Ro Sueat ni Pablo sa
Mga Taga-Colosas
1
Raya nga sueat hay halin kakon nga si Pablo nga apostol ni Kristo Jesus dahil sa pagbuot it Dyos ag kay Timoteo nga aton nga igmanghod sa pagtuo. 2 Nagasueat kami kinyo nga mga katawhan it Dyos inha sa Colosas nga amon nga mga igmanghod kay Kristo nga nagapadayon nga matutom kana. Kabay pa nga pakamaayuhon kamo it Dyos nga atong Ama ag taw-an it anang kalinong sa inyong tagipusuon.Ro Pangamuyo ni Pablo Para sa Mga Taga-Colosas
3 Kada magpangamuyo kami para kinyo hay ginapasaeamatan namon permi ro Dyos nga Ama ku aton nga Ginuong Jesu-Kristo 4 tungod habalitaan namon nga nagatuo eon kamo kay Kristo Jesus ag ginahigugma ninyo ro tanan nga mga katawhan it Dyos. 5 Ro inyo ngaron nga pagtuo ag paghigugma hay bunga ku inyong pagpaabot nga mabaton ninyo ro mga gintigana it Dyos para kinyo idto sa eangit. Hasayran ninyo ro parti rikara pagkabati ninyo ku matuod nga mensahi nga imaw ro Mayad nga Balita. 6 Rayang mensahi hay nagaeapnaag man sa bilog nga kalibutan. Bisan siin ra makaabot hay nagadinugang pa gid ro nagatuo kara ag nagabag-o ro kabuhi ku mga nagatuo pareho man sa natabo inha kinyo. Halin ku pagkabati ninyo ku Mayad nga Balita hay inyo nga haeubtan it mayad kon ano gid ro kaeuoy it Dyos nga anang ginpakita pageuwas nana kinyo. 7 Gintud-an kamo parti rikaron ni Epafras nga amon inha nga kasal-i nga palangga ag matutom namon nga kaibahan sa pagserbi kay Jesu-Kristo. 8 Ginsugiran man nana kami nga ginahigugma ninyo ro inyong mga isigkatumueuo tungod sa gugma nga una kinyo nga halin sa Espirito Santo.
9 Imaw ron ngani nga halin ku pagkasayod namon parti kinyo hay sige ro amon nga pagpinangamuyo para kinyo. Ginapangayo namon sa Dyos nga paagi sa anang Espirito hay taw-an nana kamo it tanan nga kaaeam agod masayran ag maeubtan ninyo kon ano ro anang gustong ipaobra kinyo. 10 Dahil kon itugot nana ra, ro inyong pagkabuhi hay kon mauno dapat magkabuhi ro mga sumueunod it Ginuo ag ro tanan ninyo nga ginaobra hay makapalipay kana. Ginapangamuyo man namon nga makahimo kamo permi it tanan nga mayad nga buhat ag makilaea pa gid ninyo it mayad ro Dyos. 11 Amon man nga ginapangayo nga paagi sa indi matupungan nga gahom it Dyos hay ana nga pabaskugon ro inyong buot agod mapasensyahan ninyo ro tanan nga kalisod nga inyong maagyan ag matakuran ninyo ron nga may kalipay. 12 Amon man nga ginapangamuyo nga inyo permi nga pasaeamatan ro Ama tungod ginhimo nana kamo nga mangin bagay nga makabaton ku tanan nanang ginatigana sa anang mga katawhan idto sa eangit nga pwerti kahayag. 13 Ana kita nga gineuwas sa gahom ni Satanas nga nagahari sa mga tawo nga una pa sa kadueom ag ana kita nga ginsaylo sa paggahom ku anang palangga nga Unga. 14 Paagi sa ginhimo ku ana nga Unga hay naeuwas kita nga nagakahueugan nga ginpatawad eon ro atong mga saea.
