Kaxcyek tan cyajseꞌn cyen cyakil eꞌchk yab ajtzaꞌkl
5
1 Cyakil yi eꞌ yi na cyocsaj yi Jesús yaꞌstzun yi Cristo, eꞌ cuꞌn meꞌl cyꞌajl Ryos. I bin jaluꞌ, ko na kapekꞌ te Ryos, tajweꞌn yil kapekꞌ scyeꞌj yi eꞌ meꞌl cyꞌajl Ryos. 2 Ko na katzan tan lokꞌeꞌn Ryos, ej nin ko na katzan tan banleꞌn taneꞌn yi tetz caꞌwl, na tzun kapekꞌ scyeꞌj yi eꞌ meꞌl cyꞌajl Ryos. 3 Ko na katzan tan lokꞌeꞌn Ryos, na tzun katzantz tan banleꞌn taneꞌn yi tetz caꞌwl. Ej nin yi tetz caꞌwlaꞌtz, quiꞌc qꞌuixbel. 4 Quiꞌc qꞌuixbel, na cyakil yi eꞌ meꞌl cyꞌajl Ryos chixcyek tan cyajseꞌn cyen cyakil eꞌchk yab ajtzaꞌkl yi xomcheꞌ wunak teꞌj, tan tuꞌ yi kꞌuklij chicꞌuꞌl te Jesucristo. 5 Yi eꞌ yi baꞌn na chixcyeꞌ tan cyajseꞌn cyen yi yab ajtzaꞌkl tetz tzoneꞌj wi munt, iꞌtz yi eꞌ yi na cyocsaj cuꞌn yi Jesús yaꞌstzun yi Cyꞌajl Ryos.6 Nin yi jun Jesúsaꞌtz iꞌ yi jun yi jeꞌ aꞌ twiꞌ yi tulakeꞌn skaxoꞌl, nin iꞌ yi jun yi el kojxuj yi ẍchꞌel. Poro nkꞌeꞌtz ntin tan yi aꞌ yi njeꞌ twiꞌ, ma na nchaꞌtz tan yi aꞌ tu ẍchꞌel yi el kojxuj swutz pasyon. Nin iteꞌn Espíritu Sant na aꞌlon sketz yi bintzinin yi xtxolbilaꞌseꞌj. Nin nkꞌeꞌtz laꞌj iꞌ. 7 Nchaꞌtz, at ox stiw yi choꞌn ateꞌ tcyaꞌj yi na cyal yi bintzinin yi xtxolbileꞌj. Iꞌtz Kataj Ryos, tu yi jun yi na biꞌaj Yol, ej nin yi Espíritu Sant. Yi oxaꞌtz, junit cyajtzaꞌkl. 8 Nchaꞌtz, at ox xtxolbil yi bajijnak tzoneꞌj wuxtxꞌotxꞌ yi na ẍchaj sketz yi bintzinin yi xtxolbil yi Jesús yaꞌstzun yi Cristo yi colpinl ketz. Yi bajx iꞌtz yi porer yi Espíritu Sant yi na lajluchax skawutz. Yi caꞌp iꞌtz yi mbi bajij yi jeꞌn aꞌ twiꞌ Jesús. Nin yi toxiꞌn iꞌtz yi mbi ekaꞌn tan yi quimichil yi ban Jesús swutz pasyon. Yi ox puntilaꞌtz junit xtxolbil na ẍchaj. 9 Ko na kocsaj chiyol wunak, ¿mbi tzuntz qui na kocsaj yi yol yi alijt tan Ryos yi mbiꞌtz yi munl yi tetz Cyꞌajl? 10 Cyakil yi oꞌ yi na kocsaj yi Jesús yaꞌstzun yi Cyꞌajl Ryos, na kanachon te yi yaꞌstzun yi bintzi. Poro cyakil yi eꞌ yi qui na cyocsaj yi yol Ryos, laꞌj taneꞌn Ryos ẍchiwutz, na qui na cyocsaj yi yol Ryos yi tal iꞌ: “Aẍ inCyꞌajl.” 11 Poro yi mero xeꞌ yi xtxolbil yi bitaꞌnt kaꞌn, iꞌtz yi at jun itzꞌajbil akꞌij sketz tan Ryos. Ej nin yi jun itzꞌajbilaꞌtz choꞌn na jal kaꞌn te Cristo. 12 Na ko choꞌn kꞌuklij cꞌuꞌl jun yaj te yi Cyꞌajl Ryos, ja tzun cambaj iꞌ yi jun itzꞌajbilaꞌtz. Poro ko qui kꞌuklij cꞌuꞌl jun te Cyꞌajl Ryos, quiꞌc rmeril yi nink cambaj yi jun itzꞌajbilaꞌtz.
