Jun xtxolbil scyetz yi eꞌ ric
5
1 Ma jaluꞌ eꞌuꞌ ric, swaleꞌ nin jun xtxolbil scyeruꞌ. Baꞌn tcuꞌn yi nink chibisunuꞌ, nink chokꞌuꞌ tan yi qꞌuixcꞌuj yi tzꞌul ẍchiwutzuꞌ. 2 Na, tzan kꞌayeꞌn chimebiꞌluꞌ, nin tzan bajeꞌn balaj beꞌch cyeruꞌ tan txil. 3 Nchaꞌtz yi chipuꞌkuꞌ, yi oro tu sakal, tzan pusineꞌn. Nin tan yi tzan pusineꞌn slajluchaxk yi at chipaltiluꞌ tzantzaj. Na yil tzꞌoc pujleꞌn xtisyaꞌ scyeꞌjuꞌ tzꞌelepon chixajsal quibuꞌ te chimebiꞌluꞌ, chi na ẍkanslen tib jun yaj te kꞌakꞌ. Ẍchibisunkuꞌ tan paj. Lastum eꞌuꞌ na atoꞌ tcꞌuꞌl yi wiꞌtzbil tiemp nin ntin na chitzanuꞌ tan molcheꞌn chimebiꞌluꞌ. 4 Cyakil eꞌ chimosuꞌ yi na chitzan tan jeꞌseꞌn chicosechuꞌ, ja wiꞌt opon toꞌkl cyalmaꞌ swutz Ryos, tan paj yi qui na tzꞌak len chichojoꞌn cyanuꞌ. Ja tbit yi wiꞌtz ajcaw yi chitziꞌ chikul.5 Yi eꞌuꞌ aj mebiꞌl, ja quicyꞌsaj cuninuꞌ chicꞌuꞌluꞌ te eꞌchk takleꞌn tetz tzoneꞌj wi munt, nin na chicꞌaꞌchaj quibuꞌ chi na kꞌansij jun awun tetz quimich. 6 Ja cyakꞌuꞌ chicaws, nin ja cheꞌ chibiyuꞌ yi eꞌ yi quiꞌc quil. Ej nin quinin na chicol quibtz, na eꞌ cꞌulutxum.
Nimit chicꞌuꞌluꞌ nin chinacheꞌuꞌ Kataj
7 Poro yi eꞌuꞌ wajwutz, nimit cuntunin chicꞌuꞌluꞌ swutz, jalen cuꞌn yil tzꞌul tzaj Kajcaw. Na na taj kapasens, chi na ban jun awal coꞌn yi na ẍchꞌiw jun balaj cosech. At pasens iꞌ tan ẍchꞌiweꞌn jalen cuꞌn lkꞌanax yi cosech. 8 Nchaꞌtz tzun eꞌuꞌ, nimit cuntunin chicꞌuꞌluꞌ swutz yi qꞌuixcꞌuj. Chiquiwseꞌuꞌ cyalmaꞌuꞌ swutz, na txant tan tuleꞌnt Kajcaw. 9 Poro or quiluꞌ wajwutz, quil chiyaj quibuꞌ yil choꞌcuꞌ swutz qꞌuixcꞌuj, bantz quil tzꞌakꞌlij chicawsuꞌ, na txiclij yi pujul xtisyaꞌ tzi puert. 10 Wajwutz ulk txꞌakx chicꞌuꞌluꞌ yi qꞌuixcꞌuj yi chimucꞌnak yi eꞌ elsanl stziꞌ Ryos tentz, yi eꞌ yi chitxolnak yi tajbil Ryos. Quinin eꞌ pakxij. 11 Skawutz ketz, chumbalaj nin yi eꞌaꞌtz yi icyꞌnakpon qꞌuixcꞌuj cyaꞌn. Nin bitaꞌnt cyanuꞌ yi ẍeꞌn cunin micyꞌpon qꞌuixcꞌuj tan Job, nin ẍeꞌn cunin ban yi tkꞌol Kajcaw banl tibaj. Na, na el kꞌajab Ryos skeꞌj nin na okꞌ cꞌuꞌl iꞌ skeꞌj kacyakil cuꞌn.
12 Poro eꞌuꞌ wajwutz, yi mas tajweꞌn iꞌtz: Oquiꞌch yi tcyaꞌja nka yi wuxtxꞌotxꞌ cyakꞌunuꞌ tetz stiwil chiyoluꞌ. Baꞌn tcuꞌn quil xcon stiwil chiyoluꞌ. Baꞌn cyaluꞌ bintzi, ko iꞌtz bintzi. Ma ko quiꞌ, baꞌn cyaluꞌ quiꞌ, bantz quil takꞌ Ryos chicawsuꞌ. \p 13 Ko at eꞌ yi na chitzan tan mucꞌleꞌn qꞌuixcꞌuj ẍchixoꞌluꞌ, baꞌn chinach Kataj. Nin ko at eꞌ yi na chitzatzin ẍchixoꞌluꞌ, baꞌn chibitzin. 14 Ko at jun yabiꞌẍ ẍchixoꞌluꞌ, baꞌn cheꞌ ẍchak yi wiꞌ banl wiꞌ tetz cmon creyent tan nachleꞌn Kataj tibaj, nin tan takꞌleꞌn quen muꞌẍ tal tꞌaꞌal olivo teꞌj. 15 Ko kꞌuklij chicꞌuꞌl yi eꞌ yi na chitzan tan nachleꞌn Kataj, xcyek tzun yi oracióntz tan tulseꞌn yos tu yabiꞌẍ. Tzꞌul yos tuchꞌ tan Kajcaw. Nin ko at til yi yabiꞌẍ, scuyeꞌ Kataj yi paj. 16 Chaꞌstzun te quil chijuẍ quibuꞌ swutz quiluꞌ, ma na chitxoleꞌuꞌ quiluꞌ squibil quibuꞌ. Na ko balaj jun yaj swutz Ryos, at tzun walor yi stziꞌ yi kul te yi na jak. 17 Na yi kꞌajtzun kamam Elías, wunak tuꞌ iꞌ chi kutaneꞌn ketz, poro yi cꞌuchul iꞌ tetz Kataj tan qui sajeꞌn abal, quiꞌc abal bantz tetz ox yob tu niꞌcy. 18 Nin yi ticyꞌeꞌn jun tiempaꞌtz, toqueꞌnt tzuntz tan cꞌucheꞌn abal, nin cuꞌ ultz. Jalenaꞌs tzun xtxaꞌxaxeꞌn junt tir yi wuxtxꞌotxꞌ.