Oquiꞌch len kꞌej jun ric cyanuꞌ
2
1 Ma jaluꞌ eꞌuꞌ wajwutz, yi eꞌuꞌ yi na cyocsajuꞌ Kajcaw Jesucristo, yi jun yi wiꞌnin kꞌej, swaleꞌ yi xtxolbileꞌj scyeruꞌ. Qui na yub ko na cyakꞌuꞌ kꞌej jun yaj tan tuꞌ ric iꞌ. Ej nin qui na yub kol tzꞌel kꞌej jun yaj cyanuꞌ tan tuꞌ yi mebaꞌ iꞌ. 2 Na je jun puntileꞌj, kol chocopon cob yaj ẍchixoꞌluꞌ, jun ric nin jun mebaꞌ. Yi ric wekoꞌn tib tan balaj beꞌch tetz nin balaj xmalkꞌab, ma yi mebaꞌ tal chaꞌbil cuꞌn beꞌch tetz. 3 Qui tzun na yub yi nink cyal ninuꞌ tetz yi yaj yi wekoꞌn tib: “Cꞌolekuꞌ tzoneꞌj wi jun balaj chemeꞌj.” Ma te tal mebaꞌ nink cyal ninuꞌ-tz tetz: “Ma awetz, txiclen cuntuꞌ atz tzoneꞌj.” Nka: “Cꞌolchen cuꞌn wuxtxꞌotxꞌ.” Qui na yub ko yaꞌtz lchibanuꞌ. 4 Na ko yaꞌtz, na tzun chitzanuꞌ-tz tan takꞌleꞌn kꞌej jun, nin telseꞌn kꞌej junt. Qui na yub ko yaꞌtz lchibanuꞌ. 5 Wajwutz, yi okꞌleꞌn chiwutzuꞌ waꞌn, quibit tzajuꞌ inyol. Yi eꞌ mebaꞌ, yaꞌstzun yi eꞌ yi na cheꞌ xtxaꞌeꞌn Ryos tan kꞌukeweꞌn chicꞌuꞌl te iꞌ. Nin yaꞌstzun yi eꞌ yi na cheꞌ xtxaꞌeꞌn Ryos tan tkꞌol amaꞌl scyetz tan cyocomponeꞌn kale na cawuneꞌt iꞌ. Na yaꞌstzun yi sukiꞌnt tan Ryos scyetz yi eꞌ yi na chipekꞌ teꞌj. 6 Poro yi eꞌ cyeruꞌ na chitzanuꞌ tan telseꞌn chikꞌej yi eꞌ mebaꞌ, nin na cyakꞌuꞌ chikꞌej yi eꞌ ric. ¿Nkꞌeꞌtz peꞌ i eꞌaꞌtz yi na chitzan tan chibuchleꞌnuꞌ? 7 Iꞌtz, na yi eꞌ ric yaꞌstzun yi eꞌ yi na chitzan tan chixochleꞌnuꞌ ẍchiwutz alcal. Ej nin yaꞌstzun yi eꞌ yi na choꞌc tan telseꞌn kꞌej yi biꞌ yi jun yi na kocsaj ketz.8 Baꞌn na chibanuꞌ ko na chitzanuꞌ tan banleꞌn taneꞌn yi caꞌwl yi mas tajweꞌn, yi jun caꞌwlaꞌtz yi tzꞌibaꞌnt cyen yi na tal: “Lokꞌweꞌ yi eꞌ wunak chi na alokꞌ awib atz.”a 9 Poro ko na chitzanuꞌ tan takꞌleꞌn chikꞌej yi eꞌ ric nin tan telseꞌn chikꞌej yi eꞌ mebaꞌ, na tzun chitzanuꞌ tan pajleꞌn yi jun caꞌwlaꞌtz, nin banijt chicawsuꞌ quib yi na tal yi ley Kataj. Nin eꞌuꞌ juchul il ko yaꞌtz na chibanuꞌ. 10 Na ko at jun yi na tzan tan banleꞌn taneꞌn cyakil eꞌchk caꞌwl, poro mpe junteꞌnk yi quil sban taneꞌn, na tzun tzan iꞌ tan pajleꞌn cyakil eꞌchk caꞌwlaꞌtz. 11 Na yi jun yi aꞌlon cyen tetz: “Quil cẍjopon wutzaj”, iteꞌn nin iꞌ aꞌlon cyen tetz: “Quil cẍbiyolnakin.”b Chaꞌstzun te, ko at jun yi qui na tzan tan jopleꞌn wutzaj poro yi ko biyolnak iꞌ, pajol caꞌwl tzun iꞌ-tz. 12 Yi na chijilonuꞌ scyuchꞌ wunak, or quiluꞌ yi chijilonuꞌ, nin or quiluꞌ yi mbil chibanuꞌ scyeꞌj, na nkꞌeꞌtz tajweꞌn tan chijuchuluꞌ mas quiluꞌ, na at rmeril tan chixomeꞌnuꞌ te yi chusuꞌn yi tzatzin cuꞌn na xcyeꞌ tan xtxꞌixpeꞌn kajtzaꞌkl tan kabnol yi balaj. 13 Chaꞌstzun te alchok scyetz yi qui na el kꞌajab te junt, nchaꞌtz iꞌ quil tzꞌel kꞌajab Ryos teꞌj yil tzꞌoc tan cawseꞌn. Poro kol tzꞌel kakꞌajab te junt yaj, nchaꞌtz Ryos tzꞌelepon kꞌajab skeꞌj ketz.
