Ro Sueat ni Pablo sa
Mga Taga-Galacia
Mga Pangamusta
1
Raya nga sueat hay halin kakon nga si Pablo nga apostol ag nangin apostol ako bukon it dahil sa pagpili o pagsugo it tawo kundi sa pagpili ag pagsugo ni Jesu-Kristo ag ku Dyos nga Ama nga nagbanhaw kana.2 Ako, kaibahan ku tanan nga mga kaigmanghuran sa pagtuo riya hay nagapangumusta kinyo nga mga nagatuo kay Jesus inha sa mga kabanwahan it probinsya it Galacia. 3 Kabay pa nga pakamaayuhon kamo it Dyos nga atong Ama ag ni Jesu-Kristo nga atong Ginuo ag taw-an it kalinong sa inyong tagipusuon. 4 Ginhaead ni Jesu-Kristo ro anang kabuhi agod matubos kita sa pina ku atong mga saea ag agod hilwayon kita sa paggahom it kaeainan sa rayang panyempo. Ro anang ginhimo ngato hay suno sa kabubut-on it Dyos nga aton man nga Ama. 5 Daeayawon gid imaw hasta sa owa it katapusan. Amen.
Hangawa gid si Pablo nga Nagpati ro mga taga-Galacia sa mga Saea nga Ginaturo
6 Mga igmanghod, hangawa gid ako ay kadali eang kinyo magtalikod sa Dyos nga sa anang sobrang kabuot hay nagtawag kinyo nga mangin anang katawhan paagi kay Kristo. Ham-an it nagasunod eo’t-a kamo sa ibang turo nga ginatawag nga Mayad kuno nga Balita? 7 Sa minatuod eang hay owa eon it iba pa nga Mayad nga Balita kundi ro parti kay Kristo. Ro mga nagaturo ngaron hay nagapalitik eang ku inyong ueo ag gusto nanda nga bayluhan ro Mayad nga Balita parti kay Kristo. 8 Ngani bisan kami pa o anghel man nga halin sa eangit nga magwali kinyo it eain sa Mayad nga Balita nga ginwali eon namon kinyo hay pinahan sa impyerno. 9 Ginhambae eon namon ra kato kinyo pero umanon nakon. Ro nagawali it Mayad nga Balita nga eain kaysa sa among ginsugid kinyo hay pinahan gid sa impyerno.
10 Ano ro inyong eaom, nagapadayaw-dayaw ako sa mga tawo sa akong ginhambae? Owa! Ro akon eang hay gusto ko nga malipay ro Dyos kakon. Kon nagahandom ako nga dayawon it mga tawo hay indi ako dapat mangin ulipon ni Kristo.
Nagpasalig si Pablo nga si Jesus ro Ginhalinan ku Anang Ginaturo Bukon it Tawo
11 Mga igmanghod, gusto ko nga masayran ninyo nga ro Mayad nga Balita nga ginturo ko kinyo hay owa naghalin sa paino-ino it tawo. 12 Owa ko man ron hatun-i sa tawo ag owa man ako karon pagtud-i kundi ginpahayag ron kakon ni Jesu-Kristo. 13 Habatian ninyo kon mauno ro akon nga kabuhi anay kato tag gasunod pa ako sa relihiyon namon nga mga Judio. Grabi kato ro akong paghiningabot sa mga nagatuo kay Jesu-Kristo ag gintinguhaan ko nga dueaon sanda sa kalibutan. 14 Owa man it makatupong kakon sa akong mga katubo-tubo sa pagsunod sa mga sueundanon ku among relihiyon ag ginapahaegahan ko gid ro mga kaugalian ku among mga kalolo-lolohan. 15,16 Pero bisan makaruyon ako, bago pa ako natawo hay ginpili eon ako it Dyos, ag tungod sa anang sobrang kabuot hay ana ako nga gintawag nga magserbi kana. Ginpakamayad nana nga ipahayag kakon kon sin-o gid ro ana nga Unga agod iwali ko ro parti kana sa mga bukon it Judio. Pagkapahayag nana karon kakon hay owa eagi ako mag-adto bisan kanyo agod magpaturo. 17 Owa man eagi ako mag-adto sa Jerusalem agod magpaturo idto sa mga hauna pa kakon nga nangin apostoles. Idto eagi ako nag-adto sa Arabiaa ag pagkatapos hay nagbalik ako sa syudad it Damascus.
18 Pagkataliwan it tatlong dag-on, nag-adto ako sa Jerusalem agod makigkita kay Pedro, ag kinse diyas ako nga nagtenir idto kana. 19 Ag owa man ako it hakita nga ibang apostoles idto mageuwas kay Santiago nga igmanghod ku atong Ginuo. 20 Saksi ro Dyos nga matuod ro akong ginasueat ngara!
21 Paghalin ko sa Jerusalem, nag-adto ako sa maeayo nga mga probinsya it Syria ag Cilicia. 22 Owa pat-a ako kato hakilaea sa personal ku mga nagatuo kay Kristo sa probinsya it Judea. 23 Ro anda eang nga hasayran hay ro sugid halin sa ibang lugar nga ro nagahingabot anay kanda idto kato hay nagawali eon makaron ku Mayad nga Balita parti sa pagtuo kay Jesus bisan kato ngani hay nagapanghugot gid imaw nga punggan ro mga tawo nga magpadayon sa pagtuo karon. 24 Gindayaw gid nanda ro Dyos tungod ana ako nga ginbag-o.