YI BAJX CART YI BNIXNAK TAN WAꞌN
Yi xtxolbil tetz yi ẍeꞌn jal kutzꞌajbil
1
1 I bin jaluꞌ, eꞌuꞌ wajwutz, at jun xtxolbil yi bitaꞌnt kaꞌn nin yaꞌstzun na katzan tan stzꞌibeꞌn nin scyeruꞌ. Yi jun xtxolbilaꞌtz, iꞌtz te yi jun yi at nintz yi ntaxk bnix jun takleꞌn. Ej nin ja kil tan kawutz, yi mbi cuꞌn ban iꞌ. Nin nchaꞌtz ja kamac yi wankil. Nin yi junaꞌtz yaꞌstzun na akꞌon itzꞌajbil. 2 Na yi jun akꞌol itzꞌajbilaꞌtz, ja ẍchaj tib skawutz. Nin oꞌ stiw teꞌj, na ja kil tan kawutz. Chaꞌstzun te na katzan tan xtxꞌolcheꞌn nin xoꞌl scyeruꞌ te yi jun akꞌol itzꞌajbilaꞌtz yi na takꞌ jun itzꞌajbil tetz ben kꞌej ben sak. Yi junaꞌtz, at nintz te Kataj Ryos. Ej nin i iꞌaꞌtz yi jun yi ẍchaj tib skawutz. 3 Na katzan nin tan xtxoleꞌn scyeruꞌ yi kilnak, nin yi kubitnak tetz iꞌ, na skawutz cuꞌn mbajij yi eꞌchk takleꞌnaꞌtz. Nchaꞌtz yi ketz kajbil iꞌtz tan jaleꞌn jun tzatzin paz skaxoꞌl scyuchꞌuꞌ chi taneꞌn yi tzatzin paz yi at skaxoꞌl ketz tu Ryos, nin tu Jesucristo yi tetz Cyꞌajl. 4 Nchaꞌtz na katzan tan stzꞌibeꞌn yi xtxolbileꞌj scyeruꞌ, na yi kajbil iꞌtz tan chitzatzineꞌnuꞌ.Yi skojal Kataj Ryos
5 Je bin xtxolbileꞌj yi talnak Jesucristo sketz: Yi Ryos, chin skoj nin te talmaꞌ, na quiꞌc muꞌẍ tal til. 6 Chaꞌstzun te ko na kal yi xomchoꞌ teꞌj, poro ko qui na kaban yi eꞌchk takleꞌn balaj, oꞌ tzun laꞌjtz. 7 Poro kol kaxom te yi balajil Ryos, sjalok tzun lokꞌ ib skaxoꞌl, nin yi ẍchꞌel Jesucristo, yi tetz Cyꞌajl, na xcyeꞌ tan xtxꞌajleꞌn cunin cyakil yi kil yi cyꞌaꞌn kaꞌn.
8 Poro ko na kal yi quiꞌc ketz kil, oꞌ teꞌn na kasub kib, nin qui na kaxom te yi bintzi. 9 Poro kol katxol yi kil, baꞌn kꞌukeꞌ kacꞌuꞌl teꞌj yi tzꞌelepon kꞌab te yi alijt cyen taꞌn. Na chin tzꞌaknak cunin iꞌ te yol, na list iꞌ tan cuyleꞌn kapaj, nin tan xtxꞌajleꞌn cunin cyakil yi ilcꞌol yi at skeꞌj. 10 Poro kol kal yi quiꞌc ketz kil, na tzun oc Ryos kaꞌn tetz laꞌj. Txeꞌn nin tzun ocopon yi yol Kataj te kalmaꞌ.