Bukon Kamo it mga Ulipon Kundi mga Unga it Dyos
4
Hara ro sangka halimbawa agod maeubtan pa gid ninyo ro akong mga ginhinambae. Ro owa pa it buot nga unga nga manunubli ku manggad ku anang ama nga namatay hay pareho eang it ulipon sa ruyong panimaeay nga owa it podir dahil indi pa nana mabuytan ro manggad ngaron bisan imaw ro tag-ana karon tanan. 2 Ham-an? Tungod may nagadikta pa kana kon ano ro anang obrahon ag may administrador sa anang manggad hasta nga mag-abot ro tama nga oras nga gintaeana ku anang ama nga puydi eon imaw nga magpatikang ku anang paeanublion. 3 Kat owa pa kita kaeubot parti sa pagtuo kay Jesus hay pareho anay kita it unga ngato nga ginadiniktahan kon ano ro obrahon. Owa pa kita it habadwan kundi magtilinuman eang ku kaugalian ag sueundanan nga gin-obra-obra man lang ku mga tawo iya sa kalibutan. 4 Pero pag-abot it oras nga gintaeana it Dyos hay ginpaadto nana iya sa kalibutan ro anang unga. Tawo gid imaw tungod gin-unga imaw it isaeang ka bayi nga Judio, ag nagkabuhi imaw nga hasakpan ku andang Kasuguan. 5 Ginpaadto imaw iya agod nga tubuson kita sa pina dahil indi gid kita makatuman it husto sa Kasuguan ngato ag agod mangin mga unga kita it Dyos. 6 Ngani tungod mga unga nana kita, ginpadaea it Dyos ro Espirito Santo nga ginpromisa ni Jesusa iya sa aton nga tagipusuon. Paagi sa Espirito Santo hay makatawag eon kita sa Dyos it, “Palangga ko nga Ama”. 7 Ngani ro kada isaea kinyo hay bukon eon it ulipon, kundi unga eon it Dyos. Ag tungod mga unga nana kamo hay itao nana kinyo ro tanan nga anang ginpromisa nga itao sa anang mga unga.Ro Pagkahakat ni Pablo sa mga taga-Galacia
8 Kato anay nga owa pa’t-a kamo kakilaea sa Dyos hay gin-ulipon kamo paagi sa pagsinimba sa mga diyos-diyos nga indi dapat simbahon ay bukon sanda it matuod. 9 Pero makaron hay kilaea eon ninyo ro Dyos ag ro mas manami pa gid hay ginkilaea eon kamo it Dyos. Ngani ham-an it gusto eon man ninyo nga magbalik sa mga owa it pueos ngaron nga mga sueundanon nga indi makabulig kinyo? Gusto baea ninyo nga mangin ulipon it uman ku mga sueundanon ngaron? 10 Ginahambae ko ron ay eaom ninyo nga kon magselebrar kamo ku pinasahi nga mga adlaw, buean, tyempo ag mga dag-on nga ginaselebrar ku mga Judio hay maeuwas kamo. 11 Ginakuebaan ako sa inyong ginaobra ngaron ay basi kon mangin owa it pueos ro akong pagkinabudlay sa pagturo kinyo.
12 Mga igmanghod, nagapakitluoy ako kinyo nga tueara ninyo ako tungod nagtuead ako kinyo nga owa nagasunod sa mga sueundanon namon nga mga Judio.
Owa ako nagahambae nga ginhimuan ninyo ako it maeain ku pag-abot ko kato inha agod magturo kinyo. 13 Sayod kamo nga ro rason ku primero ko nga pagwali inha kinyo ku Mayad nga Balita hay dahil nagmasakit ako.b 14 Ag bisan nga ro akong pagmasakit hay nagpakalisod kinyo, owa ninyo ako pagsika-sikaa o pagkangidlisi. Imbis nga ruyon ro inyong obrahon kakon, inyo ako nga ginbaton nga matsa sangka anghel it Dyos o mas pa karon, nga matsa si Kristo Jesus mismo ako. 15 Ako mismo hay makahambae nga kon puydi eang nga eukdon ninyo kato ro inyong mga mata agod itao kakon hay basi ginhimo eon ron ninyo. Malipayon gid-a kamo kato. Ano ro natabo nga eain eo’t-a kamo makaron? 16 Inyo baea ako nga ginabilang nga kaaway dahil nga ginawali ko kinyo ro kamatuuran?
