Yi tulbil Kajcaw
3
1 I bin jaluꞌ, eꞌuꞌ jun cꞌoloj wajwutz, yi carteꞌj iꞌtz yi caꞌp cart yi mbnix waꞌn tan tponeꞌn ẍchiwutzuꞌ. Nin ja injoy puntil tul chicabil cart tan cꞌaseꞌn cyajtzaꞌkluꞌ. 2 Ulk bin txꞌakx chicꞌuꞌluꞌ yi eꞌchk chusuꞌn yi cyajnak chitzꞌibal yi eꞌ elsanl stziꞌ Ryos tentz, tu eꞌchk caꞌwl Kajcaw yi colol ketz yi ocnakoꞌ yi oꞌ apostl tan chichusleꞌnuꞌ teꞌj.3 Poro bajx na waj yil tzꞌel chitxumuꞌ te yi xtxolbileꞌj yi swaleꞌ nin scyeruꞌ: Yil kocopon xeꞌ quen yi wiꞌtzbil kꞌejlal, ẍchijalok eꞌ yi ẍchixomok te cyetz cyajtzaꞌkl yi na icyꞌ ẍchicꞌuꞌl. 4 Ej nin yi eꞌaꞌtz scyaleꞌ: “¿Tonaꞌ tzꞌel kꞌab Cristo te yi yol yi talnak yi at tulbil iꞌ? Quiꞌt tzꞌul, na iẍnin taneꞌn yi tiemp jaluꞌ chi taneꞌn yi cweꞌnleꞌn cunin wuxtxꞌotxꞌ, nin chi taneꞌn yi tiemp yi ateꞌ tzaj yi eꞌ kamam kateꞌ, na quiꞌc na txꞌixpij tetz,” cheꞌch sbneꞌ. 5 Poro nkꞌeꞌtz bintzi, na qui na cyaj choꞌc tan xtxumleꞌn yi ẍeꞌn taneꞌn yi munt tu yi tcyaꞌj le xeꞌtzbil tzaj. Ej nin qui na choꞌc tan xtxumleꞌn yi tan tuꞌ caꞌwl Ryos yi jeꞌuleꞌt titzꞌp yi txꞌotxꞌ tul aꞌ. 6 Ej nin qui na cyaj choꞌc tan xtxumleꞌn yi tan aꞌ eꞌ sotzeꞌt yi eꞌ antiw wunak tan Ryos. 7 Nin qui na cyaj choꞌc tan xtxumleꞌn yi tcyaꞌj tu yi wuxtxꞌotxꞌ yi at jaluꞌ colij cuntuꞌ tan Ryos tan toqueꞌn kꞌaꞌkl. Colij cuntunin jalen yil tzꞌul tzaj yi kꞌejlal yil tzꞌoc Ryos tan pujleꞌn xtisyaꞌ, nin tan takꞌleꞌn chicaws yi eꞌ yi qui na cyek ẍchiꞌ iꞌ.
8 Nchaꞌtz eꞌuꞌ wajwutz, elch te chicꞌuꞌluꞌ yi swutz Ryos jun kꞌej niꞌcuꞌn tu jun mil yob, nin jun mil yob niꞌcuꞌn tu jun kꞌej. 9 Nkꞌeꞌtz yi quiꞌk tzꞌel kꞌab Kajcaw te yi yol yi at tulbil iꞌ, chi na cyal cobox, ma na yi puntil iꞌtz, yi nim cuntunin cꞌuꞌl iꞌ skibaj. Qui na taj yi nink sotz jun. Ma na yi tajbil iꞌ iꞌtz yi nink chitxꞌixpuj cyakil wunak yi cyajtzaꞌkl. 10 Poro jun cuꞌn tzꞌul Kajcaw. Nin quinin tzꞌicyꞌ sketz yil tzꞌul tzaj iꞌ. Choꞌn cunin sbneꞌ tulbil iꞌ chi na ban jun alkꞌom tan alakꞌ lakꞌbal. Ej nin yil tzꞌul yi jun kꞌejlalaꞌtz xitok yi eꞌchk takleꞌn yi at tcyaꞌj. Chin jincaneꞌn nin sbneꞌ yil xit. Nin tzꞌocopon kꞌaꞌkl yi wuxtxꞌotxꞌ. Nin tan paj yi stzꞌaꞌal yi kꞌakꞌ tzꞌelepon aꞌ cyakil yi at wuxtxꞌotxꞌ. Na stzꞌeꞌok cyakil yi at wi txꞌotxꞌ beneꞌn tziꞌn wi munt.
