YI CAꞌP CART YI BNIXNAK TAN LUꞌ
Yi toqueꞌn Luꞌ tan stzꞌibeꞌn jun cart scyetz yi eꞌ yi kꞌuklij chicꞌuꞌl te Ryos
1
1 I inaꞌtz in Simón Luꞌ. In esclaw, nin in apostl tetz Jesucristo. Yi carteꞌj yi na chintzan tan stzꞌibeꞌn iꞌtz tetz cyeruꞌ yi eꞌuꞌ yi nternin kꞌuklij chicꞌuꞌluꞌ te Ryos chi kutaneꞌn ketz. Ej nin yaꞌstzun kutaneꞌn scyuchꞌuꞌ tan tuꞌ yi balajil Kataj Ryos tu Kajcaw Jesucristo yi colol ketz. 2 Nin tan tuꞌ yi ja wiꞌt el chitxumuꞌ tetz yi balajil Ryos tu Kajcaw Jesús, tzꞌakꞌlok wiꞌnin banl tu tzatzin paz scyeruꞌ.Tajweꞌn yil kajoy puntil tan kanucꞌul kib
3 I bin jaluꞌ eꞌuꞌ wajwutz, tan tuꞌ porer Ryos ja wiꞌt akꞌlij cyakil yi puntil sketz, tu cyakil yi tajweꞌn yi ẍeꞌn kaban tan ketzal yi jun itzꞌajbil yi quinin bajsbeꞌn tetz. Ej nin ja wiꞌt akꞌlij cyakil puntil sketz yi ẍeꞌn kaban tan kacꞌuꞌlal iꞌ. Nin ja jal eꞌchk puntilaꞌtz kaꞌn, tan tuꞌ yi mmeꞌl katxum tetz yi jun yi oꞌ moxon tzaj tan katzatzineꞌn tuchꞌ, te yi tetz kꞌej tu yi tetz balajil. 4 Ej nin nchaꞌtz tan tuꞌ yi tetz porer ja suk eꞌchk balaj takꞌleꞌn sketz. Nin ko tetz cuꞌn kalmaꞌ kꞌukeꞌ kacꞌuꞌl te yi eꞌchk takleꞌnaꞌtz yi alijt cyen taꞌn, kelepon tzuntz liwr tkꞌab eꞌchk takleꞌn cachiꞌ yi ja ben loꞌon tzoneꞌj wi munt, nin sjalok kajtzaꞌkl chi taneꞌn Ryos. 5 Chaꞌstzun te, choꞌkuꞌ il tan cyoqueꞌnuꞌ tetz balaj, nkꞌeꞌtz ntin yil kꞌukeꞌ chicꞌuꞌluꞌ. Ej nin nkꞌeꞌtz ntin yil choꞌcuꞌ tetz balaj ma na nchaꞌtz tajweꞌn tzꞌel chitxumuꞌ te yi tajbil Ryos.
6 Ej nin nkꞌeꞌtz ntin yil tzꞌel chitxumuꞌ te yi tajbil Ryos, ma na nchaꞌtz na taj yi chijunalenuꞌ chimak quibuꞌ te tajbil chiwankiluꞌ. Ej nin nkꞌeꞌtz ntin chimak quibuꞌ te eꞌchk takleꞌnaꞌtz ma na nchaꞌtz na taj yi nim cuntunin chicꞌuꞌluꞌ te eꞌchk takleꞌn cachiꞌ yi na bajij scyeꞌjuꞌ. 7 Ej nin nkꞌeꞌtz ntinaꞌtz, ma na tajweꞌn tan cyekaluꞌ ẍchiꞌ Ryos, nin yil chipekꞌuꞌ scyeꞌj cyakil kajwutz. Ej nin nkꞌeꞌtz ntin tajweꞌn tan chipekꞌeꞌnuꞌ scyeꞌj cyakil kajwutz, ma na nchaꞌtz na taj yil chilokꞌuꞌ Jesucristo.
