Ro Sueat ni Pablo sa
Mga TagaFilipos
HAUNANG MGA BISAEA
Ro nagsueat ku sueat ngara hay si Apostol Pablo tag idto imaw sa prisohan dahil sa pagwali ku Mayad nga Balita. Abo ro nagapati nga idto imaw ginpriso sa Roma ku mga 61 AD. Nagsueat imaw sa mga taga-Filipos sa pagpasaeamat kanda sa andang bulig nga andang ginpadaea kanda. Maeapit gid ro mga taga-Filipos sa tagipusuon ni Pablo dahil sanda ro haunang mga tumueuo nga anang hatipon sa probinsya it Macedonya sa Europa. Ag sanda man ro nagbinulig ag nagadinumdum kay Pablo bisan owa eon sanda nagakilita.
Sa sueat ngara ni Pablo sa mga taga-Filipos hay ginpadumdum nana sanda nga naeuwas sanda dahil sa kaeuoy it Dyos bukon it dahil sa andang mga binuhatan. Ginapalig-on man ni Pablo ro andang buot nga magsalig pirmi sa Dyos nga nagatao it katawhayan it painoino ag sa anang promisa nga magabalik it uman si Ginuong Jesus nga andang Maneueuwas. Ginpadumdum na man sanda nga mangin mapainubuson ag matinumanon sa Dyos pareho sa andang Ginuo nga si Jesu-Kristo ag pirmi nanda paeabihon ro iba sobra pa sa andang kaugalingon.