Ro Sueat ni Pablo sa
Mga TagaFilipos
Mga Pagpangamusta
1
Rayang sueat hay halin kamon nga si Pablo ag Timoteo nga mga sueuguon ni Kristo Jesus.Nagapangumusta kami kinyo tanan nga mga katawhan it Dyos nga may maeueot nga kaangtanan kay Kristo Jesus ina sa syudad it Filipos ag pati man sa inyong mga manogdumaea ag sa mga nagaalagad kaibahan nanda. 2 Kabay pa nga pakamaayuhon kamo ku atong Dyos nga Ama ag ni Ginuong Jesu-Kristo ag taw-an it kalinong sa inyong tagipusuon.
Ro Pangamuyo ni Pablo sa mga Taga-Filipos
3 Nagapasaeamat ako sa akon nga Dyos kada hidumduman ko kamo. 4 Permi ako nga nagapangamuyo para kinyo tanan ag kada magpangamuyo ako hay nagakalipay gid ako 5 bangod sa inyong pagbulig kakon sa pagpaeapnaag ku Mayad nga Balita nahanungod kay Jesu-Kristo umpisa ku inyong pagtuo kana hasta makaron. 6 Sigurado ako nga ro Dyos nga nag-umpisa it paghimo it mayad kinyo hay imaw man ro magapadayon karon hasta sa adlaw nga magbalik si Kristo Jesus. 7 Tama eang nga makaraya ro akong baeatyagon kinyo tanan tungod maeapit kamo sa akon nga tagipusuon. Ginhueayan man ninyo ako ku inyong habaton nga grasya samtang iya pa ako sa prisohan. Ag paeareho kita tanan nga ginabuligan it Dyos sa atong pagpangapin ag pagpamatuod ku Mayad nga Balita. 8 Saksi ko ro Dyos nga nahidlaw gid ako kinyo tanan it duro tungod ginahigugma ko kamo pareho ku paghigugma kinyo ni Kristo Jesus. 9 Ag ro akong pangamuyo para kinyo hay nga ro inyong gugma hay padayon nga magtubo pati ro inyong kaaeam ag pag-intiendi 10 agod kaantiguhan kamo magpili kon ano ro pinakamayad ag mangin maputli kamo ag owa it ikasaway sa adlaw nga magbalik si Kristo. 11 Ag kabay pa nga mangin matarong ro inyong buhat sa bulig ni Jesu-Kristo agod ro Dyos hay pagapadunggan ag pagadayawon ku mga tawo.
Ro Mayad nga Resulta ku Pagkapriso ni Pablo
12 Mga igmanghod, gusto ko nga masayran ninyo nga ro nagkaeanabo ngara kakon hay nakabulig gid sa pagpaeapnaag ku Mayad nga Balita. 13 Tungod ro tanan nga gwardya it emperador iya sa palasyo ag ro tanan nga mga tawo iya hay nakasayod eon nga ginpriso ako dahil sa akon nga pagsunod kay Kristo. 14 Ag bangod man sa akong pagkapriso hay nagbaskog pa gid ro pagsalig sa Ginuo ku kaeabanan natong mga kaigmanghuran. Ngani nga owa eon sanda it kahadlok kundi nag-isog pa gid sanda sa pagwali ku mensahi parti kay Kristo.
15 Matuod nga ro iba nga nagawali parti kay Kristo hay nagahimo karon bangod nahisa sanda kakon ag gusto nanda nga maeabawan ako. Pero mayad mat-a ro tuyo ku iba 16 tungod gawali sanda parti kay Kristo dahil sa andang paghigugma kakon ay hasayran nanda nga hapriso ako dahil sa akong pagpangapin ku Mayad nga Balita. 17 Ugaling ro iba hay nagawali parti kay Kristo dahil nahisa sanda kakon. Eaom nanda nga kon sanda ro magwali hay mas gakalisod ako iya sa prisohan. 18 Pero owa it kaso, bisan ro andang tuyo sa andang ginaobra ngaron hay mayad o bukon basta nga ginawali ro parti kay Kristo hay malipayon eot-ang karon.
Huo, magakalipay pa gid ako 19 tungod sayod ko nga paagi sa inyong pangamuyo ag sa bulig it Espirito ni Jesu-Kristo, ro tanan nga nagkaeanabo kakon hay magaresulta sa akong kahilwayan. 20 Ginahandom ko gid ag ginapaabot nga indi gid ako mahuy-an sa Dyos kundi mag-isog pa gid sa gihapon ro akong buot agod dayawon si Kristo sa akong pagkabuhi o sa akong kamatayon man. 21 Tungod para kakon, ro akong kabuhi hay para eang kay Kristo. Ag kon mamatay ako hay mas mayad pa gid ay makaiba eon ako kana. 22 Pero hasta buhi pa ako hay magaresulta ra it mabinungahon nga pagpangabudlay para kay Kristo. Ngani kon ako ro papilion hay indi ko masayran kon ano ro akong pillion 23 tungod nalisdan ako magpili sa daywa. Gusto ko eon kunta magtaliwan agod makaibahan ko eon si Kristo ay ruyon ro pinakamayad. 24 Ugaling hay kinahangean pa ninyo ako iya ngani mas mayad nga buhi gihapon ako. 25 Nakasiguro ako nga para sa inyong kamaeayran nga buhi pa ako agod ibhan kamo ag buligan nga mas maglig-on ag mas magmalipayon pa gid kamo sa inyong pagtuo. 26 Nakasiguro man ako nga makabalik inha kinyo agod sa pagkililita naton it uman hay mas pa gid ro inyong pagpasaeamat ag pagdayaw kay Kristo Jesus tungod sa anang ginhimo kakon.
27 Ro importanti sa tanan hay nga ro inyong pagpangabuhi hay nagakabagay ag nagakasinanto sa ginaturo it Mayad nga Balita ni Kristo. Ngani bisan makabisita ako kinyo it uman o makabalita eang ako parti kinyo basta nga nagapadayon kamo sa inyong sambilog nga tuyo ag handom ag nagabueuligan kamo nga magtindog it malig-on sa Mayad nga Balita nga inyong ginatuuhan 28 ag owa kamo nahadlok sa inyong mga kaaway. Ro kaisog ninyo it buot hay paeatandaan nga pagapinahan sanda hasta sa owa it katapusan pero kamo hay euwason it Dyos. 29 Gintaw-an kamo nana it pribilihiyo nga magserbi kay Kristo bukon eang it pinaagi sa inyong pagtuo kana kundi pinaagi man sa inyong pag-antos dahil kana 30 tungod nakaagi eon kamo makaron it pareho nga mga kalisod nga haagyan ko kato ag sa mga pareho man nga kalisod nga ginaagyan ko makaron.