4
Mga amo, trataha it tama ag parehas ro inyong mga ulipon. Dumduma ninyo nga may inyo man nga Amo sa eangit.Mga Dugang nga Bilin sa mga Tumueuo
2 Padayuna pa gid ro inyong pagpangamuyo maskin ano ro magkaeanabo. Sa inyo nga pagpangamuyo hay dapat nga mapinasaeamaton kamo ag alisto nga indi magwarang ro inyong paino-ino. 3 Ipangamuyo man ninyo nga taw-an kami it Dyos it kahigayunan nga ikawali ro mensahi parti kay Kristo nga ginpahayag eon it Dyos makaron. Dahil sa akon nga pagwali ku mensahi ngaron hay iya ako sa prisohan makaron. 4 Pangamuyui man ninyo nga mangin klaro ro akong pagturo karon ay duyon gid mat-a ro dapat nakong obrahon.
5 Kaadya ninyo ro inyo nga pagpangabuhi sa atubang ku mga bukon it tumueuo ag kaliti ninyo ro kada kahigayunan nga matud-an sanda parti kay Kristo. 6 Dapat nga mayad-ayad permi ro inyong mga pamisaea kon nagapakighambae kamo kanda agod ganahan sanda sa pagpamati kinyo ag mabuligan pa sanda. Kon obrahon ninyo ra hay gaantiguhan man kamo magsabat it mayad-ayad sa nagapangutana kinyo.
Mga Pagpangamusta ag mga Katapusan nga Bilin
7 Si Tiquico lang ro magasugid kinyo ku tanan nga natabo kakon. Isaea ron imaw sa mga palangga naton nga mga igmanghod ag masaligan namon nga kaibahan nga nagaserbi sa Ginuo. 8 Ro dahilan nga ginpaadto ko imaw inha hay agod isugid kinyo kon ano eon ro amon nga sitwasyon iya ag agod hipabaskog man nana ro inyong buot. 9 Nagsunod man kana si Onesimo nga masaligan ag palangga naton nga igmanghod ag inyo man nga kasimanwa. Sanda lang ro gasugid kinyo ku tanan nga nagkaeanabo riya.
10 Ginakumusta man kamo ku akon nga kaibahan iya sa prisohan nga si Aristarco ag pati man ni Markos nga igkampod ni Bernabe. Ginbilinan ko eon kamo kato parti kay Markos ngani kon mag-adto imaw inha hay diparaha gid ninyo imaw. 11 Ginakumusta man kamo ni Jesus nga ro apelyedo hay Justo. Sanday Aristarco, Markos, ag Jesus gid lang ro mga Judio nga nagabulig kakon iya sa pagturo parti sa paghari it Dyos. Nagbaskog gid ro akon nga buot dahil sa bulig ku tatlo ngara.
12 Ginakumusta man kamo ni Epafras nga inyong kasimanwa. Nagaserbi man ron imaw kay Kristo Jesus ag grabi gid ro anang pagpinangamuyo para kinyo agod maglig-on kamo ag owa it ikasaway sa inyong pagtuo ag sigurado gid ku tanan nga gusto it Dyos nga ipaobra kinyo. 13 Mapamatud-an ko ro pagtinguha ni Epafras para sa inyong kamaeayran pati man sa mga taga-Laodicia ag taga-Hierapolis. 14 Ginakumusta man kamo ni Demas ag pati man ku atong pinalangga nga doktor nga si Lukas. 15 Kumusta man inha sa atong mga igmanghod nga taga-Laodicia. Kumusta man kay Nimfa ag sa anang mga kaibahan nga mga tumueuo nga nagatilipon sa anang baeay agod magsimba.a
16 Pagkabasa ninyo ku sueat ngara hay siguraduha gid ninyo nga ikapadaea man ra sa Laodicia agod anda man ra nga basahon kon magtililipon sanda. Tapos, bue-a man dayon ninyo ro akong ginpadaea nga sueat kanda ag inyo man nga basahon sa mga tumueuo inha sa Colosas.
17 Hambaea man ninyo si Arkipo nga asikasuhon gid it husto ro obra nga ginsalig kana it Ginuo hasta nga matapos.
18 Ako mismo nga si Pablo ro nagasueat ku mga pagpangamusta ngara. Ayaw ninyo pagkalipati nga iya ako sa prisohan. Kabay pa nga pakamaayuhon kamo it Dyos.