Si Kristo hay Eabaw sa Tanan
15 Si Jesu-Kristo ro nagapakita kon mauno ro Dyos nga indi makita. Una eon si Kristo bago pa gintuga ro bisan ano ag imaw hay eabaw sa tanan nga mga tinuga 16 tungod imaw ro ginpatuga it Dyos ku tanan nga una sa eangit ag sa eugta, makita man o indi, pati ro mga anghel ag ro iba pa nga klasi it mga espirito nga nagahari o nagadumaea, may gahom o may otoridad. Gintuga ku Dyos ro tanan paagi kay Kristo ag para man sa kadayawan ni Kristo. 17 Una eon si Kristo bago pa gintuga ro bisan ano ag imaw ro nagakontrol ku tanan nga butang agod ro tanan hay magapabilin sa anang tama nga lugar suno sa plano it Dyos. 18 Kon sa eawas pa, imaw ro ueo naton nga mga tumueuo ag kita hay ana nga eawas. Imaw ro ginhalinan ku atong bag-o nga kabuhi. Imaw man ro hauna nga nabanhawa agod imaw gid ro eabaw sa tanan 19 dahil ginplano gid it Dyos nga ro tanan-tanan gid ku ana nga pagkaDyos hay una man kay Kristo. 20 Ag ginplano man it Dyos nga paagi kay Kristo hay makapanumbalik kana ro tanan sa eangit ag sa eugta. Paagi sa dugo ni Kristo nga nag-ilig tag gineansang imaw sa krus hay ginbuoe it Dyos ro nagaueot kana ag sa tawo.
21 Kamo kato hay nahamueag man sa Dyos ag ana kamo nga mga kaaway dahil sa inyong mga maeain nga ginaisip ag ginahimo. 22 Pero ginpapanumbalik eon kamo it Dyos kana paagi sa kamatayon ku anang unga sa krus agod makaatubang kamo kana nga balaan, putli ag owa it ikasaway. 23 Matabo eang ra kon magpadayon kamo sa inyo nga malig-on ag indi mahuyang nga pagtuo ag indi gid magduda nga mabaton ninyo ro mga mayad nga butang nga ginpromisa sa Mayad nga Balita nga inyong habatian. Ro Mayad nga Balita ngara hay ginasugid sa bilog nga kalibutan ag ako nga si Pablo hay ginpili it Dyos nga magsugid karon.
Ro Hilimuon ni Pablo Para sa Kamaeayran ku mga Tumueuo
24 Nagakalipay ako makaron bisan nagakalisod ako dahil kinyo. Ginaantos ko ra tanan agod makompleto ko ro dapat kong antuson para kay Kristo para sa kamaeayran ku mga tumueuo nga anang eawas. 25 Ro Dyos ro nagpili kakon nga magserbi para sa kamaeayran ku tanan nga mga tumueuo agod ikapahayag ko kinyo nga mga bukon it Judio ro bilog nga mensahi it Dyos 26 nga owa anay nana ginpahayag kato tanan pero makaron hay ana eon nga ginpahayag katon nga anang mga katawhan. 27 Ro gusto it Dyos nga ipahisayod katon hay kamo nga mga bukon it Judio hay hatapoe man sa anang makangawa-ngawa ag kanamion nga plano. Ag ro anang plano ngaron hay nga si Kristo hay una man sa inyong tagipusuon ngani sigurado kamo nga makapaeangit. 28 Ro parti kay Kristo ro ginawali namon sa tanan nga mga tawo. Ginapaandaman namon sanda ag ginagamit namon ro tanan nga kaaeam nga gintao it Dyos sa pagturo kanda agod ikapaatubang namon sanda sa Dyos nga may hugot nga pagtuo kay Kristo ag owa it ikasaway. 29 Ginatinguhaan ko gid nga mahimo ro trabaho nga ginsalig kakon it Dyos paagi sa gahom nga ginatao kakon ni Jesu-Kristo.