YI CART YI BNIXNAK TAN SANTIAGO
Jun yos
1
1 Yi in wetz in Santiago, in ẍchakum Ryos tu Kajcaw Jesucristo. Na chintzan tan talcheꞌn nin jun yos scyeruꞌ, yi eꞌuꞌ yi coblaj cuꞌn kꞌuꞌj eꞌuꞌ yi elnakeꞌuꞌ xit beneꞌn tziꞌn wi munt.Yi ajtzaꞌkl yi choꞌn na saj tu Ryos
2 Eꞌuꞌ wajwutz, chitzatzinkuꞌ te alchok eꞌchk pilbil cyeruꞌ yi na ul tan chixiteꞌnuꞌ te yi na cyocsajuꞌ. 3 Chitzatzinkuꞌ na elnak chitxumuꞌ tetz yi ẍchiquiwixkuꞌ tan eꞌchk pilbil cyeruꞌ kol tzꞌicyꞌpon cyanuꞌ, nin sjalok chipasensuꞌ tan mucꞌleꞌn mas qꞌuixcꞌuj. 4 Na chin tajweꞌn cunin tzꞌicyꞌpon yi pilbil cyeruꞌ cyanuꞌ. Ko yaꞌtz, chocpon tzunuꞌ-tz tetz tzꞌaknak cuꞌn, nin quiꞌc nin noc chipaltiluꞌ sbneꞌ.
5 Poro ko at jun ẍchixoꞌluꞌ yi quiꞌt na jal puntil tajtzaꞌkl taꞌn, baꞌn sjak tetz Ryos, na ẍchajeꞌ iꞌ puntil tetz, nin list Ryos tan quichꞌeyeꞌn cyakil wunak, nin qui na yajon scyeꞌj. 6 Poro chin tajweꞌn cunin yil kꞌukeꞌ cꞌuꞌl yi junaꞌtz yi xcyek Ryos tan ẍchꞌeyeꞌn iꞌ, na ko na cabej cꞌuꞌl niꞌcuꞌn tzun iꞌ-tz tu yi pakꞌbil mar yi tu nin na joꞌjkel tuꞌ tan cyekꞌekꞌ. 7 Na ko at jun kajwutz yi tu na joꞌjkel tuꞌ tajtzaꞌkl, quil tzꞌoc Kajcaw tan ẍchꞌeyeꞌn iꞌ. 8 Na ilenin na tol na chuc jun yaj yi na cabej cꞌuꞌl te Ryos.
9 I bin jaluꞌ, yi eꞌ kajwutz yi eꞌ mebaꞌ baꞌn chitzatzin, na at chikꞌej tan Ryos. 10 Poro yi eꞌ ric, tzꞌelepon cyetz chikꞌej tan Ryos. Choꞌn ẍchibneꞌ cyeraꞌtz chi na ban jun buch yi na cuꞌ num tan kꞌej, 11 na yi na jeꞌ ul kꞌej na cuꞌ num, nin na cuꞌ lokp yi buch tan tzꞌaꞌ, nin na sotz yubil taꞌn. Choꞌn cunin sbajok scyeꞌj yi eꞌ ric yi ntin na chitzan tan xtxumleꞌn chimebiꞌl.
Baꞌn cyeri yi eꞌ yi tzꞌicyꞌpon cuꞌn pilbil cyetz cyaꞌn
12 Baꞌn cyeri eꞌ yi tzꞌicyꞌpon pilbil cyetz cyakꞌun, na tzꞌakꞌlok jun oy scyetz. Iꞌtz yi quitzꞌajbil yi quinin bajsbeꞌn tetz. Na yaꞌstzun yi oy yi sukiꞌnt tan Ryos scyetz yi eꞌ yi na chipekꞌ teꞌj. 13 Nin yi na ul pilbil ketz, baꞌn tcuꞌn quil kal yi iꞌtz Ryos yi na tzan tan kapileꞌn, na nkꞌeꞌtz cachiꞌ tajtzaꞌkl Ryos, nin cyaꞌl na oqueꞌt Ryos tan kapileꞌn. 14 Poro yi na kapoꞌtij, oꞌ nin aj paj te keraꞌtz, na yi eꞌchk kajtzaꞌkl cachiꞌ, yaꞌstzun yi na xcyeꞌ tan kapoꞌtzeꞌn. 15 Na kol kakꞌ amaꞌl tetz yi eꞌchk kajtzaꞌkl cachiꞌ, skajucheꞌ kil, nin tan paj kil sjalok quimichil kaꞌn.
