Ẍchijalok aj chusunl yi chocopon tan chisubleꞌn wunak
4
1 Poro eꞌuꞌ jun cꞌoloj wajwutz, quil cyocsajuꞌ cyakil yi eꞌ yi na cyal yi Ryos na akꞌon quen cyajtzaꞌkl. Quiꞌ. Baꞌn tcuꞌn choꞌkuꞌ tan maꞌleꞌn cyajtzaꞌkl, tan lajluchaxeꞌn yi ko choꞌn na saj yi cyajtzaꞌkl te Ryos, nka quiꞌ. Na wiꞌnin chijaleꞌn ajchusunl yi eꞌ tuꞌ subul nak. 2 Je jun xtxolbileꞌj tan maꞌleꞌn cyajtzaꞌkl tan tilweꞌn yi ko bintzinin yi Espíritu Ryos na tzan tan quichꞌeyeꞌn, nka quiꞌ: Cyakil yi eꞌ yi at Espíritu Sant tan quichꞌeyeꞌn na cyocsaj cyeꞌtz yi Jesús yaꞌstzun yi Cristo, yi ulnak tzoneꞌj wuxtxꞌotxꞌ chi yaj taneꞌn. 3 Quiꞌc yi Espíritu Sant tetz talmaꞌ jun yaj yi ko qui na tocsaj yi choꞌn sajeꞌn Jesús te Ryos. Ma na contr iꞌ teꞌj. Poro bitaꞌnt cyanuꞌ yi at tulbil yi jun ajtzaꞌklaꞌtz, yi ẍchajeꞌ yi anticristo. Ej nin tzan ẍchajoneꞌn yi jun ajtzaꞌklaꞌtz jaluꞌ.4 Poro eꞌuꞌ jun cꞌoloj wajwutz, eꞌuꞌ tetz Ryos. Ja wiꞌt chixcyeꞌuꞌ scyeꞌj yi eꞌ subul nakaꞌtz, na yi jun yi najlij te cyalmaꞌuꞌ, mas cham iꞌ swutz yi jun yi najlij tetz cyalmaꞌ yi eꞌ mal wunakaꞌtz. 5 Yi ajtzaꞌkl yi at le chiwiꞌ, choꞌn na jal tzoneꞌj wuxtxꞌotxꞌ. Nin jaltaꞌtz na chitzan tan xtxoleꞌn, nin na xom chiwiꞌ wunak te chiyol. 6 Poro yi oꞌ ketz, oꞌ tetz Ryos. Ej nin yi eꞌ yi na el chitxum tetz Ryos, na tzun cyocsaj cyeꞌtz yi xtxolbil yi na katzan tan xtxoleꞌn. Tan yi xtxolbileꞌj, na lajluchax naꞌ scyetz eꞌ yi na cyocsaj yi bintzi, ej nin naꞌ scyetz eꞌ yi subij cheꞌt.
Ryos na chajon yi lokꞌ ib
7 Eꞌuꞌ jun cꞌoloj wajwutz, kalokꞌeꞌ kib skibil kib, na yi jun ajtzaꞌklaꞌtz choꞌn na saj tu Ryos. Alchok scyetz yi at lokꞌ ib tuchꞌ, meꞌl cyꞌajl Ryos iꞌ. Ej nin na el xtxum te tajbil Ryos. 8 Alchok scyetz yi quiꞌc lokꞌ ib tuchꞌ, nkꞌeꞌtz tetz Ryos, na yi lokꞌ ib choꞌn na saj te Ryos. 9 Ja lajluchax yi lokꞌ ib yi at tu Ryos tan tuꞌ yi sajeꞌn ẍchakol yi jun tal ẍutuj Cyꞌajl tzoneꞌj wuxtxꞌotxꞌ tan tkꞌol yi kutzꞌajbil. 10 Tan yi xtxolbileꞌj, na lajluchax yi mbiꞌtz yi lokꞌ ib. Nkꞌeꞌtz yi oꞌ-k nkachajon lokꞌ ib tetz Ryos, ma na Ryos nchajon sketz, na nin saj ẍchakol yi tetz Cyꞌajl tan xconeꞌn tetz jun katxꞌixwatz tan stzajseꞌn kil.