11 I bin jaluꞌ, ko yaꞌtz sbajok, ko at xitbil yi tcyaꞌj tu yi wuxtxꞌotxꞌ, ¿mbi tzun tajweꞌn yil kaban ketz? Tajweꞌn yil koꞌc tan banleꞌn yi eꞌchk takleꞌn balaj swutz Ryos, nin yil kek ẍchiꞌ iꞌ. 12 Elk bin cyalmaꞌuꞌ te yi kꞌejlal yil tzꞌul tzaj Kataj Ryos, nin chijoyeꞌuꞌ puntil tan tulseꞌn chan. Na yil tzꞌul tzaj yi jun kꞌejlalaꞌtz stzꞌeꞌok yi tcyaꞌj tan kꞌakꞌ, nin tan paj yi kꞌakꞌ tzꞌelepon aꞌ cyakil eꞌchk takleꞌn yi at.
13 Poro yi oꞌ ketz at kachꞌiw te jun acꞌaj tcyaꞌj, nin jun acꞌaj wuxtxꞌotxꞌ yi sukiꞌnt sketz tan Kataj. Yil kopon tul yi jun amaꞌlaꞌtz quiꞌt bajij eꞌchk takleꞌn yi qui na yub. Chumbalaj nin sbneꞌ cyakil. 14 Chaꞌstzun te eꞌuꞌ jun cꞌoloj wajwutz, jalen peꞌk yi na chitzanuꞌ tan ẍchꞌiweꞌn yi jun tiempaꞌtz, chijoyeꞌuꞌ puntil tan chibansal quibuꞌ tu Ryos, nin tan cyoqueꞌnuꞌ tetz balaj bantz quiꞌc muꞌẍ tal chipaltiluꞌ yil tzꞌul tzaj iꞌ. 15 Ok bin tetz cyajaluꞌ yi iꞌtz tajbil Ryos tan chiclaxeꞌn wunak. Chaꞌstzun te nim cuntunin cꞌuꞌl iꞌ skibaj. Ej nin iteꞌn nin xtxolbilaꞌtz benak stzꞌibal kajwutz Pawl scyeruꞌ. Nin yi eꞌchk ajtzaꞌkl yi at tulak eꞌchk cartaꞌtz yaꞌstzun yi takꞌ Ryos tetz. 16 Nin na jilon iꞌ te yi eꞌchk xtxolbilaꞌseꞌj tul cyakil yi eꞌchk cart yi bnixnak taꞌn. Poro at eꞌchk xtxolbil yi at qꞌuixbel tan teleꞌn katxum tetz. Ej nin at eꞌ yi qui na pujx cyaꞌn, scyuchꞌ yi eꞌ cotxcoj, nin na choꞌc tan xtxꞌixpeꞌn yi mbi ekaꞌn tan yi eꞌchk chusuꞌnaꞌtz. Ej nin nkꞌeꞌtz ntin yi ẍchusuꞌn kajwutz Pawl, ma na nchaꞌtz na chiban te yi mas xtxolbil yi tzꞌibaꞌnt cyen. Na na choꞌc tan xtxꞌixpeꞌn yi mbi na elepont. Poro tan tuꞌ yi jun ajtzaꞌklaꞌtz, eꞌ teꞌn na chijoyon chicaws.
17 Ma jaluꞌ, eꞌuꞌ jun cꞌoloj wajwutz, elnak chitxumuꞌ tetz cyakil eꞌchk xtxolbilaꞌseꞌj. Chaꞌstzun te or quiluꞌ. Xomiꞌch cyajtzaꞌkluꞌ scyeꞌj yi eꞌ aj subunlaꞌtz bantz qui chipakxeꞌnuꞌ. 18 Ma na chijoyeꞌuꞌ puntil tan teleꞌn chitxumuꞌ mas te yi mbi ekaꞌn tan Kajcaw Jesucristo, yi colol ketz. Nin chijoyeꞌuꞌ puntil tan teleꞌn chitxumuꞌ mas te yi banl talmaꞌ iꞌ.
Kakꞌeꞌ bin kakꞌajsbil tetz iꞌ jaluꞌ, nin sbneꞌ opon tunintz.