Tajweꞌn tan kꞌukeweꞌn kacꞌuꞌl te Ryos nin nchaꞌtz tajweꞌn tan lajluchaxeꞌn skeꞌj
14 Eꞌuꞌ wajwutz quiꞌc ltakꞌ sketz yi kol kal yi kꞌuklij kacꞌuꞌl te Ryos yi ko qui na lajluchax tan yi eꞌchk takleꞌn yi na kaban. Na quil kaclax ko ntin kꞌuklij kacꞌuꞌl, nin qui na katzan tan banleꞌn eꞌchk takleꞌn balaj. 15 Na ko at jun kajwutz yaj nka xnaꞌn yi quiꞌc waꞌ, nin quiꞌc beꞌch tetz, 16 nin yi nink kal nin tetz: “Cheb cuꞌn cẍben. Lok jal beꞌch atz, na wiꞌnin cheꞌw. Nin lok cẍwan.” Poro qui na yub ko yaꞌtz lkal, nin quiꞌc lkakꞌ nin tetz. Quiꞌc na takꞌ yi jun ajtzaꞌklaꞌtz. 17 Na ko at jun yi na tal yi kꞌuklij cꞌuꞌl te Ryos, poro qui na tzan tan banleꞌn taneꞌn yi eꞌchk takleꞌn balaj, quiꞌc na takꞌ yi na tal yi kꞌuklij cꞌuꞌl. Na ko ntin kꞌuklij kacꞌuꞌl, nin ko qui na kaban taneꞌntz yi eꞌchk takleꞌn balaj, niꞌcuꞌn tzun oꞌ-tz chi jun almaꞌ.
18 Nchaꞌtz, ko at jun ẍchixoꞌluꞌ yi na tal: “Yi in wetz ja chinclax tan tuꞌ yi kꞌuklij incꞌuꞌl te Ryos,” nin ko at junt yi na tal: “Yi in wetz ja chinclax tan tuꞌ yi na chintzan tan banleꞌn pawor,” quiꞌc rmeril yi jajk chiclax chicabil. Na ko qui na kaban taneꞌn eꞌchk takleꞌn balaj yaꞌstzun jun techl yi qui kꞌuklij kacꞌuꞌl te Ryos. Poro yi ketz, tajweꞌn kachaj yi bintzinin kꞌuklij kacꞌuꞌl te Ryos tan yi eꞌchk takleꞌn balaj yi na kaban. 19 Cyakil oꞌ na kocsaj yi jun ntziꞌ Ryos at. Baꞌn na kaban. Poro nchaꞌtz yi eꞌ ẍchakum Baybaꞌn, yi eꞌ demonio, na el chitxum tetz yi jun ntziꞌ Ryos at, nin wiꞌnin na chixob tetz, poro quil chiclax. 20 Na ¿qui peꞌ na el chitxumuꞌ tetz yi quiꞌc ltakꞌ sketz kol kal yi choꞌn kꞌuklij kacꞌuꞌl te Ryos, ko qui na lajluchax skeꞌj? 21 Na yi kꞌajtzun kamam Abraham, jal yi balajil iꞌ swutz Ryos tan yi eꞌchk takleꞌn yi mban iꞌ. Na ja jal yi balajil iꞌ yi tkꞌol kloꞌ iꞌ Isaac yi cyꞌajl tetz xtxꞌixwatz. 22 Na tan tuꞌ yi list iꞌ tan banleꞌn taneꞌn yi tajbil Ryos, ja lajluchax yi nternin kꞌuklij cꞌuꞌl teꞌj. 23 Na yaꞌstzun yi xeꞌ yi xtxolbil yi tzꞌibaꞌnt cyen yi na tal: “Nternin kꞌukeꞌ cꞌuꞌl Abraham te Ryos. Chaꞌstzun te jaleꞌn yi balajil iꞌ swutz, nin chaꞌstzun te toqueꞌn biꞌ iꞌ tetz tamiw Ryos.”
24 I bin jaluꞌ eꞌuꞌ wajwutz, ja lajluchax skawutz yi na jal kabalajil swutz Ryos tan yi eꞌchk takleꞌn balaj yi na kaban, nkꞌeꞌtz ntinin tan yil kꞌukeꞌ kacꞌuꞌl. 25 Nchaꞌtz banak Rahab, yi wiꞌtz bnol tetz. Tan tuꞌ yi tkꞌol iꞌ chiposar yi eꞌ chakum, nin tan yi eꞌ beneꞌn ẍchakol tcꞌuꞌl junt beꞌ, yaꞌstzun jaleꞌt balajil iꞌ swutz Ryos. 26 Na na el katxum tetz yi ko quiꞌt na xewan jun yaj iꞌtz jun techl yi ja wiꞌt quim. Niꞌcuꞌn tzun quitaneꞌn yi eꞌ yi na cyal yi kꞌuklij chicꞌuꞌl, poro qui na lajluchax scyeꞌj, quimnakeꞌ taneꞌn swutz Ryos.