YI BAJX CART YI BNIXNAK TAN LUꞌ
Yi cart yi ben stzꞌibal Luꞌ scyetz yi eꞌ kajwutz yi ateꞌ beneꞌn tziꞌn
1
1 I inaꞌtz, in Luꞌ. In apostl tetz Jesucristo. Ej nin yi carteꞌj yi na chintzan tan stzꞌibeꞌn, iꞌtz tetz cyeruꞌ yi eꞌuꞌ yi awer nak quitaneꞌnuꞌ tzoneꞌj wuxtxꞌotxꞌ, yi eꞌuꞌ yi najlẍcheꞌuꞌ lakak eꞌchk amaꞌl cwent Ponto, nin lakak eꞌchk amaꞌl cwent Galacia tu Capadocia, tu yi eꞌchk amaꞌl cwent Asia tu Bitinia. 2 Yi eꞌuꞌ yi txaꞌij cheꞌtuꞌ tan Kataj Ryos, na yaꞌstzun yi tajbil iꞌ yi txumijt cyen taꞌn. Na xansaꞌn cheꞌtuꞌ tan yi Espíritu Sant bantz cyoqueꞌnuꞌ cꞌulutxum jakꞌ caꞌwl Jesucristo, na ja chixansijuꞌ tan yi tetz ẍchꞌel. Takꞌ tzaj bin Kataj Ryos wiꞌnin banl tu tzatzin paz squibuꞌ.Jun cuꞌn at kachꞌiw te yi jun itzꞌajbil tu jun herens yi quinin bajsbeꞌn tetz
3 I bin jaluꞌ eꞌuꞌ kajwutz kakꞌeꞌ kakꞌajsbil tetz Kataj Ryos, yi Taj Kajcaw Jesucristo, na tan tuꞌ yi el kꞌajab iꞌ skeꞌj, ja takꞌ jun acꞌaj kutzꞌajbil. Ej nin jun cuꞌn at kachꞌiw teꞌj, na itzꞌnak Cristo taꞌn ẍchixoꞌl almaꞌ.
4 Ej nin bixbaꞌnt tan Kataj Ryos tan tkꞌol jun herens sketz yi quil sotz. Iꞌtz jun herens yi quiꞌc muꞌẍ tal paltil, nin qui bajsbeꞌn tetz. Yi jun herensaꞌtz colij tetz ketz jalen tziꞌn tcyaꞌj.
5 Ej nin tan tuꞌ yi kꞌuklij kacꞌuꞌl te Ryos, qꞌuicyꞌleꞌn choꞌ taꞌn tan yi tetz porer. Ej nin quinin lkoꞌ til cyen jalen cuꞌn lkacambaj yi jun balaj itzꞌajbilaꞌtz yil tzꞌul tzaj yi wiꞌtzbil kꞌejlal. 6 Chitzatzinkuꞌ bin te yi xtxolbilaꞌseꞌj.
Poro ilenin tcꞌuꞌl yi tiemp yi na kaxon tcꞌuꞌl jaluꞌ, na loꞌ sotz chicꞌuꞌluꞌ tan paj yi eꞌchk pilbil cyeruꞌ yi na tzan. 7 Poro quil chibisunuꞌ taꞌn na je jun elsawutzileꞌj: Yi oro wiꞌnin jamel. Nin na oc wi kꞌakꞌ tan tilweꞌn yi ko mero oro cuꞌn nka quiꞌ. Niꞌcuꞌn tzun yi oꞌ ketz. Na ul pilbil ketz tan tilweꞌn yi ko bintzi nin kꞌuklij kacꞌuꞌl te Ryos nka quiꞌ. Poro at mas walor yi ketz yi kꞌuklij kacꞌuꞌl teꞌj swutz yi oro yi wiꞌnin jamel. Na yi oro sotzok teraꞌtz, ma yi ketz yi na kocsaj quil sotz. Chaꞌstzun te yil tzaj wiꞌ yi pilbil cyeruꞌ, nin yil ẍchaj tib Jesucristo, sbajok jun chin tzatzin scyeruꞌ. Tzꞌakꞌlok chikꞌejuꞌ, yi kol lajluchax yi jun cuꞌn choꞌn kꞌuklij chicꞌuꞌluꞌ te Ryos.
