Santiago 4

Yi eꞌ yi na chipekꞌ te yi eꞌchk takleꞌn tetz tzoneꞌj wuxtxꞌotxꞌ, eꞌ contr te Ryos

1 Yi oyintziꞌ tu yi chiꞌch cꞌuꞌlal yi na jal ẍchixoꞌluꞌ, ¿nkꞌeꞌtz peꞌ choꞌn na saj te yi cyajtzaꞌkluꞌ cachiꞌ? Bintzi, choꞌn na saj te yi tajbil chiwankiluꞌ. 2 Na na el cyalmaꞌuꞌ te jun takleꞌn, nin tan paj yi qui na chicambajuꞌ, na chiꞌch chicꞌuꞌluꞌ nin na chibiy quibuꞌ squibil quibuꞌ tan paj. Poro yi mero bintzi iꞌtz yi qui na chicambajuꞌ yi cyeruꞌ cyajbiluꞌ na qui na choꞌcuꞌ tan jakleꞌn tetz Ryos. 3 Bintzi at loꞌ eꞌ ẍchixoꞌluꞌ yi na chijak tetz Ryos poro qui na akꞌlij scyetz tan paj cyajtzaꞌkl cachiꞌ, na ntin na cyaj tzꞌakꞌlij scyetz tan chibnol yi cyajbil teꞌj. 4 Lastum eꞌuꞌ wajwutz, na quinin ajlij chicꞌuꞌluꞌ te Ryos. ¿Qui peꞌ na el chitxumuꞌ tetz? Yi ko na el kalmaꞌ te yi eꞌchk takleꞌn tetz tzoneꞌj wuxtxꞌotxꞌ, na elepont yi kacontr kib tu Ryos. Chaꞌstzun te, alchok scyetz yil cyamiwi quib tu yi eꞌchk takleꞌn tetz tzoneꞌj wuxtxꞌotxꞌ, contr iꞌ te Ryos. 5 ¿Quiꞌc peꞌ kꞌej ẍchiwutzuꞌ yi xtxolbil yi tzꞌibaꞌnt cyen yi na tal: “Nternin na el talmaꞌ yi Espíritu Sant yi at skeꞌj tan tetzal yi kalmaꞌ”? 6 Poro at mas banl yi na takꞌ Kataj Ryos sketz. Na at junt xtxolbil yi tzꞌibaꞌnt cyen yi na tal: “Ryos na quichꞌeyan yi eꞌ yi na cyocsaj quib juy. Poro contr iꞌ scyeꞌj yi eꞌ yi na cyocsaj quib nim.”

7 Choꞌk binuꞌ cꞌulutxum jakꞌ caꞌwl Ryos. Chibneꞌuꞌ bin quibuꞌ tu Baybaꞌn. Tzꞌelepon tzun ojk teraꞌtz. 8 Chiẍkans quen quibuꞌ te Ryos, tzꞌul tzun ẍkansal tib iꞌ scyeꞌjuꞌ. Ej nin yi eꞌuꞌ juchul il, ẍchibneꞌuꞌ yi balaj. Nin yi eꞌuꞌ yi na chicabejuꞌ chicꞌuꞌluꞌ te Ryos, quicyꞌaj lenuꞌ yi jun ajtzaꞌklaꞌtz te cyalmaꞌuꞌ. 9 Chibisunkuꞌ, nin chokꞌokuꞌ tan quiluꞌ. Quil chitzatzinuꞌ, ma na chibisunkuꞌ tan quiluꞌ. 10 Cyocseꞌ quibuꞌ juy swutz Ryos, stkꞌeꞌ tzun iꞌ chikꞌejuꞌ.

Or quiluꞌ yi maꞌleꞌn tajtzaꞌkl junt

11 Eꞌuꞌ wajwutz quil cyaluꞌ yi quiꞌc xac junt, na yi jun yi na tzan tan talcheꞌn yi quiꞌc xac junt kajwutz, nka yi jun yi na tzan tan maꞌleꞌn tajtzaꞌkl junt kajwutz na tzun tzantz tan telseꞌn kꞌej yi caꞌwl Kataj. Ko yaꞌtz na chibanuꞌ, qui na chitzanuꞌ tan banleꞌn yi caꞌwl Kataj. Na tzun cyocsaj quibuꞌ mas tzꞌaknak cuꞌn swutz yi caꞌwl Kataj. 12 Poro jun ntziꞌ akꞌol tetz caꞌwl at, nin jun ntziꞌ pujul xtisyaꞌ at. Iꞌtz yi jun yi baꞌn kaclax taꞌn, nka baꞌn kasotz taꞌn. Ma eꞌ cyeruꞌ, ¿at ptzun chikꞌejuꞌ tan maꞌleꞌn tajtzaꞌkl jun?

Qui na kil mbi sbajok ek caꞌp

13 Ma jaluꞌ swaleꞌ nin junt xtxolbil scyeruꞌ, yi eꞌuꞌ yi na cyaluꞌ: “Ko quil chimben jaluꞌ, ek tzun chimben tul junt tnum. Yaꞌstzun naꞌteꞌt jun yob. Nocopon tan lijensiꞌn. Sjalok impuꞌk,” ko cheꞌchuꞌ. 14 ¿Nxac na cyaluꞌ yi yolaꞌseꞌj? Na qui ilij kaꞌn mbi na xon tzaj skeꞌj ek caꞌp. ¿Ẍeꞌn tzꞌel katxum tetz yi katiemp yi akꞌij sketz tzoneꞌj? Na bintzinin niꞌcuꞌn katiemp tzoneꞌj wi munt chi na ban sbakꞌ yi juneꞌn tkuj na mol cuꞌn tib, nin jun ntziꞌ tkuj na xit cuꞌn tib. 15 Baꞌn tcuꞌn yi nink cyaluꞌ: “Kataj cuꞌn kol ben ẍkon muꞌẍ katiemp. Ryos cuꞌn skabneꞌ yi juneꞌj, nka skabneꞌ yi junteꞌj.” Yaꞌtzk cyaluꞌ-tz. 16 Poro tan eꞌchk yolaꞌtz yi na cyal cyeruꞌ, na cyocsaj quibuꞌ nim. Cachiꞌ na chibanuꞌ swutz Ryos. 17 Ma jaluꞌ, ko ja el katxum tetz yi tajweꞌn tan kabnol yi eꞌchk takleꞌn balaj, nin ko quil kaban, ja tzun wiꞌt kajuch kiltz.