Yi ẍeꞌn kaban tan stzatzineꞌn Ryos skeꞌj
13
1 Chilokꞌeꞌ bin quibuꞌ squibil quibuꞌ chi quitzꞌun quitzicy quibuꞌ. 2 Eliꞌch te chicꞌuꞌluꞌ yi tajweꞌn yi list eꞌuꞌ tan cyakꞌoluꞌ chiposar wunak. Na at eꞌ yi na chixom te yi jun ajtzaꞌklaꞌtz poro quinin tzꞌicyꞌ scyetz yi opon yi eꞌ ángel tan posariꞌn scyeꞌj.3 Elk chikꞌajabuꞌ scyeꞌj yi eꞌ kajwutz yi ateꞌ xetzeꞌ. Choꞌkuꞌ tan xtxumleꞌn chi niꞌcuꞌntz chi ik eꞌuꞌ-tz ateꞌuꞌ xetzeꞌ. Nin elk chikꞌajabuꞌ scyeꞌj yi eꞌ yi buchij cheꞌ, na nchaꞌtz eꞌuꞌ qui cunin batz ẍchitijeꞌuꞌ qꞌuixcꞌuj.
4 At kꞌej yi okꞌbeꞌn ib swutz Ryos. Chaꞌstzun te qui tuꞌk chitzan tuwuꞌ, na stkꞌeꞌ Ryos chicaws cyakil yi eꞌ jopol wutzaj scyuchꞌ yi eꞌ aj xnaꞌninl tu aj yajinl.
5 Quil tzꞌel cyalmaꞌuꞌ tan chicambaluꞌ mas pwok, ma na kꞌukek chicꞌuꞌluꞌ te yi at scyuchꞌuꞌ. Na alijt cyen tan Ryos: “Quinin xwil cyen, nin quinin cxeꞌlwok te incꞌuꞌl.” 6 Chaꞌstzun te nkꞌeꞌtz cob kacꞌuꞌl yi na kal:
“Yi chꞌeyanl wetz iꞌtz yi Wajcaw.
Chaꞌstzun te quil chimbisun te yi mbi sban jun wunak sweꞌj.”a \p 7 Ej nin eliꞌch te chicꞌuꞌluꞌ yi eꞌ yi xconakeꞌ tetz chibajxomuꞌ. Ulk txꞌakx chicꞌuꞌluꞌ yi ja chitxol yi balaj stziblal tetz Cristo scyeruꞌ. Ulk bin txꞌakx chicꞌuꞌluꞌ yi chibalajil, nin chixomokuꞌ te yi cyajtzaꞌkl.
8 Na yi Cristo qui na xtxꞌixpuj yi tetz tajtzaꞌkl. Na iteꞌn nin tajtzaꞌklaꞌtz sajleꞌn tunintz, nin sbneꞌ opon tunintz. 9 Qui bin chixomuꞌ te eꞌchk jilwutz chusuꞌn yi apart. Ma na mas baꞌn tcuꞌn yi nink chiquiwixuꞌ tan yi banl talmaꞌ Kataj, swutz yi nink chixomuꞌ te eꞌchk acꞌaj ley yi na cawun te yi mbiꞌtz tajweꞌn lbaj tan jun yaj. Na yi eꞌchk leyaꞌtz quiꞌc na takꞌ scyetz yi eꞌ yi xomcheꞌ tan banleꞌn taneꞌn.
10 Apart mban yi ketz katxꞌixwatz, ej nin yi eꞌ paleꞌ tetz yi antiw xtxolbil, quiꞌc cu tan chibajsal yi ẍchiꞌbel yi ketz katxꞌixwatz. 11 Yi wiꞌtz chipaleꞌil yi eꞌ katanum yi na chixom te yi antiw ley, ntin na chixconsaj ẍchꞌel yi txuc yi na chiquim cyakꞌun tan jaleꞌn cuybil chipaj. Ma chiwankil yi eꞌ txucaꞌtz na el ticyꞌleꞌn joylaj len yi chinajbil tan toqueꞌn cyakꞌun wi kꞌakꞌ. 12 Niꞌcuꞌn mbajij te Jesús, na choꞌn quimeꞌn iꞌ solteꞌj len yi tnum. Ej nin yaꞌstzun tulejtz tan kaxansajeꞌn ketz tan yi tetz ẍchꞌel. 13 Keꞌlk bin ẍchixoꞌl yi eꞌ mas wunakaꞌtz, nin kamuqꞌueꞌ qꞌuixcꞌuj chi banak Cristo. 14 Na yi oꞌ ketz quiꞌc kachꞌiw te jun takleꞌn tzoneꞌj wuxtxꞌotxꞌ. Quiꞌc jun kanajbil tzoneꞌj wuxtxꞌotxꞌ yi segur. Ma na choꞌn ajlij kacꞌuꞌl te yi jun kanajbil yi tzꞌakꞌlok sketz tzantzaj. 15 Chaꞌstzun te kakꞌeꞌ kakꞌajsbil tetz Ryos, na yi na koꞌc tan naꞌwseꞌn yi biꞌ Jesucristo niꞌcuꞌn chi najk katzan tan toyeꞌn jun katxꞌixwatz tetz Ryos. 16 Poro eliꞌch te chicꞌuꞌluꞌ yi tajweꞌn tan kabnol pawor nin tan cheꞌ kuchꞌeyal yi eꞌ yi at tajweꞌn scyetz, na yaꞌstzun yi eꞌchk oy yi na tzatzin Ryos teꞌj.