8 Qui cyajskeꞌnuꞌ wutz Jesucristo, poro na chipekꞌuꞌ teꞌj. Qui na quiluꞌ wutz iꞌ jaluꞌ poro nternin kꞌuklij chicꞌuꞌluꞌ teꞌj. Nin nternin na chitzatzinuꞌ. Ej nin tan yi jun chin tzatzin yi ateꞌuꞌ cuꞌnt, quiꞌt na jal puntil cyaꞌnuꞌ tan tyoẍiꞌn tetz. 9 Na chitzatzinuꞌ, na tzan chicambaluꞌ yi jun herensaꞌtz yi kꞌuklij chicꞌuꞌluꞌ teꞌj. Nin yi jun herensaꞌtz iꞌtz yi skaclaxok tetz ben kꞌej ben sak.
10 Ej nin yaꞌstzun yi jun claxeꞌnaꞌtz yi nternin ocnakeꞌ yi eꞌ elsanl stziꞌ Ryos tentz tan joyleꞌn puntil yi ẍeꞌn sbneꞌ. Ej nin yaꞌstzun yi claxeꞌn yi cyalnak, yi tantuꞌ banl talmaꞌ Ryos stzꞌakꞌlok scyeruꞌ. 11 Nternin eꞌ oc yi eꞌ elsanl stziꞌ Ryosaꞌtz tan xtxumleꞌn yi mbi tiempil at tulbil yi jun yi bixbaꞌnt tan kacolpeꞌn. Ej nin nternin eꞌ oc tan xtxumleꞌn yi mbi cuꞌn sbajok yil tzꞌul, na alijt cyen tan yi Espíritu Sant scyetz yi jalen cuꞌn smucꞌ yi Cristaꞌtz qꞌuixcꞌuj kalenaꞌs tzun ljal kꞌej iꞌ-tz. 12 Ej nin ja lajluchax ẍchiwutz yi qui sbajok yi jun xtxolbilaꞌtz yi eꞌ oc tan stzꞌibeꞌn, te yi tiemp yi ateꞌ cyetz, ma na txumijt tan Ryos jalen te yi ketz katiemp. Yaꞌstzun yi balaj stziblal yi ja wiꞌt txolij scyeruꞌ tan porer yi Espíritu Sant. Na iꞌtz iteꞌn nin xtxolbilaꞌtz yi tzꞌibaꞌnt cyen cyakꞌun yi eꞌ elsanl stziꞌ Ryos tentz. Nin yaꞌstzun yi balaj stziblal yi nternin na el cyalmaꞌ yi eꞌ ángel tan teleꞌn chitxum tetz yi ẍeꞌn sbneꞌ.
Tajweꞌn tan koqueꞌn tzꞌaknak cuꞌn swutz Ryos
13 Ja bin kil yi at kachꞌiw te yi jun chumbalaj itzꞌajbil. Chaꞌstzun te cꞌasok chicꞌuꞌluꞌ. Poꞌtiꞌch cyajtzaꞌkluꞌ, nin nternin kꞌukek chicꞌuꞌluꞌ te yi banl Kataj yi tzꞌakꞌlok sketz yil tzꞌul tzaj Jesucristo. 14 Choꞌkuꞌ bin cꞌulutxum jakꞌ caꞌwl Ryos. Quiꞌt chixomuꞌ te yi eꞌchk yab ajtzaꞌkl yi elnak cyalmaꞌuꞌ teꞌj sajleꞌn. 15 Ma na choꞌkuꞌ tzꞌaknak cuꞌn swutz Ryos, yi jun yi eꞌ moxon tzajuꞌ. Choꞌkuꞌ tzꞌaknak cuꞌn te cyakil yi na chibanuꞌ na yi Kataj Ryos chin tzꞌaknak cuꞌn iꞌ. Quiꞌc muꞌẍ tal til. 16 Choꞌkuꞌ tzuntz tetz tzꞌaknak cuꞌn swutz iꞌ, na tzꞌibaꞌnt cyen le tuꞌj Kataj: “Nqueꞌnwok tzꞌaknak cuꞌn chi jun yaj yi quiꞌc muꞌẍ til, na yaꞌstzun wutaneꞌn wetz. Chin tzꞌaknak cuꞌn in,” stzun Ryos banak cyen.a