16 Eꞌuꞌ wajwutz, yi okꞌleꞌn chiwutzuꞌ waꞌn, eꞌ xubsiꞌchuꞌ. 17 Cyakil balaj oy, nin cyakil yi oy yi tzꞌaknak cuꞌn, choꞌn na saj tcyaꞌj. Choꞌn na saj te Kataj yi bnol cyeri txekbil yi at tcyaꞌj. Yi eꞌchk txekbilaꞌtz na chitxꞌixpuj quib cyeraꞌtz, poro yi Kataj qui na xtxꞌixpuj yi tajtzaꞌkl. Siquier nink najk txalcaꞌp muꞌẍ tal tajtzaꞌkl iꞌ. 18 Nin iꞌ nkoꞌcsan tetz meꞌl cyꞌajl iꞌ tan yi tetz yol yi bintzi. Yaꞌstzun ban iꞌ na yi tetz tajbil iꞌtz tan tkꞌol mas kakꞌej ẍchiwutz cyakil yi eꞌ yi bnixnakeꞌ taꞌn.
Chibneꞌuꞌ taneꞌn yol Kataj
19 Chaꞌstzun te, eꞌuꞌ wajwutz, choꞌkuꞌ tan xtxumleꞌn yi eꞌchk xtxolbil yi na quibituꞌ. Qui chan chijilonuꞌ. Qui chan chicyakaxuꞌ. 20 Na yi ko noqueꞌn cyeleꞌnuꞌ quil chixcyeꞌuꞌ tan banleꞌn taneꞌn yi tajbil Ryos. 21 Quil cyenuꞌ cyakil yi ajtzaꞌkl cachiꞌ, tu cyakil cyakal makꞌmal. Choꞌkuꞌ cꞌulutxum jakꞌ caꞌwl yol Kataj yi ja wiꞌt oc te cyalmaꞌuꞌ, na yaꞌstzun yi yolaꞌtz yi na xcyeꞌ tan claxeꞌn yi kalmaꞌ.
22 Poro chibneꞌuꞌ taneꞌn yol Kataj quib yi na tal. Nkꞌeꞌtz ntin tuꞌ tbiteꞌn, na ko ntin na quibit cyꞌenuꞌ na tzun chisub quibuꞌ-tz. 23-24 Na ko at jun yi ntin na tzan tan tbiteꞌn, nin qui na tzan tan xtxumleꞌn, niꞌcuꞌn iꞌ tu jun yi na xmay cuꞌn yi yubil tul spej, nin le rat na el yubil te cꞌuꞌl. 25 Poro skatzatzink kol koꞌc tan xtxumleꞌn yi caꞌwl Ryos, yi tzꞌaknak cuꞌn, yi caꞌwlaꞌtz yi tzatzin cuꞌn na xcyeꞌ tan xtxꞌixpeꞌn kajtzaꞌkl tan kabnol taneꞌn. Poro chin tajweꞌn cunin lkaxom teꞌj, nin yi quil tzꞌel te kacꞌuꞌl, nin yil kaban taneꞌntz.
26 Ko at jun yi le wutz yi tetz tajtzaꞌkl yi iꞌ jun balaj nitxajil Ryos, poro qui na xcyeꞌ tan makleꞌn stziꞌ, ẍchuc teꞌn na sub tib, nin quiꞌc na takꞌ tetz yi na tal yi iꞌ jun balaj nitxajil Ryos. 27 Na swutz Kataj, yi eꞌ nitxajil iꞌ iꞌtz yi eꞌ yi na choꞌc il tan quichꞌeyeꞌn yi eꞌ mebaꞌ scyuchꞌ yi eꞌ xmaꞌlcaꞌn yi na choꞌc wutz peꞌm. Nin yi eꞌ tetz nitxajil iꞌtz yi eꞌ yi na chiqꞌuicyꞌlej quib tkꞌab yi eꞌchk takleꞌn cachiꞌ tetz munt.