Ro Matuod nga Pagkamatarong
3
Isaea pa, mga igmanghod, ginahambae ko kinyo it uman nga magkalipay kamo dahil sa inyong maeueot nga kaangtanan sa Ginuo! Owa ako natak-i it pag-uman-uman it hambae ku akon eon kato nga ginhambae kinyo ay para gid ra sa inyong kamaeayran.2 Mag-andam gid kamo sa mga manogturo nga nagahimo it maeain ag nagapilit kinyo nga magpatuli kamo agod sinanda hay kabigon eon kamo it Dyos nga anang mga katawhan. Pareho ron sanda it bang-aw nga dapat likawan. 3 Pero ro matuod hay bukon it sanda kundi kita ro minatuod nga katawhan it Dyos tungod nagasimba kita sa Dyos sa bulig ku anang Espirito ag nagasalig kita kay Kristo Jesus para sa atong kaeuwasan. Owa kita gasalig sa pagtuli o sa ibang mga sueundanan o pagginawi nga ginahambae it tawo nga dapat sundon agod maeuwas. 4 Kon parti sa binuhatan hay pwede ako nga magsalig sa akong mga binuhatan. Kon may maghambae nga pinili imaw it Dyos dahil sa anang binuhatan hay mas kapin pa ako. 5 Ham-an abi? Gintuli ako tag waeong adlaw pa eang ako. Natawo ako nga Israelinhon ag halin sa linahi ni Benjamin ngani minatuod gid ako nga Hebreo sa dugo. Kon parti man sa pagtuman sa Kasuguan namon nga mga Judio hay gintuman ko man tanan ron tungod Pariseo ako kato. 6 Tungod sa akong [mainit] nga pagsunod sa among nga relihiyon, ginhingabot ko anay ro mga tumueuo ni Jesu-Kristo. Kon parti sa pagkamatarong dahil sa pagtuman sa Kasuguan hay owa kakon it ikasaway karon. 7 Eaom ko nga ruyon ngaron tanan hay para sa akong kamaeayran pero ginbilang ko ron nga owa it pueos dahil kay Kristo. 8 Ag pati ro tanan sa kalibutan hay ginabilang ko man nga owa it pueos ay indi ra makatupong sa haega ku akong pagkakilaea kay Kristo Jesus nga akong Ginuo. Dahil kana, ginatalikdan ko ro tanan ag ginabilang ko nga basura agod mangin akon si Kristo 9 ag matuod nga maagom ko ro maeueot nga kaangtanan kana. Ro akon nga pagkamatarong makaron hay bukon it dahil sa akon nga pagtuman sa Kasuguan kundi dahil ginbilang ako it Dyos nga matarong sa anang panueok paagi sa pagtuo ko kay Kristo. 10 Ro akong handom hay makilaea ko pa gid si Kristo ag maeksperyensyahan ro gahom nga nagbanhaw kana. Ag bukon eang it duyon, kundi gusto ko man mag-antos dahil kana pareho sa anang pag-antos dahil kakon ag haom ako mamatay sa pagsunod kana pareho sa anang pagkamatay dahil kakon. 11 Ag bisan mamatay ako hay nagasalig ako nga banhawon man ako it Dyos.
Ro Pagdaeagan Hasta sa Katapusan
12 Owa ako nagahambae nga haabot ko eon ro handom nakon ngaron ag perpekto eon ako. Pero nagapadayon ako sa pagtinguha nga abuton ro tanan nga gusto ni Kristo Jesus para kakon tungod duyon ro tuyo ku anang pagtawag kakon nga mangin ana. 13 Mga igmanghod, owa ako nagahambae nga haabot ko eon don, pero ro akon nga ginahimo hay ginakalipatan ro mga butang nga nagtaliwan ag ginatinguhaan ko nga tumanon ro anang gusto kakon sa paeaabuton. 14 Kon sa karera ron hay nagatinguha gid ako nga makaabot sa punta agod hibaton ko ro premyo nga itao it Dyos pinaagi kay Kristo Jesus nga owa it iba kundi ro pagtawag katon it Dyos nga magkabuhi sa eangit.
15 Makaruyon dapat ro paino-ino it mga malig-on eon ro pagtuo. Pero kon may una pa nga eain ro anang pagpati hay tud-an imaw it Dyos kon ano ro tama parti karon. 16 Ro importante hay padayunon ta nga tumanon ro tanan nga ginpahayag it Dyos katon.
17 Mga igmanghod, magkaeasugot kamo nga tuearon ro akong pagsunod sa kabubut-on it Dyos. Tan-awa ninyo ro mga nagasunod sa among halimbawa ag tueara man ninyo sanda. 18 Ginahambae ko kamo kara dahil abo nga mga tawo nga nagakuntra sa ginaturo parti sa kamatayon ni Kristo sa krus paagi sa andang maeain nga pagpangabuhi. Pilang beses ko eon nga ginhambae ra kinyo kato ag makaron hay nagatueo ro akong euha sa pagpanumdom kanda. 19 Pagapinahan gid sanda hasta sa owa it katapusan tungod ginapakadiyos nanda ro gusto ku andang eawas. Ginapabugae-bugae nanda ro mga dapat ikahuya ag ro anda eang nga ginapaino-ino hay ro mga butang iya sa kalibutan. 20 Pero kita hay mga pumueuyo it eangit ag idto magahalin ro atong ginapaabot nga Maneueuwas nga si Ginuong Jesu-Kristo. 21 Pag-abot nana riya hay ana nga bayluhan ro aton ngara nga maeuya nga eawas it eawas nga pareho ku anang eangitnon nga eawas. Mahimo nana ron pinaagi sa anang gahom nga makapaidaeom ku tanan nga butang kana.