17 Chaꞌstzun te cyekeꞌuꞌ ẍchiꞌ Ryos na na chitzanuꞌ tan naꞌwseꞌn biꞌ jun Ryos yi qui na jeꞌ kꞌab twiꞌ jun, nin jun Ryos yi stzꞌok tan maꞌleꞌn yi mbi cuꞌn na kaban len te yi atoꞌ tan posariꞌn tzoneꞌj wuxtxꞌotxꞌ. 18 Kekeꞌ len bin ẍchiꞌ iꞌ na quinin xcon eꞌchk takleꞌn taꞌn yi na sotz chi taneꞌn oro tu sakal tan kelseꞌn liwr tkꞌab eꞌchk yab ajtzaꞌkl yi txumijt cyen cyakꞌun kamam kateꞌ, 19 ma na ja xcon jun takleꞌn yi mas tcuꞌn walor. Iꞌtz yi ẍchꞌel Cristo. Na, quim iꞌ tetz katxꞌixwatz, chi na quim jun tal neꞌẍ cneruꞌ yi quiꞌc muꞌẍ tal yanaꞌsil. Na quiꞌc muꞌẍ tal til, nin chin tzꞌaknak cuꞌn iꞌ.
20 Ej nin nchaꞌtz bixbaꞌnt iꞌ tan quimeꞌn tetz katxꞌixwatz yi ntaxk tzaj bnix yi wuxtxꞌotxꞌ. Poro acꞌaj chan ẍchajol tib tan takꞌoneꞌn baꞌn sketz. 21 Ej nin tan tuꞌ yi mbi cuꞌn ban iꞌ, choꞌn kꞌuklij ketz kacꞌuꞌl te Ryos, yi Ryosaꞌtz yi njeꞌsan tzaj iꞌ ẍchixoꞌl almaꞌ nin yi Ryos yi akꞌon kꞌej iꞌ. Chaꞌstzun te, tan cyakil yi xtxolbilaꞌseꞌj, na elepont yi iꞌtz Kataj Ryos yi choꞌn kꞌuklij kacꞌuꞌl teꞌj, nin yi choꞌn at kachꞌiw teꞌj.
22 Eꞌuꞌ wajwutz, ja chixcyeꞌuꞌ tan banleꞌn taneꞌn yi chusuꞌn yi mero bintzi, poro tan tuꞌ porer yi Espíritu Sant. Chaꞌstzun te ja skojan te cyalmaꞌuꞌ, nin chaꞌstzun te na chipekꞌuꞌ scyeꞌj yi eꞌ mas kajwutz. Chilokꞌeꞌ bin quibuꞌ squibil quibuꞌ tetz cuꞌn cyalmaꞌuꞌ. 23 Chilokꞌeꞌ quibuꞌ squibil quibuꞌ, na ja wiꞌt jal jun acꞌaj itzꞌajbil cyaꞌnuꞌ. Ej nin yi jun balaj itzꞌajbilaꞌtz quinin jal cyaꞌnuꞌ tan tuꞌk yi choꞌn quitzꞌleꞌnuꞌ te jun wunak yi baꞌn na sotz, poro ja jal yi jun acꞌaj itzꞌajbilaꞌtz cyaꞌnuꞌ tan tuꞌ yi ja chitzꞌijuꞌ te yi yol Kataj na yaꞌtz na jaleꞌt kutzꞌajbil. Ej nin yi jun yol Katajaꞌtz quil sotz teraꞌtz tetz ben kꞌej ben sak. 24 Na yaꞌstzun tzꞌibaꞌnt cyen:
“Cyakil yi oꞌ, yi oꞌ wunak, niꞌcuꞌn oꞌ tu jun tal xtzeꞌ yi jalcuꞌn na skej.
Nin yi kakꞌej jalcuꞌn na xit chi na skej buchil jun xtzeꞌ.
Na yi eꞌchk xtzeꞌaꞌs na skej, nin jalcuꞌn na cuꞌ lokp yi buchil.
25 Poro yi yol Kataj, quil sotz teraꞌtz tetz ben kꞌej ben sak.”b
Ej nin yaꞌstzun yi balaj stziblal yi txoliꞌnt scyeruꞌ.