8 Ej nin kol chixomuꞌ te cyakil eꞌchk ajtzaꞌklaꞌtz, nin ko na chitzanuꞌ tan joyleꞌn puntil tan chixomeꞌnuꞌ mas teꞌj, quil choꞌcuꞌ chi taneꞌn jun wiꞌ loꞌbaj yi qui na wutzin, ma na ẍchiwutzinkuꞌ tkꞌab Kajcaw Jesucristo. 9 Poro cyakil yi eꞌ yi qui na chixom te eꞌchk ajtzaꞌklaꞌtz niꞌcuꞌn eꞌ tu jun moyiꞌẍ, nka tu jun yaj yi pentuꞌ na xmayin. Quiꞌt na chinachon te yi cuyijt chipaj te cyakil eꞌchk takleꞌn cachiꞌ yi banakeꞌ cyen. 10 Chaꞌstzun te eꞌuꞌ kajwutz chijoyeꞌuꞌ puntil tan chiquiwixeꞌnuꞌ tkꞌab Kataj, bantz nkꞌeꞌtz tan chaꞌtz tuꞌ yi txaꞌij cheꞌtuꞌ taꞌn. Na kol chibanuꞌ yi eꞌchk xtxolbilaꞌtz yi ja wiꞌt wal scyeruꞌ, qui tzun chipakxijuꞌ-tz. 11 Nin tzatzin cuꞌn tzꞌakꞌlok amaꞌl scyeruꞌ tan cyoqueꞌnuꞌ le amaꞌl kale lcawuneꞌt Kajcaw Jesucristo yi colol ketz, tetz ben kꞌej ben sak.
12 Ja wiꞌt chiquiwixuꞌ nin ja wiꞌt el chitxumuꞌ te yi bintzi, poro ilenin tzinnaꞌwseꞌ yi eꞌchk xtxolbilaꞌseꞌj. 13 Na tzinwutz wetz, baꞌn na imban yi na chintzan tan takꞌleꞌn cyajtzaꞌkluꞌ jalen peꞌk yi itzꞌineꞌt. 14 Na ja wiꞌt lajluchax tzinwutz tan Kajcaw Jesucristo, yi txant tan inquimeꞌn, txant tan cyajeꞌn cyen wilol inwankil. 15 Poro tzinjoyeꞌ puntil tan qui teleꞌn yi eꞌchk xtxolbilaꞌseꞌj te chicꞌuꞌluꞌ. Mpe nskenk chinquim, na waj yi ilenin tzꞌul txꞌakx ẍchicꞌuꞌluꞌ.
Yi eꞌ yi ẍchiwutz cuꞌn yi takꞌleꞌn kꞌej Cristo
16 Cyakil yi chusuꞌn yi eꞌ inchusnakuꞌ teꞌj, yi ẍeꞌn taneꞌn yi porer Jesucristo tu yi tulbil iꞌ, nkꞌeꞌtz jun xtxolbil yi txumij cuntuꞌ cyakꞌun wunak, ma na ja kil cunin tan kawutz yi at wiꞌnin kꞌej iꞌ. 17 Ryos akꞌon tzaj yi tetz kꞌej tu yi tetz porer, na ja kubit yi jiloneꞌn tzaj Ryos tcꞌuꞌl jun chin pakꞌpuchal, nin je yol iꞌeꞌj: “Yi juneꞌj yaꞌstzun inCyꞌajl. Wiꞌnin okꞌleꞌn wutz waꞌn, nin wiꞌnin na chintzatzin teꞌj,” chij iꞌ bantz. 18 Choꞌn atoꞌ tu Jesucristo wi jun wiꞌwtz, nin yaꞌstzun kubitwit yi jun yolaꞌtz yi choꞌn sajeꞌn tcyaꞌj.a
19 Nchaꞌtz at junt kaquiwel yi mas tzꞌaknak cuꞌn swutz yi weri inyolaꞌseꞌj. Iꞌtz yi eꞌchk xtxolbil yi tzꞌibaꞌnt cyen cyakꞌun yi eꞌ elsanl stziꞌ Ryos tentz. Chumbalaj nin yi nink choꞌcuꞌ il tan siꞌleꞌn nin tan xtxumleꞌn. Na niꞌcuꞌn teꞌtzb tu jun kꞌakꞌ yi na txekun tul tzꞌoꞌtz. Choꞌkuꞌ bin il tan siꞌleꞌn nin tan xtxumleꞌn yi yolaꞌtz yi tzꞌibaꞌnt cyen jalen yil saj xe cyaꞌj,c nin yil txekun yi xkisum te cyalmaꞌuꞌ. 20 Poro bajx na waj yil tzꞌel chitxumuꞌ tetz: Qui na yub kol chixom eꞌ aj txolinl te cyetz cyajtzaꞌkl cuntuꞌ yi na choꞌc tan xtxꞌolcheꞌn xoꞌl yi eꞌchk xtxolbil yi cyajnak chitzꞌibal yi eꞌ elsanl stziꞌ Ryos tentz. 21 Na yi eꞌ elsanl stziꞌ Ryosaꞌtz, quiꞌc jun tir yi cyetz cuntuꞌk yi yol yi nxcon cyaꞌn. Ma na i yi Espíritu Sant akꞌon tkanil yi chiyol.