Mga Bilin sa mga Unga ag sa mga Ginikanan
6
Mga unga, tumana ro inyong mga ginikanan tungod duyon ro gusto it Ginuo ag tama ron nga obrahon. 2 Dumduma ninyo ro sugo it Dyos nga, “Dapat ninyo tahaon ro inyong ama ag ina.a” Raya hay importantib gid nga sugo ag may kaibahan ra nga promisa nga 3 “agod mangin mayad ro inyong pagpangabuhi ag magakabuhi kamo it maeawig iya sa kalibutan.”4 Mga tatay, ayaw ninyo pagpinaakiga ro inyong mga unga dahil sa owa sa lugar nga pagdisiplina kundi pabahuea sanda nga kasayod kon ano ro mayad nga pamatasan nga suno sa kabubut-on it Ginuo, ag disiplinaha sanda kon gaobra sanda it maeain.
Mga Bilin sa mga Ulipon ag sa Andang mga Amo
5 Mga ulipon, tumana ro inyong mga amo iya sa kalibutan nga may kahadlok ag pagtaha kanda. Tumana it hantop sa inyong tagipusuon ro andang ginasugo kinyo pareho ku inyong pagtuman kon si Kristo eon ro nagasugo kinyo. 6 Ayaw eang pag-obraha ro inyong trabaho kon nagatan-aw sanda agod dayawon nanda kamo kundi tumana ro tanan nandang ginapaobra kinyo kutob sa inyong masarangan ay duyon ro gusto it Dyos nga obrahon ninyo bilang mga ulipon ni Kristo. 7 Obraha ro inyong trabaho nga may gana tungod ro minatuod nga amo nga inyong ginaserbihan hay bukon eang it tawo kundi ro Ginuo mismo. 8 Sayod kamo nga may premyo gid ro Ginuo sa kada mayad nga buhat it tawo bisan ulipon man imaw o bukon.
9 Ag kamo man nga mga amo, tratara ninyo it mayad ro inyong mga ulipon. Ayaw sanda pagpaeaga tungod sayod ninyo nga kamo ag ro inyong mga ulipon hay may sangka Amo man lang nga imaw ro Ginuo sa eangit ag owa imaw it pinaeabi.
Ro mga Pinakaarmas ag Pinakataming nga Pangsukoe Naton kay Satanas
10 Ro akong katapusan nga mga bilin kinyo hay raya. Magpakalig-on kamo pirmi paagi sa gahom it Ginuo ay ro anang gahom hay indi matupungan. 11 Pareho it soldado nga nagasuksok ku tanan nga kagamitan nana kon mag-adto sa gira, gamita man ninyo ro tanan nga gintao it Dyos katon agod masukean ninyo ag maperdi ro mga pagpataeang ni Satanasc. 12 Ginahambae ko ra ay owa kita nagapakig-away sa tawo kundi sa mga pinuno it mga maeain nga espirito, sa iba pa nga may otoridad, sa mga nagagahom sa mga tawo nga una pa sa kadueom sa rayang kalibutan ag sa mga maeain nga espirito nga una sa kahanginan. 13 Ngani gamita gid ninyo ro tanan nga gintao it Dyos agod kon sukubon kamo it kaaway bisan anong oras hay makasukoe kamo. Ag kon tapos eon ro inaway hay malig-on gihapon kamo.
14 Ngani magpahaom kamo ag raya ro inyong mga kinahangeanon agod haom kamo sa pagsukob kinyo it kaaway: Ro inyong pagtindog sa kamatuuran hay pareho it pahad. Ro inyo nga pagpangabuhi it matarong hay pareho it taming sa inyo nga dughan. 15 Dapat nga haom kamo pirmi nga magpanaw agod magsugid it Mayad nga Balita nga makapapanumbalik ku mayad nga relasyon it tawo sa Dyos. Raya hay pareho it pagsuksuk ninyo ku sapatos it soldado. 16 Ro inyong pagtuo kay Jesu-Kristo hay pareho it taming nga makapaeong pirmi ku mga tentasyon ni Satanase nga pareho it mga nagakaeayo nga pana nga ginatira nana kinyo. 17 Ro inyong pagsalig nga gineuwas kamo ni Jesu-Kristo hay pareho it helmet nga nagatabon sa inyong ueo. Ag ro Mensahi it Dyos nga ginapadumdum kinyo ku Espirito Santo ro inyong pinakaespada. 18 Sa inyong pagpakig-away kay Satanas, permi kamong magpangamuyo ag mag-ampo sa bulig it Espirito Santo bisan sa anong kahimtangan. Magbantay kamo permi ag indi magkataka sa pagpangamuyo ag pag-ampo para sa tanan nga katawhan it Dyos.
19 Pangamuyui man ninyo ako nga tud-an ako it Dyos sa akong ihambae kon magturo ako ag mangin maisog sa pagsugid ku Mayad nga Balita nga owa anay ginpahayag kato tanan. 20 Ginpili ako ni Jesu-Kristo nga mangin mensahero ku rayang Mayad nga Balita ag dahil sa akong pagwali karon hay iya ako sa prisohan makaron. Ngani pangamuyui ninyo ako nga mangin maisog sa akong pagwali ay dapat ko ron nga obrahon.
Katapusan nga mga Pagpangamusta
21 Si Tiquico eon lang ro magasugid kinyo ku tanan nga nagakaeanabo kakon. Palangga ron naton imaw nga igmanghod sa pagtuo ag matutum nga nagaserbisyo sa Ginuo. 22 Ngani ginapaadto ko imaw inha kinyo agod sugiran nana kamo ku mga nagakatabo kamon iya ag agod pabaskugon man nana ro inyong buotf. 23 Kabay pa nga taw-an kamo ku Dyos nga atong Ama ag ni Ginuong Jesu-Kristo it pagdihait sa kada isaea bilang magmaeanghod sa pagtuo. Ag kabay pa nga pabahueon nanda ro inyong paghigugma sa kada isaea ag palig-unon pa gid ro inyo nga pagtuo. 24 Kabay pa nga pakamaayuhon gid it Dyos ro tanan nga nagahigugma kay Ginuong Jesu-Kristo it paghigugma nga owa nagakupas bisan hasta hin-uno.