Maghimo it Mayad sa Tanan
6
Mga igmanghod, kon may una kinyo nga hatentar nga magkasaea, kamo nga mga ginagiyahan it Espirito Santo hay dapat nga magbulig kana nga makapanumbalik sa tama nga pagsunod kay Kristo. Pero himua ninyo ron nga may kaeueo ag mag-andam man kamo ay basi matentar man kamo nga magkasaea. 2 Magbueuligan kamo sa inyong mga kalisod tungod isaea ron sa mga paagi nga matuman ninyo ro sugo ni Kristo nga dapat nga maghigugmaanan kita. 3 Kon may gaisip nga eabaw pa imaw sa iba bisan bukon man hay ana eang nga ginaluko ro anang kaugalingon. 4 Ro kada isaea hay dapat nga mag-usisa kon tama ro ana mismong mga buhat imbis nga magkompara ku anang buhat sa iba. Dapat nga ro makapalipay kana hay ro ana mismong mayad nga buhat bukon it dahil nga mas mayad ro anang buhat kaysa sa buhat ku iba. 5 Akon ron nga ginahambae dahil ro kada isaea abi hay manabat sa ana mismong binuhatan.6 Ro ginatud-an it mensahi it Dyos hay dapat nga hueayan man nana ro nagaturo kana ku mga pagpakamaayo nga habaton nana.
7 Ayaw ninyo paglukuha ro inyong kaugalingon nga puydi kamo magpagusto it pagpakasaea ag pabay-an eang ron it Dyos, tungod kon ano ro gintanom it sangka tawo hay imaw man ron ro anang anihon. 8 Ro nagatuman permi sa anang makasasaea nga kinaiya hay magaani it owa’t katapusan nga pina. Pero ro nagatuman permi sa paggiya it Espirito Santo hay magaani it kabuhi nga owa’t katapusan. 9 Indi kita madis-ayri ag magpundo sa paghimo it mayad tungod nga pag-abot it tama nga oras hay magaani man kita it mayad kon indi kita pageuyahan it buot. 10 Ngani indi gid naton pagpataliwanon ro kahigayunan nga makahimo it mayad sa tanan nga tawo eabi gid sa mga kapareho naton nga mga tumueuo.
Katapusan nga mga Bilin ag Bendisyon
11 Ako mismo ro nagasueat rikara nga parti ku raya nga sueata. Tan-awa ninyo kon man-o it eagko ro akong agi. 12 Ro mga nagapilit ngaron kinyo nga magpatuli kamo hay nagapakita-kita ag nagapadayaw-dayaw sa mga tawo nga nagasunod sanda sa Kasuguan. Pero sa minatuod hay nagalikaw eang sanda nga hingabuton ku andang kapareho nga mga Judio kon magturo sanda nga ro kamatayon gid lang ni Kristo sa krus ro makaeuwas sa tawo. 13 Bisan ngani nagpatuli sanda hay owa man nanda ginatumana it husto ro tanan nga nasueat sa Kasuguan. Gusto nanda nga magpatuli kamo agod ikapabugae nanda sa mga tawo nga nagatuman gid kamo sa andang ginaturo. 14 Pero kon kakon, ro akong ginapabugae gid lang hay ro pagkamatay ku atong Ginuong Jesu-Kristo sa krus. Tungod paagi sa anang kamatayon sa krus hay patay eon ro akong kaila sa mga maeain nga butang nga nailaan ku mga tawo iya sa kalibutan ag kon kanda hay owa man ako it pueos. 15 Bukon it importante kon natuli kita o owa, kundi ro pinakaimportante hay ginbag-o eon it Dyos ro atong kinaiya. 16 Kabay pa nga ro tanan nga nagatuman ku akong mga ginpanghambae ngara hay taw-an it kalinong sa andang tagipusuon ag kaeuy-an it Dyos ay sanda mismo ro mga matuod nga katawhan it Dyosb
17 Iya sa akong eawas ro mga inueatan ku mga pagbakoe kakon dahil sa akong pagturo ku mensahi nga ginsalig kakon ni Jesus. Ngani umpisa makaron, ayaw eon ninyo ako pagpaproblemaha sa inyong pagpati it saea nga mga ginaturo ngaron.
18 Mga igmanghod, kabay pa nga padayon ninyo nga maeubtan ag maeksperyensyahan ro sobrang kabuot ku atong Ginuong Jesu-Kristo. Amen.