Ginatao ro Espirito Santo Dahil sa Pagtuo kay Jesu-Kristo Bukon it sa Pagtuman sa Kasuguan
3
Mga kaumangon gid-a kamo nga mga taga-Galacia! Matsa haeumay’t-a kamo nga nagpinati kamo sa mga saea nga ginaturo. Kato hay haeubtan gid ninyo ro kahueugan ku kamatayon ni Jesu-Kristo sa krus nga ginpaathag ko it klaro nga mayad. 2 May sangka bagay eang nga gusto kong masayran kinyo. Ro inyo baea nga pagtuman sa Kasuguan ro rason nga gintao it Dyos kinyo ro Espirito Santo o dahil nagtuo kamo kay Jesu-Kristo pagkabati ninyo ku Mayad nga Balita? 3 Nagkaumangon eon gid-a matuod kamo! Sa bulig it Espirito Santo hay nag-umpisa kamo nga magsunod kay Kristo. Hay ham-an it nagasalig kamo makaron sa inyong ikasarang nga makapadayon sa pagsunod kana hasta mangin perpekto kamo? 4 Owa eon gid-a baea it pueos ro inyong haagyana? Kabay pa nga may pueos gid rato. 5 Ham-an abi it ginatao kinyo it Dyos ro Espirito Santo ag ham-an abi it nagapakita imaw kinyo it mga makangawa-ngawa nga milagro? Dahil baea nagtuman kamo sa Kasuguan? Bukon! Kundi dahil nagtuo kamo kay Jesu-Kristo pagkabati ninyo ku Mayad nga Balita.6 Nasueat sa Sagrado nga Kasueatan,
“Nagtuo si Abraham sa ginpromisa it Dyos ag tungod karon hay ginbilang imaw it Dyos nga matarong sa anang panueok.”b
7 Ngani dapat ninyo nga maeubtan nga ro mga nagatuo sa Dyos pareho kay Abraham hay ginakabig man nga mga inapo ni Abraham.c 8 Ginpahayag eon kato pa sa Sagrado nga Kasueatan nga plano eon it Dyos nga bilangon nga matarong ro mga bukon it Judio kon magtuo sanda kana. Ngani ginsugid it Dyos kay Abraham ro Mayad nga Balita nga, “Paagi kimo hay pakamaayuhon ro tanan nga mga tawo sa bilog nga kalibutan.”d 9 Ngani ro tanan nga nagatuo hay ginapakamaayo man it Dyos pareho ku anang pagpakamaayo kato kay Abraham tungod sa anang pagtuo.
10 Pero ro tanan nga nagasalig sa andang pagtuman sa Kasuguan agod mangin matarong sa panueok it Dyos hay pagapinahan nana. Ro rason karon hay dahil nga nasueat sa Sagrado nga Kasueatan nga, “Ro owa nagatuman permi it husto sa tanan-tanan nga Kasuguan hay pagapinahan it Dyos.”e 11 Ngani maathag nga owa it mangin matarong sa panueok it Dyos paagi sa anang pagtuman sa Kasuguan. Nasueat abi sa Sagrado nga Kasueatan nga, “Ro tawo nga ginpakamatarong it Dyos dahil sa anang pagtuo hay may kabuhi nga hasta sa owa it katapusan.”f 12 Eain gid-a ro atong pagsalig sa ginhimo ni Kristo kaysa sa pagsalig sa atong pagtuman sa Kasuguan. Dumduma nga nasueat sa Sagrado nga Kasueatan nga ro nagasalig sa anang pagtuman sa Kasuguan hay dapat nga magtuman karon it husto sa bilog nana nga kabuhi. g 13 Gintubos kita ni Kristo sa pina ku aton nga pageapas sa Kasuguan, tungod imaw ro ginpinahan imbis nga kita. Natabo kana ro nasueat sa Sagrado nga Kasueatan nga,
“Ro tanan nga pinatay ag einansang sa kahoy hay ginpinahan it Dyos.”h
14 Gintubos kita ni Kristo Jesus sa pina agod paagi kana ro mga bukon it Judio hay makaambit man ku pagpakamaayo it Dyos nga ginpangako kay Abraham ag agod kita hay makabaton ku Espirito Santo nga anang ginpangako sa tanan nga nagatuo.
