Mga Bilin ni Pablo
4
Ngani, mga igmanghod ko nga pinalangga ag ginakahidlawan, akong kalipay ag kadungganan, tumana ra tanan ninyo ag magpakalig-on kamo sa inyong maeueot nga kaangtanan sa Ginuo.2 Eudias ag Sintique, nagahinyo ako kinyo nga magkaeasugot eon abi kamo ay magmaeanghod kamo sa Ginuo. 3 Ag ikaw man, matutum nakon nga amigo, buligi abi ro mga bayi ngaron nga magkaeasugot. Nakabulig gid ron sanda kakon sa akong pagpaeapnaag ku Mayad nga Balita kaibahan nanday Clemente ag ku iba pang nagbulig kakon. Ginsueat eon it Dyos ro andang ngaean sa libro nga listahan ku mga may kabuhi nga owa it katapusan.
4 Magkalipay kamo permi tungod sa inyong maeueot nga kaangtanan sa Ginuo. Ginahambae ko kinyo it uman nga magkalipay kamo. 5 Mangin mabuot kamo sa tanan nga tawo. Madali lang magbalik ro atong Ginuo. 6 Maskin ano ro matabo, indi gid kamo magpinalitik ku inyong ueo. Magpangayo kamo sa Dyos ku inyong mga kinahangean ag magpasaeamat man kana 7 ag taw-an dayon nana kamo it katawhayan nga indi matungkad ku isip it tawo. Dahil sa inyong maeueot nga kaangtanan kay Kristo Jesus, rayang katawhayan hay pinakabantay nga nagaprotektar sa inyong tagipusuon ag isip agod indi eon kamo magpalitik.
8 Raya ro akong katapusan nga bilin kinyo, mga igmanghod, paino-inoha permi kon ano ro mayad ag kon ano ro daeayawon pareho it mga butang nga husto, bukon it makahueuya, haeangdon, ikapabugae, matarong, putli ag mayad-ayad. 9 Tueara ninyo ro tanan ninyong hakita, habatian ag hatun-an kakon. Kon himuon ninyo ra hay ibhan kamo it Dyos nga nagatao it matawhay nga paino-ino.
Ro Pagpasaeamat ni Pablo sa andang Ginpadaea nga Bulig
10 Nalipay gid ako ag nagapasaeamat sa Ginuo tungod bisan sa kabuhayon nga owa ninyo ako pagbuligi hay ginapakita eon man ninyo makaron nga nagakabaeaka kamo kakon. Sayod ko nga owa ninyo ako halipati ugaling hay owa kamo kato it tsansa nga makabulig kakon. 11 Owa ako nagapaeubot-eubot nga may kinahangean ako. Kontento mat-a ako bisan ano ro akong kahimtangan. 12 Nakaagi man ako nga owa-owa kon amat ag gapaeanubra man kon amat. Pero bisan ano ro matabo hay hasayran ko eon ro sekreto kon paalin mangin kontento, kon busog ako o maskin gutom, kon bugana o maskin owa-owa. 13 Masarangan nakon ro tanan nga matabo tungod sa gahom ni Kristo nga nagapabaskog kakon.
14 Pero mayad man gihapon nga inyo ako nga gin-unungan sa akong kalisod. 15 Mga taga-Filipos, hasayran ninyo nga pagkatapos ku akong pagwali kinyo ku Mayad nga Balita ag paghalin nakon sa inyong probinsya it Macedonya hay owa gid kato it ibang grupo it tumueuo nga habuligan nakon ag nakabulig man kakon kundi kamo gid lang. 16 Bisan tag sa Tesalonica eon ako hay bukon eang it kaisaea kamo nga nagpadaea kakon it bulig para sa akong mga kinahangeanon. 17 Ginasambit ko ra bukon it dahil gusto ko eang nga regalohan, kundi gusto ko nga kamo hay baeusan it Dyos tungod sa inyong pagtao. 18 Habaton ko ro tanan nga inyong ginpadaea kay Efaprodito ag sobra pa ngani rato. Owa ako ginakueanga tungod sa inyong padaea. Pareho rato it mahumot nga haead sa Dyos ag nalipay gid imaw kato gabaton. 19 Ag ro akon nga Dyos hay magatao ku tanan ninyo nga ginakinahangean halin sa bugana nana nga manggad tungod sa inyong maeueot nga kaangtanan kay Kristo Jesus. 20 Dayawon ta hasta sa owa it katapusan ro aton nga Dyos ag Ama. Amen.
Katapusan nga mga Pagpangamusta
21 Kumusta lang sa tanan nga mga katawhan it Dyos inha nga nagatuo kay Kristo Jesus. Nagapangamusta man kinyo ro mga kaigmanghuran nga kaibahan nakon iya. 22 Tanan nga mga katawhan it Dyos iya sa Roma hay nagapangamusta man kinyo ag eabi gid ro nagaserbisyo sa palasyo it emperador.
23 Kabay pa nga padayon ninyo nga mauebtan ag maeksperyensyahan ro sobrang kabuot ku atong Ginuong Jesu-Kristo.