Ro Primero nga Sueat ni
Juan
Haunang mga Bisaea
Ro nagsueat kara hay owa nagsugid ku anang ngaean pero ro mga mangin-aeamon sa Bibliya hay nagapati nga ro nagsueat kara hay si Juan nga isaea sa mga apostolis ni Jesus ag nakaiba kana tag iya pa imaw sa kalibutan. Si Juan man ro nagsueat ku ebanghelyo ni Juan, Ginpahayag, ag ro Pangaywa ag Pangatlo nga Sueat ni Juan. Ro ginsueatan ni Juan hay ro mga tumueuo nga nagaistar sa mga kabanwahan sa probinsya it Asia. Magueang eon imaw pagsueat nana kara ag ginsueat nana ra mga 60 anyos nga nakabalik si Jesus sa eangit.
Tag gasueat si Juan kara hay may mga nagbueag sa grupo it mga tumueuo ag nagaturo it pinuril parti kay Jesu-Kristo. Ginaturo nanda nga ro tanan nga nagakabuhi iya sa kalibutan hay hatatapnan it kaeainan ngani sinanda imposible nga si Kristo hay nangin tawo ay mangin maeain man dayon imaw. Ginaturo man nanda nga bukon it si Jesus ro Maneueuwas nga ginpaadto it Dyos iya sa kalibutan ag bukon man it imaw ro Unga it Dyos. Bukon eang it ro andang mga ginaturo ro saea kundi pati man ro andang ginahimo. Kon kanda hay owa man it kaso kon indi magtalikod sa saea ro mga tumueuo ag bisan indi pa sanda maghigugmaanan.
Ngani ginasiguro gid ni Juan sa nagabasa/makabasa ku sueat nana ngara nga si Jesu-Kristo hay Unga it Dyos nga nangin tawo. Ginauman-uman gid nana it hambae nga ro nagahigugma sa Dyos hay dapat man nga maghigugma sa anang isigkatawo ag magtuman sa sugo it Dyos.
Abo pa gid ro mabasa sa sueat ngara ni Juan nga makapalipay/makapabaskog katon pareho abi ku: kabahoe-bahoe nga paghigugma it Dyos katon, ku/ro anang pagpatawad sa atong mga kasae-anan, ku/ro atong pagdaog sa mga kaeainan iya sa kalibutan, ag ku/ro atong kabuhi nga owa it katapusan.