Indi Dapat Naton Pagbalewalaon ro Paghilway ni Kristo Katon
5
Ginhilway eon kita ni Kristo ngani bukon eon kita it ulipon hasta hin-uno sa pagtinuman sa Kasuguan agod nga maeuwas. Ngani panindogi ninyo ro inyong kahilwayan ag ayaw eon kamo magpaulipon it uman sa Kasuguan.2 Tandai ninyo ra. Ako nga si Pablo ro nagahambae kinyo nga mangin owa eon it pueos ro kamatayon ni Kristo para kinyo kon magpatuli pa kamo agod mangin matarong sa mata it Dyos. 3 Ihambae ko kinyo it uman nga kon magpatuli kamo agod mangin matarong sa mata it Dyos hay obligado man kamo nga tumanon permi it husto ro tanan-tanan sa Kasuguan. 4 Ngani kamo nga nagatinguha nga mangin matarong sa mata it Dyos paagi sa pagtuman sa Kasuguan hay owa eon it eabot kay Kristo ay ginbalewala ninyo ro sobrang kabuot it Dyos. 5 Pero kita’t-a nga nagatuo kay Kristo, paagi sa Espirito Santo nga iya sa atong tagipusuon hay sigurado gid nga bilangon kita nga matarong sa mata it Dyos ag ginapaabot gid ron naton nga may kalipay. 6 Dahil sa aton nga maeueot nga kaangtanan kay Kristo Jesus, bukon it importante kon hatuli man kita o owa. Ro importante hay ro pagtuo naton kay Kristo nga ginapakita naton paagi sa paghigugma sa atong isigkatawo.
7 Kato hay nagakabuhi kamo nga nagasunod it mayad sa kamatuuran nga ginturo kinyo. Sin-o’t-a ro nagsuesue kinyo nga indi eon magpati sa kamatuuran ngato? 8 Sigurado gid nga bukon it ro Dyos ro nag-obra karon dahil imaw ro nagtawag kinyo nga mangin anang katawhan. 9 Ro saea ngaron nga ginaturo kinyo hay makataeapon. Pareho ron it pangpaalsa it tinapay. Bisan sangkiri eang ro imong ibutang hay mapaalsa nana ro tanan nimong ginbutangan. 10 Pero dahil sa atong maeueot nga kaangtanan sa Ginuo, may salig ako kinyo nga indi kamo magpati sa mga ginaturo nga eain kaysa sa akong ginaturo. Ag ro bisan sin-o nga nagapalitik ngaron ku inyong ueo hay pagapinahan it Dyos.
11 Mga igmanghod, kon matuod nga nagaturo gihapon ako nga dapat pa magpatuli ro mga nagasaylo sa relihiyon it mga Judio hay ham-an it ginahingabot pa ako ku akong mga kasimanwa nga mga Judio? Bukon it matuod ron ay kon nagaturo gid man ako it makaruyon hay owa eon kunta ako gaturo nga ro kamatayon ni Jesus sa krus eang ro daean agod maeuwas ag owa eon kunta naakig kakon ro akong mga kasimanwa. 12 Kon ako ro pasugtan, ro mga nagasuesue ngaron kinyo nga indi magpati sa matuod nga mensahi hay indi eang magpatuli kundi magpakapon pa gid!
13 Kamo’t-a mga igmanghod hay gintawag it Dyos agod mangin hilway sa inyong pagkaulipon sa Kasuguan. Pero ayaw man kamo maghambae nga dahil ginhilway eon kamo hay pasugtan lang ninyo ro inyong makasasaea nga kinaiya. Imbis nga makaruyon hay serbihi ninyo ro kada isaea pareho it ulipon tungod sa inyong paghigugmaanan. 14 Tungod ro tanan nga sugo sa Kasuguan hay gintingob sa sambato eang nga sugo nga, “Higugmaa ro imong isigkatawo pareho ku imong paghigugma sa imong kaugalingon.”a 15 Pero kon pareho kamo it mga ilahas nga sapat nga nagaueusang ag nagakaean-an hay mag-andam kamo ay samaron ninyo karon ro kada isaea hasta magkaeasipot kamo.
Magpasakop Kamo Permi sa Pagkontrol ku Espirito Santo
16 Raya pa ro akon nga nahambae kinyo. Magpasakop kamo permi sa pagkontrol ku Espirito Santo. Kon himuon ninyo ra hay indi eon dayon ninyo hipagustuhan ro kailigbon ku inyong makasasaea nga kinaiya. 17 Ro gusto ku atong makasasaea nga kinaiya hay kuntra sa gusto it Espirito Santo ag ro gusto it Espirito Santo hay kuntra sa gusto ku atong makasasaea nga kinaiya. Magkaaway ron sanda ag mawron nga indi ninyo mahimo ro inyong gustong obrahon. 18 Pero kon ginagiyahan kamo ku Espirito Santo hay bukon eon kamo it matsa mga ginaid sa pagtinuman sa Kasuguan agod maeuwas.
19 Sayod eon naton kon ano ro hilig ku makasasaea nga kinaiya it tawo. Ruyon hay ro paghulid sa bukon it asawa, paghimo it mga mahigko nga buhat, pagpagusto sa mga maeain nga kailigbon it eawas, 20 pagsimba sa mga diyos-diyos, pagpangbabaylan, pagkueontrahan, pag-ilinaway, pagpangimon, pagkaugot, pagkahikaw, pagbueueag, pagsipak-sipak, 21 pagkahisa, paghinilong, pagminaoy nga nagaresulta sa paghimo it mga maeaw-ay nga buhat sa kada isaea ag iba pang bagay nga kaparis karon. Ginapaandaman ko kamo it uman pareho ku akon kinyo kato nga pagpaandam nga ro nagahimo karon hay indi matapoe sa mga pinasahi nga katawhan it Dyos.
22 Pero kon ginagiyahan kita ku Espirito Santo, makaraya ro bunga karon sa atong kabuhi: kita hay mahigugmaon, malipayon, may paghidait sa kada isaea, mapinasensyahon, mabuot, mayad magtratar sa isigkatawo, masaligan, 23 maeueo ag may pagpugong sa kaugalingon. Owa it bisan ano nga layi nga nagabawae ku mga ruyon ngaron. 24 Ro mga sumueunod ni Kristo Jesus hay pareho man it nageansang eon sa krus ku andang makasasaea nga kinaiya pati ku andang mga handom ag kailigbon nga bukon it tama dahil nagtalikod eon sanda karon. 25 Ag tungod ginbag-o eon it Espirito Santo ro atong kabuhi hay dapat nga magpagiya man kita kana permi. 26 Indi man kita dapat magpabugae, indi kita magpang-away ag indi kita maghilisaan.