17 Ro mga nagaturo ngaron kinyo hay nagapakita-kita nga nahakat gid sanda, pero bukon it mayad ro andang tuyo kinyo. Gusto nanda nga indi kamo mag-iba sa mga nagaturo ku matuod nga ginaturo ag gusto nanda nga kanda eang kamo mahakat ag sa andang ginaturo eang magpati. 18 Owa it maeain nga may nahakat kinyo, basta ro andang tuyo hay mayad. Nahakat kamo kato kakon ngani kabay pa nga permi gihapon kamo nga nahakat kakon, inha man ako o owa. 19 Palangga ko nga mga unga, ro akong pamatyag kato hay pareho sa bayi nga nagapasaeapo tag nagahueat ako nga magtuo kamo kay Kristo. Makaron hay makaruyon eon man ro akong pamatyag samtang nagahueat ako nga ro inyong batasan hay mangin pareho eon gid ku ay Kristo. 20 Indi ko masayran kon ano pa ro akong ikabulig kinyo ngani gusto ko’t-a kunta hay inha ako makaron agod masayran ninyo nga nahakat gid ako kinyo bisan matsa mabug-at ro akong mga pamisaea sa akong sueat ngara.
Ro mga Halimbawa ni Hagar ag ni Sara
21 May pangutana ako kinyo nga mga nagapilit nga dapat gid tumanon ro Kasuguan agod nga maeuwas. Kasayod baea kamo kon ano ro ginsueat sa Kasuguan ngaron? 22 Nasueat rikaron nga si Abraham hay may daywang ka unga nga eaki. Ro sambilog hay unga nana sa anang ulipon nga si Hagar ro ngaean, ag ro sambilog hay unga nana sa anang asawa nga si Sara nga bukon it ulipon.c 23 Ro unga ni Abraham sa anang ulipon hay natawo suno gid sa natural nga pagpangunga it tawo. Pero ro anang unga sa anang asawa nga si Sara hay katumanan ku promisa it Dyos kana nga makaunga pa sanda bisan magueang eon sanda nga mayad.
24 Ro natabo ngaron hay magamit naton nga halimbawa. Ro daywang ka bayi ngato hay kahalimbawa it daywang ka kasugtanan. Ro sambilog nga kasugtanan hay gintao it Dyos idto sa bukid it Sinai kat gintao nana kay Moises ro Kasuguan nga nag-ulipon sa mga tawo. Ro ulipon nga si Hagar hay kahalimbawa ku kasugtanan ngato. 25 Matuod nga si Hagar hay kahalimbawa ku bukid it Sinai nga idto sa Arabia. Kahalimbawa man imaw ku syudad it Jerusalem makaron tungod nga ro Jerusalem ro simbolo ku nga mga Judio nga pareho it ulipon sa andang pagtinuman sa Kasuguan. 26 Pero si Sara ma’t-a nga bukon it ulipon hay kahalimbawa ku eangitnon nga Jerusalemd ag kita hay anang mga pinakaunga tungod bukon kita it ulipon it Kasuguan.e
27 Pareho ra sa nasueat sa Sagrado nga Kasueatan nga,
“Magkalipay ka bayi nga indi kapangunga, Maghugyaw ka sa kalipay, ikaw nga owa nakaagi it pagpasaeapo, tungod ikaw nga inaywanan ku imong asawa hay mas abo ro imong mga unga sa ulihi kaysa sa bayi nga owa pagbueagi ku anang asawa.”f
28 Mga igmanghod, kita nga nagatuo kay Jesus hay ginabilang nga mga unga ni Abraham nga katumanan ku ginpromisa it Dyos kana pareho kay Isaac nga natawo bilang katumanan ku ginpromisa it Dyos kay Abraham. 29 Kato hay ginhingabot ku ay Abraham nga unga nga natawo suno sa natural nga pagpangunga it tawo ro anang unga nga natawo paagi sa gahom it Espirito Santo. Bisan hasta makaron hay nagakatabo ra. Ginahingabot man kita ku mga nagapilit gid nga dapat naton tumanon ro Kasuguan agod nga maeuwas. 30 Pero ano ro nasueat sa Sagrado nga Kasueatan parti karon? Ginhambaean si Abraham nga paeaason nana ro ulipon ag ro anang unga tungod indi dapat makasamit it hueay ro unga ngaron it ulipon sa paeanublion ku unga it bukon it ulipon. g 31 Ngani mga igmanghod, ro kabilugan ku akong ginahinambae hay raya: owa kita ginabilanga nga mga unga it ulipon kundi ana ku bukon it ulipon.