Ro Sueat ni Pablo sa
Mga Taga-Colosas
Haunang mga Bisaea
Ku tyempo ni Apostol Pablo, ro Colosas hay isaea anay nga ka bantog nga syudad. Makaron, ro Colosas hay sakop ku nasyon nga Turkey. Ro syudad it Colosas hay mga 160 kilometros halin sa syudad it Efeso.
Ro mga Phrygiano hay mga tumandok sa raya nga lugar pero abo man nga mga Griego ag mga Judio nga nag-ilistar idto. Siguro hay may una man nga mga Phrygiano, Griego ag Judio nga mga tumueuo ni Kristo idto sa Colosas.
Ku tyempo nga nagsueat si Apostol Pablo sa mga taga-Colosas hay basi owa pa imaw nakaadto o nakawali ku Mayad nga Balita idto. Mahambae naton ra dahil suno sa Kapitulo 2, bersikulo 1 ku raya nga sueat hay owa nana makilaea it personal ro kaeabanan ku mga tumueuo idto.
Kat gin-obra ni Pablo daya nga sueat hay idto imaw sa prisohan. Ro prisohan ngato hay basi idto sa syudad it Roma (Mga Binuhatan 28:16-31). Ginpriso imaw dahil sa anang pagtuo kay Jesus. Samtang idto si Pablo sa prisohan hay ginbisitahan imaw ni Epafras. Imaw ra ro hauna nga nagwali ku Mayad nga Balita idto sa Colosas. Ginsugiran ni Epafras si Pablo nga may mga tawo idto nga nagaturo it saea. Duyon ro rason kon ham-an it ginsueatan nana ro mga tumueuo sa Colosas. Gusto nana nga sanda hay magpadayon sa pagtuo sa minatuod nga mensahi parti kay Jesus ag indi magpadaea-daea sa mga nagaturo it saea.
Raya ro daywang ka pinakadelikado nga ginaturo ku mga Judio nga nagaturo it saea idto sa Colosas nga makasamad sa pagtuo ku mga tumueuo idto:
1. Ginaturo nanda nga indi pagbatunon it Dyos ro isaeang ka tawo kon indi anay imaw mangin Judio. Ro halimbawa karon hay kon ro isaeang ka bukon it Judio hay mangin tumueuo, dapat gid anay nga magpatuli imaw agod ipakita nga imaw hay hatapoe eon sa mga tawo nga ginpili it Dyos, ag raya hay ro mga Judio. Ro sabat ni Pablo kara hay mabasa sa 2:11-12.
2. Ginaturo man nanda nga ro mga tumueuo hay dapat nga magsunod gihapon sa mga kasuguan nga gintao it Dyos kay Moises ag dapat gid nga mag-obserbar ku mga bueuhaton sa mga kapistahan it mga Judio agod batunon sanda it Dyos. Naghambae man sanda nga ro tanan nga mga tumueuo hay dapat gid nga magsunod sa iba pa nga mga ritwal ag sueundanan ku mga Judio parti sa kon ano ro bawae ag bukon it bawae nga kan-on ukon imnon. Ro sabat ni Pablo parti kara hay makita sa 2:13-16.
May mga Griego man sa Colosas nga nagaturo it saea mga makasamad sa pagtuo ku mga tumueuo idto. Raya ro daywa sa andang ginaturo:
1. Ro mga Griego hay nagapati nga ro matuod nga Dyos hay mayad pero bukon it imaw ro Dyos nga nagtuga ku kalibutan. Nagapati sanda nga ro mga maeain nga espirito nga may mahina nga gahom kaysa sa Dyos ro nagtuga ku kalibutan ag ku tanan nga iya. Ag nagapati man sanda nga ro tanan sa kalibutan hay maeain.
Ro kabilugan ku buot hambaeon it sabat ni Pablo sa rayang mga saea nga pagturo hay makaraya: “Ro Dyos, kaibahan si Kristo, ro nagtuga ku tanan nga una sa eangit ag sa eugta (1:16). Si Kristo ro nagahari sa tanan nga gintuga ag imaw ro nagakontrol ku tanan agod ro tanan nga butang hay magapabilin sa anang tama nga lugar (1:17). Kat namatay si Kristo sa krus hay ana nga ginpirdi ro tanan nga maeain nga mga espirito maskin mauno sanda kagamhanan. Ngani, owa it rason ro mga tumueuo nga mahadlok sa mga maeain nga espirito dahil si Jesus hay mas gamhanan kaysa kanda tanan” (2:9-10).
2. Ro mga Griego hay nagapati man nga ro eawas it tawo hay maeain. Imaw ron ngani nga kon kanda ro Maneueuwas nga Pinadaea it Dyos hay indi makaadto iya sa kalibutan sa eawas it tawo ag indi puydi nga ikaeansang sa krus. Ngani, kon kanda hay basi ro eawas ngato ni Jesus hay ana ku isaeang ka mueto, ukon si Jesus hay bukon gid it Maneueuwas. Nagapati sanda nga si Jesus hay isaea eamang sa mga mayad nga tawo nga nagkabuhi sa rayang kalibutan.
Ro kabilugan ku buot hambaeon it sabat ni Pablo sa rayang saea nga mga pagturo hay makaraya: “Si Jesus hay katupong it Dyos sa tanan nga butang. Ro tanan nga pagkaDyos it Dyos hay una sa eawas ni Jesus kat imaw hay nangin tawo (1:19). Pati ro tanan nga pwerting kaaeam ag hasayran it Dyos hay una kay Jesus (2:3). Paagi sa pag-antos ni Jesus kat gineansang imaw sa krus bilang pina sa tanan nga maeain nga hinimuan it tawo, ro tanan-tanan sa eangit ag sa eugta hay nakapanumbalik sa Dyos (1:19-20).