Cobox ajtzaꞌkl yi tal Waꞌn tan stzajseꞌn wiꞌ yi yol iꞌ
13 I bin jaluꞌ, yi eꞌuꞌ kajwutz yi na cyocsajuꞌ yi mbi ekaꞌn tan yi Cyꞌajl Ryos na chintzan tan stzꞌibeꞌn nin yi xtxolbilaꞌseꞌj scyeruꞌ tan teleꞌn chitxumuꞌ tetz yi ja wiꞌt chicambajuꞌ quitzꞌajbiluꞌ tetz ben kꞌej ben sak.
14 Chaꞌstzun te qui na kacabej kacꞌuꞌl tan cꞌucheꞌn jun eꞌchk takleꞌn tetz Ryos, na elnak katxum tetz yi kol kajak alchok eꞌchk takleꞌn tetz, stkꞌeꞌ iꞌ sketz. Poro tajweꞌn yil kajak yi eꞌchk takleꞌn yi na tzatzin iꞌ teꞌj. 15 Na na tbit Ryos yi katziꞌ yi kakul. Ej nin na el katxum tetz yi yaꞌstzun yi xtxolbil yi mero bintzinin tetz. Chaꞌstzun te, baꞌn kꞌukeꞌ kacꞌuꞌl te yi jun cuꞌn tzꞌakꞌlok yi eꞌchk takleꞌn yil kajak tetz.
16 Nin ko na kil yi at jun kajwutz yi na xubsij, baꞌn kanach Kataj tibaj, nin scuyeꞌ Ryos paj, nin sclaxok tkꞌab quimichil. Poro at eꞌ wunak yi chꞌinchꞌuj cuntunin eꞌ tan juchleꞌn mas quil. Poro yi jun ajtzaꞌklaꞌtz xcyek tan chipitleꞌn nin tul qꞌuixcꞌuj. Quil kajak cuybil chipaj yi eꞌaꞌtz. 17 Chin xan nin swutz Ryos cyakil yi eꞌchk takleꞌn cachiꞌ yi na kaban. Poro ko quil koꞌc chꞌinchꞌuj tan banleꞌn eꞌchk takleꞌnaꞌtz, qui tzun kabentz tqꞌuixcꞌuj. 18 Na elnak katxum te yi xtxolbileꞌj: Jun mero cyꞌajl Ryos nkꞌeꞌtz chꞌinchꞌuj nin tunin tan juchleꞌn til, na at yi Cyꞌajl Ryos tan qꞌuicyꞌleꞌn. Qui tzun xcyeꞌ Baybaꞌntz tan poꞌtzeꞌn. 19 Ej nin nchaꞌtz, elnak katxum tetz yi oꞌ ketz, oꞌ tetz Ryos, poro wiꞌnin eꞌ yi ateꞌ jakꞌ caꞌwl Baybaꞌn.
20 Ej nchaꞌtz, elnak katxum tetz yi yaꞌstzun yi Cyꞌajl Ryos yi ulnak aj tan teleꞌn katxum te yi Ryos yi bintzinin tetz. Ej nin junit oꞌ tuchꞌ, tu yi tetz Cyꞌajl yi Jesucristo. Ntin iꞌ Ryos. Nin choꞌn na jal yi itzꞌajbil yi quinin bajsbeꞌn tetz te Iꞌ. 21 Eꞌuꞌ jun cꞌoloj wajwutz, chixomiꞌchuꞌ te chiryosil yi eꞌ mas wunak, na nkꞌeraꞌtz bintzi. Amén.