Yi katziꞌ chin cachiꞌ nin
3
1 Ma jaluꞌ eꞌuꞌ wajwutz, or quiluꞌ kol choꞌc wiꞌnin eꞌuꞌ tetz aj chusunl, na bintzinin yi oꞌ aj chusunl tzꞌakꞌlok mas ketz kacaws kol kajuch kil. 2 Na cyakil oꞌ, na katol na kachuc. Poro ko at jun yi qui na xubsij te jilon, na elepont yi tzꞌaknak cuꞌn iꞌ. Xcyek tzun iꞌ-tz tan makol tib te cyakil eꞌchk takleꞌn cachiꞌ. 3 Na je jun elsawutzileꞌj: Na oc prenuꞌ kaꞌn le chitziꞌ eꞌ chej tan kacawuneꞌn scyeꞌj. Nin tan tuꞌ yi prenuꞌ na kaxcyeꞌ tan chipakseꞌn kale na kajwit tan chibeneꞌn. 4 Nchaꞌtz eꞌchk barc yi na chixon wi aꞌ, chumam nin eꞌ, nin pitij cheꞌ tan chumam cyekꞌekꞌ, poro na xcyeꞌ jun tal neꞌẍ timón tan chipakseꞌn kale na tajwit yi aj tolinl tan beneꞌn. 5 Niꞌcuꞌn tzun yi katziꞌ, qui tunin kꞌusij, poro at na ban cuꞌnt na xcon kaꞌn tan talcheꞌn eꞌchk takleꞌn yi chin xoꞌwbil nin.Nchaꞌtz niꞌcuꞌn katziꞌ tu muꞌẍ tal xuꞌm kꞌakꞌ yi na oc kꞌaꞌkl jun chin juꞌwtz taꞌn. 6 Ej nin niꞌcuꞌn katziꞌ tu mero kꞌakꞌ yi choꞌn na saj tqꞌuixcꞌuj. Na chin cachiꞌ nin yi katziꞌ swutz cyakil wekl kawankil, na na xcyeꞌ tan poꞌtzeꞌn cyakil yi kawankil. 7 Yi oꞌ ketz yi oꞌ wunak na kaxcyeꞌ tan chibajeꞌn mansar cyakil jilwutz txuc, scyuchꞌ yi eꞌ yi ateꞌ xe aꞌ. 8 Poro cyaꞌl nin jun sketz yi nink kaxcyeꞌ tan maꞌleꞌn kajilon, na yi katziꞌ chin juntlen nin, quiꞌc nin makbeꞌn tetz. Na yi kajilon, niꞌcuꞌn chi taneꞌn wenen yi na xcyeꞌ tan biyleꞌn jun.
9 At na ban cuꞌnt na xcon katziꞌ tan takꞌleꞌn kakꞌajsbil tetz Kataj Ryos. Nin at na ban cuꞌnt na xcon katziꞌ tan jakleꞌn chicaws wunak. Qui na yub yi jun ajtzaꞌklaꞌtz, na yi eꞌ wunak, eꞌ teblal Ryos. 10 Iteꞌn nin katziꞌ na xcon kakꞌun tan takꞌleꞌn kakꞌajsbil tetz Ryos, nin tan chijisleꞌn wunak. Eꞌuꞌ wajwutz quil chibanuꞌ junaꞌtz, 11 na quiꞌc nin jun boꞌm yi najk mulkꞌeneꞌl tzaj balaj aꞌ tu aꞌ yi pitzꞌpuj. 12 Nin quiꞌc nin jun wiꞌ ibẍ yi na takꞌ olivo tetz wutz. Nin quiꞌc nin jun wiꞌ uva yi ik ibẍk wutz na takꞌ. Nin quiꞌc rmeril yi nink tzꞌoc yi aꞌ yi pitzꞌpuj tetz balaj aꞌ.
Yi ajtzaꞌkl yi choꞌn na saj tcyaꞌj
13 Ko at jun ẍchixoꞌluꞌ yi na tal yi chin tzꞌaknak cuꞌn iꞌ, nin chin list nin tajtzaꞌkl, baꞌn bin ẍchaj iꞌ yi bintzi yaꞌtz taneꞌn iꞌ tan tuꞌ yil tocsaj tib juy nin yil sban taneꞌn yi eꞌchk takleꞌn balaj. 14 Poro ko at eꞌ ẍchixoꞌluꞌ yi cyꞌaꞌn chiꞌch chicꞌuꞌl cyaꞌn, nin yi na cyocsaj quib nim ẍchicꞌuꞌl cuntuꞌ, eꞌ tzun laꞌj nin eꞌ contr te yi bintzi, na wi cyakꞌ tuꞌ yi na cyal yi chin tzꞌaknak cuꞌn eꞌ. 15 Na yi jun ajtzaꞌklaꞌtz, nkꞌeꞌtz choꞌn na saj te Ryos, ma na choꞌn na jal teꞌtz tzoneꞌj wuxtxꞌotxꞌ. Iꞌtz cyajtzaꞌkl wunak tuꞌ. Iꞌtz tajtzaꞌkl Baybaꞌn. 16 Ej nin ko at eꞌ ẍchixoꞌluꞌ yi na chiꞌch chicꞌuꞌl, nin yi chicontr quib, quiꞌc tzun xtxolbil sbneꞌ chitxumuꞌn. Nin chin juntlen nin yi eꞌchk takleꞌn yi ẍchibneꞌ. 17 Poro yi ajtzaꞌkl yi choꞌn na saj tcyaꞌj quiꞌc muꞌẍ paltil na na xcyeꞌ tan jalseꞌn tzatzin paz skaxoꞌl, nin tan xiteꞌn oyintziꞌ. Nin na jal kapasens taꞌn tan tbiteꞌn yi mbi na cyal yi eꞌ mas. Nin na el kakꞌajab te junt, nin kol kakꞌ amaꞌl te jun ajtzaꞌklaꞌtz list oꞌ tan banleꞌn jun baꞌn, nin qui na txalcaꞌp katxumuꞌn, nin nkꞌeꞌtz ẍchaꞌm wiꞌ kayol. 18 Chaꞌstzun te ko na kaj tzatzin paz qui bin kaxit, ma na kajoyeꞌ puntil tan kaxomeꞌn te yi balaj ajtzaꞌklaꞌtz.