukon it halin kay Kristo. 9 Ayaw kamo magpadaea-daea dahil una gid kay Kristo ro tanan-tanan gid nga pagkaDyos it Dyos. 10 Si Kristo hay eabaw sa tanan nga may gahom ag otoridad ag kamo nga may maeueot nga kaangtanan kana hay owa eon it kueang agod kamo hay maeuwas.
11 Dahil may inyo eon nga maeueot nga kaangtanan kay Kristo hay matsa gintuli man kamo pero bukon it pagtuli nga ginhimo sa eawas kundi ro pagbuoe ni Kristo ku inyong makasasaea nga kinaiya. 12 Pagbawtismo kinyo hay pareho man nga gineubong kamo kaibahan ni Kristo ag nabanhaw man kaibahan nana tungod sa inyong pagtuo sa makagagahom nga Dyos nga nagbanhaw kana. 13 Kato hay pareho kamo it patay dahil sa inyong mga pageapas ag dahil owa pa habuoe ro inyong makasasaea nga kinaiya. Pero makaron hay gintaw-an kamo it Dyos it bag-o nga kabuhi dahil sa inyong maeueot nga kaangtanan kay Kristo ag ginpatawad eon it Dyos ro tanan ninyong mga kasae-anan. 14 Ro tanan naton nga pageapas sa kasuguan hay pareho it listahan it mga saea nga ikakondenar naton. Pero ginpaea ron it Dyos paagi sa pagkamatay ni Kristo sa krus. Ginbuoe ku Dyos ro ikasarang ku listahan ngato nga magkondenar katon nga matsa gineansang man rato sa krus. 15 Tag namatay si Kristo sa krus hay ginperdi it Dyos ro mga espirito nga may gahom ag may otoridad ag ana sanda nga ginparehas sa mga bihag sa gira nga ginpaparada agod makita it tanan ro andang makahueuya nga pagkaperdi.
16 Ngani ayaw ninyo pag-inatuha ro mga nagahusga kinyo dahil owa kamo nagasunod sa andang mga talimad-on parti sa pagkaon o ilimnon o kon ano ro puydi o indi puydi sa adlaw it inogpahuway o dahil owa ninyo ginapahaegahi ro pagselebrar it eati ag ro iba pang Pagtililipon. 17 Ro mga kasuguan ku mga Judio parti sa rayang mga butang hay nagpakita eagi ku mga ueubrahon ku paaeabuton nga Maneueuwas. Makaron nga iya eon ro Maneueuwas nga si Kristo hay ana eon nga gintapos ro mga ueubrahon ngato. a 18 Ayaw kamo magpati sa mga nagakondenar kinyo nga bukon kamo it bagay magbaton it premyo dahil owa kamo nagatuead kanda sa pagsimba sa mga anghel ag sa pagpakuno-kuno nga mapaibunuson. Ginainsistir man ku mga tawo ngaron nga may ginpakita kuno kanda ro Dyos pero binugae ron ag bukon it matuod ay halin eang ron sa andang paino-ino nga makasasaea. 19 Nagtalikod eon sanda kay Kristo nga pinakaueo ku mga tumueuo. Kon mauno ro ueo nagatao ku tanan nga kinahangeanon it eawas ag kon paano ro litid-litid nagapang-angot ku tanan nga mga kaeuta-eutahan it eawas hay makaruyon man si Kristo. Imaw ro nagatao ku tanan nga kinahangeanon ku anang mga katawhan agod magtilibyog sanda ag padayon nga maglig-on sa anda nga pagtuo suno sa plano it Dyos.
20 Kamo nga mga tumueuo hay nangin kaibahan eon ni Kristo sa anang kamatayon ngani nahilway eon kamo sa mga sueundanan nga ginaturo it tawo nga dapat kuno sundon agod maeuwas. Hay ham-an it nagasunod gihapon kamo sa mga sueundanan ngaron nga matsa owa gihapon kamo nagasalig kay Kristo? 21 Ham-an it nagapati gihapon kamo sa mga sueunadanan halimbawa it “Ayaw magtabing karon,” “Ayaw magsamit karon,” “Ayaw magbuyot kara”? 22 Ro mga ruyon ngaron hay mga sugo ag turo man lang it tawo ag napatungod eang sa mga bagay nga indi eon mapuslan it uman pagkatapos gamiton. 23 Kon tan-awon, ro anda ngaron nga pagsunod sa strikto nga mga sueundanan ku andang gintukod nga relihiyon pati ro andang pagpaubos ag pagpasakit sa eawas hay matsa base sa kaaeam. Pero owa ron tanan it pueos dahil owa ron it mahimo sa pagpugong sa mga maeain nga handom it tawo.