Ginbaton si Pablo ku Ibang mga Apostoles
2
Pagkataliwan it katorse anyos, nagbalik ako sa Jerusalem kaibahan si Bernabe. Gindaea ko man si Tito. 2 Nagbalik ako idto ay ginpahayag ron kakon it Dyos. Ag kat idto ako, nag-istorya kami ku mga ginakilaea nga mga pinuno nga kami-kami eang ag ginpaathag ko kanda ro akon nga ginawali nga Mayad nga Balita sa mga bukon it Judio. Gusto ko abi masayran nanda nga tama ro akon ngaron nga ginawali agod indi sanda mageaom nga owa it pueos ro akong pagtinuro sa mga bukon it Judio halin pa kato. 3 Kompormi ma’t-a sanda sa akong ginaturo. Bisan ngani si Tito nga akong kaibahan nga bukon it Judio hay owa nanda pagpilita nga magpatuli. 4 Pero may mga nagapakuno-kuno nga mga tumueuo ni Kristo nga naghambae nga dapat nga tulion si Tito. Nag-intra sanda sa mga tumueuo ay may andang maeain nga tuyo nga samaron ro atong pagpati nga dahil sa atong maeueot nga kaangtanan kay Kristo Jesus hay hilway eon kita ag indi eon dapat magtuman ku mga kasuguan ku relihiyon it mga Judio agod nga maeuwas. Gusto abi nanda hay mangin ulipon eon man kita ku mga kasuguan ngaron. 5 Pero owa gid kami magpadaea-daea kanda bisan sangkiri agod indi mabayluhan ro matuod nga ginaturo ku Mayad nga Balita nga inyong ginapatihan.6 Ratong mga ginakilaea nga mga pinuno hay owa man it hakita nga diperensya/kueang sa akong ginaturo. (Kon kakon hay bukon it importante kon ano ma’t-a sanda ngatoa tungod ro importante sa Dyos hay ro kabubut-on it tawo bukon it kon ano o sin-o imaw.) 7 Ginkilaea pa ngani nanda nga gintugyanan ako it Dyos nga magwali ku Mayad nga Balita sa mga bukon it Judio pareho man kay Pedro nga gintugyanan nana nga magwali karon sa mga Judio. 8 Ro Dyos nga nagtao kay Pedro it abilidad nga matuman ro anang katungdanan bilang apostol sa mga Judio hay imaw man ro nagtao kakon it abilidad nga matuman ko ro akong katungdanan bilang apostol sa mga bukon it Judio. 9 Ngani pagkasayod man ku mga ginakilaea nga mga mataas nga pinuno it mga tumueuo nga sanday Santiago, Pedro ag Juan nga ginpakamaayo ro akong pagturo sa mga bukon it Judio hay ginbaton nanda kami ni Bernabe bilang andang kaibahan sa pagsugid ku Mayad nga Balita. Nagkaeasugot kami nga ako ag si Bernabe ro maadto sa mga bukon it Judio ag sanda sa mga Judio. 10 Ro pangabay man lang kamon ku mga pinakapinuno ngato hay padayon nga buligan ro mga pobre nga mga tumueuo sa Jerusalem ag ruyon man ro nailaan gid nakon nga obrahon.
Ginsaway ni Pablo si Pedro sa Antioquia
11 Pero kaisaea kato nga idto si Pedro sa Antiokia hay may haobra imaw nga saea ngani ginbuslahan ko imaw. 12 Kato abi hay permi imaw nga nagaiba sa pagkaon sa mga tumueuo nga bukon it mga Judiob. Pero pag-abot idto ku pilang ka mga Judio nga ginpaadto ni Santiago hay owa eon si Pedro mag-iba sa pagkaon sa mga tumueuo nga bukon it Judio ag nagalikaw eon imaw kanda, maskin sayod nana nga bukon it saea ro anang ginaobra. Nahadlok abi imaw sa mga Judio ngara nga kaibahan sa grupo nga nagapilit gid nga dapat tumanon ro Kasuguan. 13 Ro iba nga mga tumueuo nga mga Judio hay nagtuead man kay Pedro sa anang pagpakuno-kuno. Pati man si Bernabe hay hatapnan man kanda. 14 Sayod ako nga ro andang ginaobra hay owa gakasinanto sa matuod nga ginaturo it Mayad nga Balita, ngani pagtilipon namon nga mga tumueuo hay akon nga ginbuslahan si Pedro sa atubang ku tanan nga idto. Hambae nakon kana, “Bisan Judio ka hay matsa bukon ka man it Judio tungod owa ka eon gatuman sa mga kasuguan it relihiyon naton nga mga Judio. Owa ka ngani nagatuman karon hay ham-an it imong ginapilit ro mga bukon it Judio nga magtuman nga matsa mga Judio man sanda? 15 Kita hay mga Judio eagi pagkatawo naton ag owa kita natapoe sa mga bukon it Judio nga owa nakakilaea sa Dyos. 16 Pero makaron hay sayod eon naton nga indi kita mangin matarong sa panueok it Dyos paagi sa pagtuman sa atong Kasuguan kundi paagi sa atong pagtuo kay Jesu-Kristo. Ngani nagtuo kita kay Kristo Jesus agod mangin matarong sa panueok it Dyos sa atong pagtuo kay Kristo bukon it paagi sa pagtuman sa atong Kasuguan. Owa gid it bisan sin-o nga mangin matarong dahil sa anang pagtuman sa Kasuguan.
17 Pero kami nga mga Judio nga nagatuo eon kay Kristo agod mangin matarong sa panueok it Dyos hay ginabilang nga makasasaea ku amon nga kaparehong Judio dahil owa eon kami nagatuman sa among Kasuguan. Kon mawron, nagakahueugan baea ron nga ginatueod kami ni Kristo nga magkasaea? Imposible’t-a ron! 18 Ro minatuod hay kon balikan ko pa ro akong gintalikdan eon nga Kasuguan ag magtuman eon man ako karon agod mangin matarong sa panueok it Dyos, dikaron ko’t-a ginapakita nga ako hay makasasaea. 19 Tag ginatininguhaan ko nga tumanon ro Kasuguan, dikaron ko man naeubtan nga bisan alinon ko hay indi ko gid ron matuman it husto. Pero makaron hay bukon eon ako it obligado nga tumanon ro Kasuguan agod mangin matarong sa panueok it Dyos. Nahilway eo’t-ang dikaron agod magakabuhi ako nga makapalipay kana. 20 Ginabilang ko nga gineansang ag namatay man ako sa krus kaibahan ni Kristo. Bukon eon it ro akong gusto sa akon nga kabuhi ro akon nga sundon kundi ro ay Kristo nga gusto, tungod iya imaw nagakabuhi kakon. Ag ro akon nga adlaw-adlaw nga pagkabuhi hay bunga it akong pagtuo sa Unga it Dyos. Imaw ro naghigugma kakon ag naghaead ku anang kabuhi para kakon. 21 Ngani owa ko ginabalewalaa ro sobrang kabuot it Dyos, tungod kon mangin matarong man lang gali ro sangka tawo sa panueok it Dyos paagi sa pagtuman sa Kasuguan hay owa eon it pueos ro kamatayon ni Kristo.