Tueara ro Pagpaubos ni Kristo
2
Bukon abi it nagbaskog ro inyong buot dahil sa inyong maeueot nga kaangtanan kay Kristo ag dahil ginahigugma nana kamo? Ag bukon abi it nagabueuylog kamo tungod ro Espirito Santo hay una kinyo ag dahil ginabaton ninyo ro kabuot ag kaeuoy it Dyos? 2 Ngani agod mangin tueos ro akong kalipay hay ginapangabay ko kamo nga padayunon ninyo ro inyong pagkaeasugot ag ro inyong paghigugmaanan. Magsambilog kamo sa inyong tuyo ag desisyon. 3 Indi kamo magmangin mahisaon ag mangin bugaeon kundi magpaubos kamo ag pahaegahi ro inyong isigkatawo eabaw pa sa inyong kaugalingon. 4 Ayaw eang ninyo pagpaeabiha ro inyong kamaeayran kundi ro kamaeayran man ku iba.5 Tueara ninyo ro pagginawi ni Kristo Jesus
6 nga bisan una kana ro kinaiya it Dyos hay ana nga ginpaiway ro anang kinamatarong bilang katupong it Dyos
7 ag ginpakakubos na ro anang kaugalingon ag nagpakatawo imaw ag nangin pareho it sueuguon.
8 Sa anang pagpakatawo, nagpaubos imaw ag nangin masinueundon sa Dyos bisan hasta sa kamatayon maskin rato hay makahueuya nga kamatayon nga pageansang sa krus.
9 Mawron nga ginpadunggan imaw it Dyos sa pwesto nga eabaw sa tanan ag ginpangaeanan it eabaw sa tanan nga mga ngaean
10 ngani ro tanan nga idto sa eangit, ro mga iya sa kalibutan ag pati ro mga sa idaeom it eugta hay magaeuhod sa pagsimba kana
11 ag magahambae nga si Jesu-Kristo ro Ginuo sa pagpadungog sa Dyos nga Ama.
Maghayag Pareho it Bituon sa Kadueom
12 Mga hinigugma ko, tag inha pa ako hay nagtuman gid kamo kakon. Ngani makaron nga owa eon ako inha hay mas pa gid nga dapat ninyo nga sundon ro akong ginabilin kinyo. Padayuna ro pagkabuhi adlaw-adlaw nga gapakita nga linuwas eon kamo it Dyos nga may pagtahod ag kahadlok kana. 13 Mahimo ninyo ron dahil ro Dyos ro nagatao kinyo it kabubut-on ag ikasarang nga himuon ro makapalipay kana.
14 Obraha ninyo ro tanan ninyong ginaobra nga owa it reklamo o binais 15 agod owa it makita nga ikasaway kinyo. Magkabuhi kamo nga putli nga mga unga it Dyos nga nagahayag pareho it iwag sa rayang madueom nga kalibutan ay nagakabuhi kamo kaibahan ku mga balingahag it paino-ino ag mga ginpataeang. 16 Makaruyon dapat ro inyong kabuhi samtang inyong ginapahayag kanda ro mensahi nga may gahom nga magtao it kabuhi nga owa it katapusan. Kon makaruyon ro inyong ginahimo hay ikapabugae ko sa adlaw nga magbalik si Kristo nga may pueos gid ro akong mga pagkabudlay inha kinyo. 17 Ro inyong pagtuo hay pareho it haead nga ginahaead sa Dyos. Ag kon kinahangean gid man nga iuea ro akong dugo kaibahan sa inyong haead hay igakalipay ko ag magabuylog ako sa kalipay ninyo tanan. 18 Dapat man nga magbuylog kamo sa akong kalipay.
Sanday Timoteo ag Epafrodito
19 Nagasalig ako kay Ginuong Jesus nga madali lang kara ag hipaadto ko eon inha si Timoteo agod malipay man ako sa anang ibalita kakon hanungod kinyo. 20 Si Timoteo gid lang sa tanan nakong kaibahan riya ro nahakat sa inyong kamaeayran. 21 Ro iba hay ro andang kamaeayran eang ro ginaisip ag bukon it kon ano ro ginapahaegahan ni Jesu-Kristo. 22 Kilaea eon ninyo si Timoteo ag hapamatud-an eon ninyo ro anang pagkatawo ay ginbuligan nana ako sa pagpaeapnaag ku Mayad nga Balita pareho it pagbulig it sangka unga sa anang ama. 23 Ngani paadtunon ko eagi kunta imaw inha kon hisayran ko kon paalin eon ako kara. 24 Ag nagasalig ako sa Ginuo nga sa indi magbuhay hay makaadto man ako inha kinyo.
25 Pero dapat siguro nga pabalikon ko eagi inha ro atong igmanghod nga si Epafrodito nga inyong ginpaadto iya agod magbulig kakon sa akong mga kinahangeanon. Kaibahan ko imaw sa pagserbisyo sa Dyos ag sa pagpangapin ku Mayad ng Balita. 26 Pabalikon ko imaw inha ay nahidlaw imaw kinyo tanan ag indi imaw himayang pagkasayod nana nga hasayran ninyo nga nagmasakit imaw. 27 Nagmasakit gid mat-a matuod imaw it grabi ag sangkiri eang imaw mamatay. Pero ginkaeuy-an imaw it Dyos ag nagmayad imaw. Bukon eang it imaw ro ginkaeuy-an it Dyos kundi pati man ako agod indi hidugangan ro akong kalisod. 28 Ngani gusto ko gid nga pabalikon imaw inha agod malipay kamo kon hikita imaw ag agod hibuhinan man ro akong pagkahawag. 29 Abi-abiha gid ninyo imaw nga may kalipay bilang igmanghod sa Ginuo kon magbalik eon imaw inha. Padunggi ninyo ro mga tawo nga pareho kana 30 tungod sangkiri eang imaw namatay dahil eang sa anang pagserbi kay Kristo. Anang gintaya ro anang kabuhi bilang inyong sal-i sa pagbulig kakon.