Nagabaton kita ku Ginatao it Dyos Dahil sa Anang Promisa, Bukon it Dahil sa Atong Ginahimo
15 Mga igmanghod, akon kamo nga taw-an it halimbawa. Kon sa mga tawo pa, kon hapirmahan eon ro sangka kasugtanan hay indi ron puydi nga balewalaon ag indi man ron puydi nga bayluhan o dugangan. 16 Raya ro akong gustong maeubtan ninyo. Ro promisa kato it Dyos kay Abraham nga paagi kana hay pakamaayuhon ro tanan nga katawhan hay natuman paagi sa isaea eang sa anang mga inapo. Ro gustong hambaeon ku ratong promisa hay bukon it paagi sa dagaya nga inapo ni Abraham matuman rato kundi sa sambato eang ag rato hay si Kristo. 17 Ro ginpromisa it Dyos kay Abraham hay ginpromisa gid nana bago nana gintao ro Kasuguan kay Moises ku ulihi, pagkataliwan it 430 anyos. Pero ro Kasuguan hay owa it gahom nga makasamad sa promisa ngato o magbaylo it bisan ano dikato. 18 Kon mabaton man lang it mga tawo ro ginatao it Dyos dahil sa andang pagtuman sa Kasuguan hay nagakahueugan nga ro anang pagtao hay bukon it dahil sa anang promisa kundi dahil sa andang ginhimo. Pero bukon it makaruyon. Gintao it Dyos kay Abraham ro anang gintao dahil ginpromisa nana rato, bukon it dahil sa pagtuman ni Abraham sa Kasuguan.
Ro Katuyuan ku Kasuguan
19 Hay ano gali ro katuyuan ku Kasuguan? Gintao ron it Dyos agod ipakita sa mga tawo nga makasasaea sanda. Duyon ro katuyuan ku Kasuguan hasta nga natawo ro isaea sa mga inapo ni Abraham nga si Kristo nga magatuman ku ginpromisa it Dyos. Makita pa gid nga mas mahaega ro promisa it Dyos kaysa sa Kasuguan tungod pagtao nana ku Kasuguan hay may ginpaagyan pa’t-a imaw. Ginsugo nana ro mga anghel agod itao ro Kasuguan kay Moises, tapos gintao man rato ni Moises sa mga tawo. 20 Pero kat nagpromisa ro Dyos kay Abraham hay owa imaw it ginsugo nga iba. Imaw’t-a mismo ro naghambae kay Abraham.
21 Basi may maghambae nga nagakueuntrahan ro Kasuguan it Dyos ag ro anang promisa. Owa sanda nagakueuntrahan dahil ro katuyuan ku kada isaea hay eain. Kon ro Kasuguan hay makatao it kabuhi nga owa’t katapusan, makahambae kita nga ro pagtuman sa Kasuguan hay makahimo sa tawo nga matarong sa mata it Dyos agod makabaton sanda it kabuhi nga owa’t katapusan.i 22 Ginsueat sa Sagrado nga Kasueatan nga ro tanan nga tawo hay pareho it priso ku gahom it saea ngani nagpromisa ro Dyos agod ro tanan nga magatuo kay Jesu-Kristo hay makabaton ku ginpromisaj ngato.
23 Bago pa nag-abot ro oras nga makatuo ro tawo kay Kristo hay pareho kita it priso nga gingwardyahan it Kasuguan hasta nga ginpahayag nga puydi eon kita magtuo kana. 24 Ro Kasuguan hay pareho man it isaeang ka strikto nga manogbantay naton hasta nga makatuo kita sa Maneueuwas nga si Kristo agod himuon nana kita nga matarong sa mata it Dyos. 25 Nag-abot eon ro oras ngaron ngani owa eon kita sa podir ku strikto nga manogbantay ngato.
26 Ngani tungod sa inyong pagtuo kay Kristo Jesus hay mga unga eon kamo tanan it Dyos. 27 Ro batasan ku mga ginbawtismuhan bilang tanda nga sanda hay sumueunod ni Kristo hay pareho eon ku anang batasan. 28 Ngani owa ginatueuka it Dyos ro mga tumueuo kon Judio sanda o bukon, ulipon o bukon, bayi man o eaki tungod sambilog eang kamo dahil sa inyong maeueot nga kaangtanan kay Kristo Jesus. 29 Ngani kon may kaangtanan eon kamo kay Kristo hay ginabilang eon kamo nga mga inapo ni Abraham ag mabaton man ninyo ro ginpromisa it Dyos kana.