11 Eꞌuꞌ jun cꞌoloj wajwutz, yi ko yaꞌtz taneꞌn Ryos tan ẍchajleꞌn lokꞌ ib sketz, nchaꞌtz bin oꞌ ketz, kalokꞌeꞌ bin kib ketz skibil kib. 12 Cyaꞌl jun yi jajk tech wutz Ryos. Poro kol kalokꞌ kib skibil kib, na lajluchax ẍchiwutz wunak yi xomij Ryos skeꞌj, nin chebeleꞌn cuntuꞌ na kajepon tan banleꞌn taneꞌn. 13 Na el katxum tetz yi oꞌ tetz Ryos nin xomij iꞌ skeꞌj tan tuꞌ yi na kanachon teꞌj yi najlij yi Espíritu Sant skeꞌj. 14 Na yi oꞌ ketz yi oꞌ apostl ja kil tan kawutz yi Ryos chakon tzaj yi Cyꞌajl tan chicolpeꞌn wunak. Itzun iꞌaꞌtz na katzan tan xtxoleꞌn. 15 Alchok scyetz yil tal ẍchiwutz wunak yi Jesús yaꞌstzun yi Cyꞌajl Ryos, najlij tzun Ryos te talmaꞌ. Nchaꞌtz iꞌ tetz choꞌn at iꞌ tkꞌab Ryos.
16 Yi oꞌ ketz, ja el katxum tetz, nin na kocsaj yi na pekꞌ Ryos skeꞌj na iꞌ taw nin iꞌ xeꞌ yi lokꞌ ib. Ej nin yi eꞌ yi na chitzan tan ẍchajleꞌn yi lokꞌ ib, yaꞌstzun yi eꞌ yi xomcheꞌ te Ryos. Ej nin yaꞌstzun yi eꞌ yi xomij Ryos scyeꞌj. 17 Kol kaxom te yi jun ajtzaꞌklaꞌtz, chebeleꞌn cuntuꞌ kachajeꞌ jun lokꞌ ib yi chin tzꞌaknak cuꞌn. Ej nin ko yaꞌtz kulej, quil kabisun swutz Ryos yil tzꞌoc pujleꞌn xtisyaꞌ le wiꞌtzbil kꞌejlal. Na kol koꞌc tzꞌaknak cuꞌn nin kol kachaj lokꞌ ib chi banak Cristo, qui tzun kaxob yil tzꞌoc pujleꞌn xtisyaꞌ. 18 Qui na bisun nin qui na xob jun yaj yi at lokꞌ ib tuchꞌ. Ko at lokꞌ ib tu jun yaj, na xcyeꞌ tan xiteꞌn yi xoꞌw tu bis yi at teꞌj, na tan tuꞌ yi qꞌuixcꞌuj yi txꞌaklij swutz jun yaj, yaꞌstzun na xoꞌwleꞌj, nin yaꞌstzun na bisun taꞌn. Ko na bisun jun yaj, iꞌtz tan paj yi txeꞌn jepon tan banleꞌn taneꞌn yi lokꞌ ib.
19 Ryos nchajon yi lokꞌ ib sketz, yi ntaxk el katxum tetz. Chaꞌstzun te na kapekꞌ teꞌj jaluꞌ. 20 Poro ko at jun yaj yi na tal: “At lokꞌ ib skaxoꞌl tu Ryos,” nin ko na chiꞌch cꞌuꞌl yi jun yajaꞌtz te jun tajwutz, laꞌj tzun iꞌ-tz. Na ko quiꞌc lokꞌ ib skaxoꞌl tu jun kajwutz yi txiclij skawutz, ẍeꞌn tzun kalokꞌ Ryos na quiꞌc bin iꞌ at skawutz. 21 Jesucristo akꞌon te jun caꞌwleꞌj sketz: Ko at lokꞌ ib skaxoꞌl tu Ryos, tajweꞌn tan jaleꞌn lokꞌ ib skaxoꞌl tu junt kajwutz.