Ro Sueat ni Pablo sa
Mga Taga-Galacia
Haunang mga Bisaea
Suno sa dagaya nga mga mangin-aeamon, ro ginatumod ni Pablo nga “Galacia” hay ro mga banwa it Iconio, Listra, Derbe and Antioquia nga sakop ku probinsya it Pisidia. Ro mga lugar ngara hay kaibahan sa mga lugar nga gin-adtonan nanday Pablo ag Bernabe ku primero nanda nga pagbyahe agod magturo ku Mayad nga Balita parti kay Kristo (Mabasa ra sa Mga Binuhatan 13 ag 14). Abo nga mga tawo sa ratong mga lugar ro nagpati sa andang ginturo. Ugaling, pagkahalin ku grupo nanday Pablo, may nag-aeabot man nga mga Judio nga nagpalitik sa ueo ku ratong mga nagpati dahil ginhinambae ku mga Judio ngato nga kon magsalig eang sanda sa andang pagtuo kay Kristo hay indi gihapon sanda maeuwas. Dapat pa kuno nga magtuman sanda sa Kasuguan nga gintugyan sa mga Judio. Sinanda pa gid hay bukon it matuod ro mga ginturo ni Pablo kundi tinahi-tahi eang nga istorya. Suno pa kanda hay bukon kuno it matuod nga apostol si Pablo ay tag iya pa si Ginuong Jesus sa kalibutan hay bukon si Pablo it isaea sa dose nga ka apostoles nga nagsunod kana.
Ngani, pagkabati ni Pablo karon, ginpadaehan nana ku sueat ngara ro mga tumueuo sa Galacia agod masayran nanda kon ano gid ro kamatuuran nga halin sa Dyos parti sa ratong mga butang. Ginpadumdum gid sanda ni Pablo nga owa it ibang makaeuwas sa tawo kundi ro matuod nga pagsalig ag pagpati sa kamatayon ni Jesu-Kristo. Paagi eang sa ginhimo ni Jesus kita puydi nga maeuwas sa pina it Dyos bisan indi kita makatuman it husto sa tanan-tanan nga Kasuguan. Raya ro tema ku rayang sueat.
Raya man ro pinakahauna sa tanan nga sueat nga ginpadaea ni Pablo sa mga nagpati sa anang mga ginturo sa mga lugar nga anang gin-adtonan. Ginsueat nana ra ku mga 50 A.D., pagkataliwan it 17 anyos nga nagbalik si Jesus sa eangit.