17 Choꞌkuꞌ cꞌulutxum jakꞌ chicaꞌwl yi eꞌ chibajxomuꞌ, na eꞌ qꞌuicyꞌlom cyeruꞌ tan qui chibeneꞌnuꞌ tul il. Na nchaꞌtz eꞌ scyakꞌeꞌ cwent swutz Ryos te yi mbi akꞌunil mbaj chibnol. Choꞌkuꞌ bin cꞌulutxum jakꞌ chicaꞌwl, na ko yaꞌtz cyulejuꞌ chitzatzink chibajxomuꞌaꞌtz sjuꞌ takꞌun Kataj, nin quil chibisun. Na quiꞌc xtxicbaj scyeruꞌ ko na cyakꞌuꞌ bis scyetz.
18 Le wutz ketz kajtzaꞌkl quiꞌc kapaltil, nin yi ketz kajbil iꞌtz tan kaxomeꞌn te yi eꞌchk xtxolbil yi balaj. Poro chinacheꞌuꞌ Kataj skibaj yi yaꞌstzunk sbantz. 19 Nchaꞌtz chinacheꞌuꞌ Kataj tan wuponeꞌn chan tan chixajseꞌnuꞌ, nin yi baꞌn cuntuꞌk nopontz.
Kakꞌeꞌ kakꞌajsbil tetz Ryos
20 Yi ketz kaRyosil iꞌ njalsan yi tzatzin paz skaxoꞌl tuchꞌ. Ej nin iꞌ njeꞌsan tzaj Kajcaw Jesucristo ẍchixoꞌl almaꞌ. Ej nin yi Kajcaw Jesucristaꞌtz oc tetz kapstor, yi oꞌ yi oꞌ tanum iꞌ, tan tuꞌ yi el kojx yi tetz ẍchꞌel tan bixbajeꞌn yi acꞌaj trat yi quiꞌc rmeril tan xiteꞌn tetz ben kꞌej ben sak. 21 Lok tzꞌoc yi jun kaRyosilaꞌtz tan cyocseꞌnuꞌ tetz tzꞌaknak cuꞌn te cyakil yi na chibanuꞌ. Lok chibanuꞌ yi tetz tajbil. Lok tzꞌoc iꞌ tan chinucꞌleꞌnuꞌ tan porer Jesucristo, bantz chibnoluꞌ yi eꞌchk takleꞌn balaj yi na tzatzin iꞌ teꞌj. Ej nin kakꞌeꞌ kakꞌajsbil tetz Cristo tetz ben kꞌej ben sak. Amén.
22 Eꞌuꞌ kajwutz, max chicꞌuꞌluꞌ swibaj te yi xtxolbil yi nwal scyeruꞌ na cobox ntziꞌ tal yol.
23 Nchaꞌtz na waj wal scyeruꞌ: Yi kajwutz Timoteo ja el tzaj iꞌ xetzeꞌ. Ej nin kol tzꞌul chan iꞌ tzoneꞌj, mben tzun xomok iꞌ sweꞌj yil chimben tan chixajseꞌnuꞌ.
24 Cyal cyen binuꞌ jun yos scyetz cyakil yi eꞌ chibajxomuꞌ, nin scyetz cyakil yi eꞌ mas kajwutz. Cyal cyenuꞌ scyetz yi na chitzan yi eꞌ aj Italia yi ateꞌ tzoneꞌj swuchꞌ tan talcheꞌn nin jun yos scyeruꞌ.
25 Takꞌ tzaj Kataj yi banl iꞌ squibuꞌ. Amén.